Pieršaja ŭciečka źviestak Pientahona adbyłasia praz 48 hadzin paśla ŭvarvańnia va Ukrainu
Vajskoviec VPS Nacyjanalnaj hvardyi ZŠA Džek Tejšejra, jakoha abvinavačvajuć va ŭciečcy sakretnych dakumientaŭ Pientahona, pačaŭ publikavać ich mienš čym praz 48 hadzin paśla ŭvodu Rasijaj vojskaŭ va Ukrainu ŭ lutym 2022 hoda, piša The New York Times.
Pra toje, što Tejšejra pačaŭ publikavać sakretnyja źviestki jašče tady, raniej paviedamlała The Washington Post sa spasyłkaj na jaho znajomaha. Surazmoŭca haziety raspaviadaŭ, što małady čałaviek byŭ «pryhniečany» vajennymi dziejańniami i pierakanany, što Maskva i Kijeŭ «pavinny mieć bolš ahulnaha, čym taho, što ich padzialaje».
Pavodle źviestak NYT, z kanca zimy 2022 hoda Tejšejra raźmiaščaŭ sakretnuju infarmacyju ŭ čat-hrupie sacsietki dla hiejmieraŭ Discord, jakaja naličvała 600 udzielnikaŭ. Raniej pra hetuju hrupu nie paviedamlałasia; sprava suprać vajskoŭca źviazana z publikacyjami ŭ inšaj supołcy Thug Shaker Central, u jakoj byli kala 50 čałaviek. Sakretnyja materyjały pačali źjaŭlacca tam u kastryčniku.
Pra hrupu z sotniami ŭdzielnikaŭ haziecie raspavioŭ karystalnik Discord. Vydańnie adznačaje, što, u adroźnieńnie ad Thug Shaker Central, da hetaj supołki možna było lohka atrymać dostup, u tym liku praz spasyłki na YouTube. Jak piša NYT, tam raźmiaščalisia źviestki pra straty abodvuch bakoŭ kanfliktu, dziejnaść rasijskich raźviedvalnych słužbaŭ i akazanuju Ukrainie dapamohu. Tejšejra śćviardžaŭ, što heta danyja Ahienctva nacyjanalnaj biaśpieki ZŠA, CRU i inšych viedamstvaŭ.
Pa danych NYT, Tejšejra praciahvaŭ publikavać źviestki ŭ bolš bujnoj hrupie da sakavika hetaha hoda.
The Washington Post paviedamlaje, što supracoŭniki FBR apytali ŭdzielnikaŭ hrupy Thug Shaker Central; jany cikavilisia siarod inšaha tym, jak karystalniki paznajomilisia z Tejšejram i ci byli siarod ich zamiežniki. Raniej hazieta pisała, što ŭ supołcy byli ŭdzielniki z Rasii i Ukrainy, a taksama z krain Jeŭropy, Azii i Paŭdniovaj Amieryki.
FBR aryštavała padazravanaha va ŭciečcy dakumientaŭ ź Pientahona — ŚMI
Tejšejra nie adziny, chto raspaŭsiudžvaŭ sakretnyja dakumienty ZŠA. Hetym taksama zajmaŭsia «Łuka»
Sudziać hiendyrektara BiełAZa. Pahražaje da 15 hadoŭ9
Kamientary