Jabaćki ŭ šoku. Na Akreścina adpravili namieśnika Paŭličenki ŭ asacyjacyi vieteranaŭ śpiecnaza «Čiesť»
Siarhiej Zasłaŭski vyhladaje etałonnym jabaćkam. Jon aktyvist usich dekaratyŭnych ruchaŭ u padtrymku Łukašenki. Instruktar śpiecpadraździaleńniaŭ, major unutranych vojskaŭ, lubimčyk AMAPa, znajomy ź ministrami, jaki celić u «deputaty» jak člen Libieralna-demakratyčnaj partyi. I raptam uspłyvaje na Akreścina «za palityku»! Jabaćki ŭ šoku, što takoje?
Siarhiej Zasłaŭski słužyŭ va ŭnutranych vojskach. Z taho času jon padtrymlivaje siabroŭskija adnosiny ź Dźmitryjem Paŭličenkam, byłym kamandziram vajskovaj čaści 3214, jakoha padazrajuć u vykanańni palityčnych zabojstvaŭ kanca 1990-ch i pačatku 2000-ch. Pra stupień ich blizkaści havoryć toje, što Zasłaŭski staŭ namieśnikam Paŭličenki ŭ asacyjacyi vieteranaŭ śpiecnaza MUS «Čiesť».
Dziaržaŭnaja presa časta apisvaje Zasłaŭskaha jak zdaraviaka, paŭerliftara, rekardsmiena Knihi rekordaŭ Hiniesa ŭ adciskańniach ad padłohi i brusoŭ.
Ale heta niapraŭda — Zasłaŭski nie zhadvajecca na sajcie Knihi rekordaŭ. Dziaržpresa pisała, što jon robić 101 adciskańnie za chvilinu. Ale sapraŭdny rekord — 180 razoŭ za chvilinu — naležyć brytancu Aleksu Hoŭłdzinhu.
Inšyja dyscypliny, u jakich Zasłaŭski nazyvaje siabie «dziejnym čempijonam śvietu», jak padniaćcie štanhi na biceps i padniaćcie štanhi stojačy, — heta nie toje, u čym spaborničajuć ciažkaatlety (ryvok i šturšok) ci paŭerliftary (cisk ležačy, stanavaja ciaha, prysiad), a zvyčajnyja padrychtoŭčyja praktykavańni, jakimi nie mierajucca.
Takim čynam, Zasłaŭskaha možna ličyć schilnym da hipierbalizacyi svaich realnych dasiahnieńniaŭ. A zorny čas u jaho žyćci nastaŭ paśla 2020-ha.
Na chvali padziej 2020-ha Zasłaŭski zasnavaŭ «spartova-patryjatyčny prajekt «Za mocnuju Biełaruś».
Dziejnaść ruchu zaklučajecca faktyčna ŭ nastupnym: pad vyhladam zasłužanaha spartoŭca (šmatrazovaha čempijona śvietu ŭ siłavych vidach sportu i rekardsmiena Knihi rekordaŭ Hiniesa), jakim u realnaści Zasłaŭski nie źjaŭlajecca, jon jeździć pa siłavych ustanovach z majstar-kłasami, sieminarami, a taksama z prasłaŭleńniem palityki Łukašenki.
Zasłaŭski hastraluje taksama pa škołach i kaledžach.
Sam jon na adnym ź sieminaraŭ u Lidzie kazaŭ, što ŭ hetym vypadku «hałoŭnaja meta — vychavańnie našaj moładzi i adciahnieńnie ich ad anarchičnych i ekstremisckich dziejańniaŭ».
Na poli palityčnaj prapahandy Siarhiej Zasłaŭski staŭ viadomym va ŭładnych kalidorach i staŭ asobaj, dapuščanaj da ministraŭ i režymnych sielebryci pieršaha ešałonu.
Voś, naprykład, kiraŭnik minskaha AMAPa Dźmitryj Bałaba ŭručaje hramatu Zasłaŭskamu, zyčyć mocnaha zdaroŭja i pośpiechaŭ, potym abdymajecca.
Jašče zusim niadaŭna, u lutym 2023-ha, Zasłaŭski atrymlivaŭ list padziaki za supracoŭnictva z MUS z ruk hienierała Dźmitryja Karziuka.
I chadziŭ pa kabinietach ministraŭ i dyrektaraŭ pradpryjemstvaŭ, biznesoŭcaŭ, jakija ŭ ciapierašniaj situacyi bajacca admović u pryjomie ludziam u pahonach.
Ale raptam u krasaviku zdaryłasia niespadziavanaje. Siarhieja Zasłaŭskaha aryštavali i adpravili na Akreścina. Pa infarmacyi «Našaj Nivy», pa artykule 19.11 — «Raspaŭsiud ekstremisckaj pradukcyi». Jon atrymaŭ 15 sutak.
Viadoma, što zatrymlivali Zasłaŭskaha tyja samyja amapaŭcy, dla jakich jon viadzie sieminary pa siłavoj padrychtoŭcy.
Jak tak mahło zdarycca? Vyhladaje, što Zasłaŭski pa nieaściarožnaści zapościŭ u sacyjalnych sietkach artykuł pra svoj čarhovy spartovy rekord ź niejkaha resursu, jaki ŭłady pryznali ekstremisckim.
Čytač «Našaj Nivy» pieradaŭ u Redakcyju krasamoŭny zapis razmovy ź inšym namieśnikam Paŭličenki ŭ asacyjacyi vieteranaŭ śpiecnaza, Siarhiejem Maćvijenkam, dzie toj aburajecca situacyjaj.
«Niejkaje nieparazumieńnie. Apieraciŭniki niejkija… Niedzie byŭ padpisany ci niešta adpraviŭ. Jaho razmatali i ŭsio, i p***c. Chutka vyjdzie, i tam budziem raźbiracca, čamu tak adbyłosia, chto heta zrabiŭ, jakija padstavy byli.
Viedajučy partfolia čałavieka, viedajučy ŭsio… nu heta, b**, śmiešna. Razumieju, kali b tam niejkaja kryminalščyna była, a administratyŭka… b**, na sutki?! Heta hańbišča, kali takoje zrabili. Treba było hłybiej razabracca, abjektyŭna.
Nibyta niešta z kanałam «Zierkała» źviazana i niejkaja pieśnia Coja. Ci to śpieŭ, b**, ci to što, tryźnieńnie niejkaje nu, ci to stancavaŭ pad pieśniu.
Nu heta nie padobna, Zasłaŭski nie budzie hetaha rabić, jon u p***rez nie palezie, jon sabie topča karjeru palityčnuju i deputackuju.
I heta tupa, kali čałaviek paŭsiul maje dostup, i leźci ch***ioj zajmacca, nu heta niełahična. Heta nie ŭkładvajecca. U jaho i prateže narmalnaja, i ŭvachody paŭsiul: i ŭ parłamient, i ŭ meryju.
Užo mnie i z «kantory» zvanili, skazali, što padtrymajuć, raźbiarucca ŭ situacyi», — krasamoŭničaje Maćvijenka na zapisie, jaki vy zmožacie pasłuchać u viečarovym vypusku navin «Našaj Nivy» ŭ jutubie.
«Naša Niva», adnak, nie znajšła zhadak pra Zasłaŭskaha na «Zierkale». Mahčyma, Siarhiej Maćvijenka pabłytaŭ, i havorka pra inšaje vydańnie.
Jak raskazali «Našaj Nivie» ludzi ź siłavych struktur, pra pierapost «ekstremisckaha» materyjału i inšyja «hrachi» moh paviedamić u orhany adzin ź jaho tavaryšaŭ. U hetym historyja Zasłaŭskaha pakazalnaja.
Zaraz Siarhieja Zasłaŭskaha, jaki stryh kupony na apraŭdańni łukašenkaŭskaj sistemy, čakaje toje ž, što i dziasiatki tysiač inšych asudžanych pa palityčnych matyvach.
«Naša Niva» — bastyjon biełaruščyny
PADTRYMAĆPalitviazień pravioŭ paŭtara hoda ŭ SIZA — voś jak jon vyhladaŭ paśla hetaha10
Kamientary