Novaja skulptura lva ŭ Mahilovie napužała niekatorych haradžan — i voś čamu
«Mahiloŭski leŭ — heta mif, i my jaho stvarajem», — niekali vykazaŭsia skulptar Andrej Vierabjoŭ. Niahledziačy na sumnievy, ci maje «lvinaja tema» da horada choć jakoje dačynieńnie, haradžanie pryvykli da hetaha simvała. Skulptury ź im stali ŭlublonym fonam dla sełfi. A niadaŭna ŭ Mahilovie źjaviłasia novaja skulptura. Niekatoryja pabačyli ŭ joj schavany sens.
Skulpturu pastavili na placoŭcy pierad budynkam administracyi Leninskaha rajona. Na joj žyvioła z raziaŭlenaj paščaj, demanstruje svaje ikły. Vobraz ahresiŭnaha lva nie padobny da papiarednikaŭ — spakojnych i navat liryčnych.
«Heta dziŭny i niepryhožy leŭ. Čornaja hryva była tolki ŭ vymierłaha kapskaha lva. A leŭ z raziaŭlenaj paščaj — heta naohuł matyŭ kryminalnaj tatuiroŭki», — vykazvajecca pra skulpturu miascovy znaŭca.
Pavodle jaho, na tatuiroŭkach kryminalnikaŭ demanstracyja lvoŭ z pakazanymi ikłami i raziaŭlenaj paščaj — znak ahresii i hatoŭnaści raźbiracca z apanientami žorstkimi mietadami. Takoje tatu pakazvaje, što jaho ŭładalnik kiepska kantraluje svaje emacyjnyja paryvy. Takoha piersanaža lepiej abychodzić.
Hety pomnik sa lvom staić užo try miesiacy i jaho paśpieli prasłavić jak hroznaha źviera. Vyrabili skulpturu na zavodzie «Mahiloŭliftmaš» da 60-hadovaha jubileja Leninskaha rajona. Šmathadovym kiraŭnikom rajonnaj administracyi byŭ Uładzimir Cumaraŭ, zakładalnik tradycyi stavić u Mahilovie lvoŭ. Cumaraŭ kiraŭnikom haradskoj administracyi byŭ dzieviać hadoŭ. U kastryčniku 2022 hoda jaho adpravili ŭ adstaŭku.
Adkul pajšła moda na lvoŭ u horadzie
Moda na skulptury ź ilvami zachapiła Mahiloŭ z 2016 hoda. Tady na adnoŭlenym Jašynskim moście cieraz Dniapro pastavili čatyry bronzavyja žyvioliny na marmurovyja pastamienty.
Da hetaha harvykankam abviaščaŭ konkursy na pošuk brenda horada. Adznačałasia, što jon pavinien papularyzavać historyju i kulturu Mahilova, a taksama stymulavać raźvićcio tvorčaj i hramadskaj aktyŭnaści nasielnictva.
Jak vynikała, haradskomu hierbu z «Pahoniaju» šukałasia alternatyva albo jaho było zamała.
Kali ž ilvy zjavilisia na moście, to pra ich stali kazać jak pra asnoŭny haradski simvał.
Zajaŭlałasia, što aŭtar zadumy skulptur sa lvami — staršynia harvykankama Uładzimir Cumaraŭ, a ažyćciaviŭ čynoŭnickuju maru miascovy skulptar Andrej Vierabjoŭ. Na tabličcy z aŭtarstvam adrazu byŭ paznačany i Cumaraŭ, ale, jak vyjaviłasia, jon paśpiašaŭsia ŭviekaviečyć siabie, i paźniej jaho imia zašlifavali.
«Ilvinaja tema dla Mahilova nie takaja ŭžo i drennaja, choć niamała ludziej sumniavajecca, ci mahiloŭskaja jana, — kazaŭ u adnym ź intervju stvaralnik pieršych skulptur ilvoŭ Andrej Vierabjoŭ. — Zrešty, pomniki ź ilvami ŭžo stajać, i ciapier Mahiloŭ śmieła možna ličyć horadam ilvoŭ. Mahiloŭski leŭ — heta mif, i my jaho stvarajem, jak stvarali jaho da nas. Kožny z nas usprymaje jaho pa-svojmu i pieražyvaje pa-svojmu».
Sa źjaŭleńniem ilvoŭ most pazbaviŭsia savieckaj atrybutyki. Zamiest nakładak sa ściahami na aharodžy prymacavali haradskija hierby z mordami lvoŭ.
Kolki lvoŭ u Mahilovie
Niekatoryja mahiloŭcy kažuć, što skuptur ilvoŭ moža być da niekalkich dziasiatkaŭ.
Haradžanie zhadvajuć čatyry skulptury na Jašynskim moście.
Nie praminajuć simpatyčnaje lviania nasuprać ofisa apieratara MTS, što na vulicy Mironava. Hetu lvinuju skulpturu pastavili ŭ horadzie pieršaj u 2014 hodzie, i tady nichto nie moh ujavić, što ź jaje pačniecca vialikaja mahiloŭskaja epapieja z pomnikami lvam. Simpatyčnaje lviania z mabiłkaj naohuł nie padobna da svaich vialikich surodzičaŭ z roznych kutkoŭ horada.
Pablizu haścinicy «Mahiloŭ» staić darosły leŭ. Jaho hałava z hryvaj vysiečanaja z hranitu. Heta skulptura pavandravała. Spačatku joj znajšli miesca na ŭjeździe ŭ horad z boku Minska. Ale tam leŭ nie pryžyŭsia, i jaho schavali ŭ nizinku la hatela.
Mahiloŭcy nie zabylisia pra lva sa štučnaj travy, jakoha pastavili la miemaryjalnaj arki na minskaj šašy. Jaje nabyŭ «Mahiloŭzielanhas» u 2019 hodzie za 3 tysiačy rubloŭ.
Pasialili lvoŭ i ŭ Padmikolskim parku. Tam jany vyrablenyja z łazy i vyhlad u ich daloka nie źviaryny.
Niekatoryja surazmoŭcy źviarnuli ŭvahu, što vyjavy lvoŭ bačyli na skulptury, vystaŭlenaj na zamčyščy. Tam žyvioły palujuć pa stromkich schiłach Zamkavaj hary. Jaje ŭ horadzie nazyvajuć mahiłaju lva. Mahiloŭskaja lehienda pra miascovaha Robina Huda natchniła Janku Kupału na napisańnie paemy «Mahiła lva».
Svaje lvy jość u pracaŭnikoŭ zavoda «Liftmaš» i ŭ kamunalnikaŭ Zadniaproŭja.
Pomniki źviaram jość, znanym biełarusam — niama
Skulptury ź ilvami ŭ Mahilovie nie tolki staviać, ale i ekspartujuć. Adnu sa skulptur addali ŭ Kličaŭ. Heta byŭ padarunak rajcentru na Dažynki. Jaje spačatku pastavili la ŭvachodu ŭ haścinicu «Mahiloŭ», ale jana nie spadabałasia kiraŭnictvu i byŭ znojdzieny varyjant adpravić ilva ŭ hłybinku.
U 2021 hodzie mahiloŭskaja mastačka Aksana Jeŭdakimienka prydumała prajekt ź simpatyčnymi skulpturami lvoŭ. Ich niazvykła rasfarbavali jaje kalehi z Mahilova, Minska i Bresta. Vystava ź dziasiatkam niastrašnych źviaroŭ paru miesiacaŭ upryhožvała plac pierad ratušaj. A potym jany źnikli. Nadyšoŭ inšy čas ź inšymi charaktarami lvoŭ.
Darečy, u Mahilovie niama pomnika Janku Kupału, jaki pryśviaciŭ horadu tvor i im prasłaviŭ jaho. Vulica Kupały ź dziasiatkam pryvatnych damoŭ zacisnutaja šmatpaviarchovikami ŭ adnym sa spalnych rajonaŭ horada. Niama pomnikaŭ i inšym znanym biełaruskim tvorcam. Ilvam ža pastavili.
«Naša Niva» — bastyjon biełaruščyny
PADTRYMAĆHladzicie taksama:
U Minsku ŭstaloŭvajuć niezvyčajnuju skulpturu
Skulptura smažanki moža źjavicca ŭ Kiraŭsku. Tam sa smažankami tvorycca realna niešta niejmaviernaje
Kamientary