Adbyłosia aficyjnaje adkryćcio muzieja «Ściežkami jaŭrejskaj historyi» ŭ škole «Biejs-Aharon» na vulicy Partyzanskaj u Pinsku, paviedamlaje «Miedyja-Paleśsie». Nad stvareńniem muziejnaj ekspazicyi pracavała viadomaja miascovaja ekskursavodka Taćciana Chvahina.
Muziej mieścicca ŭ cokalnym budynku škoły. Jaho historyja pačałasia z ekspazicyi, jakuju pačaŭ źbirać jašče ŭ pačatku 2000-ch hadoŭ staršynia pinskaj jaŭrejskaj abščyny Iosif Libierman, ciapier užo niabožčyk.
Kalekcyja składałasia z samych roznych pradmietaŭ i dakumientaŭ, jakija nie ŭkładalisia ŭ strojnuju sistemu, a isnavali jak by asobna adzin ad adnaho. Jana zachoŭvałasia na druhim paviersie ŭ budynku byłoha Doma bytu pa vulicy Białova.
Pry stvareńni muzieja «Ściežkami jaŭrejskaj historyi» pradmietnuju kalekcyju, sabranuju Libiermanam, istotna pašyryli. U novaj ekspazicyi jana składaje kala 15-20%, ale biez hetaha pačatku nie było b i samoha muzieja.
Stvaralnikam vielmi chaciełasia ŭ minijaciurny muziej źmiaścić ledź nie ŭsiu historyju jaŭrejaŭ Paleśsia, pakazać roznyja baki jaŭrejskaha žyćcia i bahatyja tradycyi.
U muziei možna ŭbačyć nie tolki Pinsk i znakamitaje jaŭrejskaje pradmieście Karlin, ale i inšyja jaŭrejskija miastečki, kožnaje ź jakich mieła svaju śpiecyjalizacyju, słaviłasia majstrami, sakralnymi pomnikami i viadomymi ludźmi.
U ekspazicyi šmat posudu, kieramiki z Haradnoj — byłoha jaŭrejskaha miastečka Stolinskaha rajona, jakoje było radzimaj baćki Iosifa Libiermana.
Adno z upryhažeńniaŭ ekspazicyi — fihurki z salonaha ciesta. Hety materyjał dalikatny, ale tradycyjny dla Paleśsia. Ź jaho ŭ asobnych rehijonach rabili ŭpryhažeńni dla viasielnych karavajaŭ.
Kampazicyi minskaha mastaka Eliny Siniaŭskaj vykananyja na temu jaŭrejskich śviataŭ i tradycyj. Tut možna ŭbačyć maładuju paru pad chupaj, jaŭrejskija pachavańni, rabina, jaki trubić u šafar, śviatkavańnie Piejsacha, Sukota, viasiołaha Puryma i mnohaje inšaje.
Za kožnym ekspanatam muzieja — historyja i tradycyi jaŭrejskaha naroda. U muziei niamała knih duchoŭnaha źmiestu, siarod ich staradaŭnija, adna datujecca 1568 hodam.
Nie zastałasia biez uvahi stvaralnikaŭ muzieja i tema vajny dy Chałakostu. Pakul jana pradstaŭlenaja ścipła — nie chapaje miesca, i kalekcyja taksama vielmi ścipłaja. Siarod ekspanataŭ knihi, dakumienty, uznaharody, karciny miascovych mastakoŭ.
Jość i niekalki ekspanataŭ z historyjaj — naprykład, plaška, jakaja razam z vychadcam miastečka Pahost-Zaharodski dajšła da Bierlina, abo pišučaja niamieckaja mašynka, jakaja stała vajennym trafiejem i jašče doŭha słužyła ŭ adnoj z ustanoŭ Pinska. Tut ža i kavałački skrutkaŭ Tory.
Udałosia znajści hrašovyja kupiury, jakija dziejničali ŭ pieryjad akupacyi, vypuščanyja ŭ 1940 hodzie, chutčej za ŭsio, na terytoryi Polščy. A taksama davajenny draŭlany čamadan z napisanym na im krejdaj adrasam.
U muziei ŭžo zapłanavana niekalki ekskursij.
Kavid zabraŭ u Biełarusi 90 tysiač žyćciaŭ, a nie 7 tysiač, jak śćviardžali ŭłady20
Kamientary
Ale habrej -- heta chutčej nie hieny, i nie relihija, heta skład myśleńnia.