Svaim ukazam Alaksandr Łukašenka prysvoiŭ hanarovaje zvańnie «Narodny paet Biełarusi» 86-hadovamu Uładzimiru Karyznu, jaki najbolš viadomy jak aŭtar słoŭ da ciapierašniaha dziaržaŭnaha himna Biełarusi.
Uładzimir Karyzna naradziŭsia 25 maja 1938 hoda ŭ vioscy Zakružka Minskaha rajona.
U 1961 hodzie skončyŭ fiłałahičny fakultet Biełaruskaha dziaržaŭnaha ŭniviersiteta. Paśla zakančeńnia vykładaŭ biełaruskuju i ruskuju movy i litaraturu ŭ škole, paśla pracavaŭ redaktaram, zahadčykam adździeła biełaruskaj muzyki Respublikanskaha radyjo.
Z 1980 pa 1981 hod byŭ redaktaram adździeła navuki i mastactva litaraturnaha časopisa «Połymia», zatym staršym redaktaram, zahadčykam redakcyi litaratury dla daškolnikaŭ vydaviectva «Junactva» (1981—2001), z 2002 hoda — namieśnikam hałoŭnaha redaktara časopisa «Krynica».
Pieršyja vieršy byli apublikavanyja ŭ 1956 hodzie ŭ haziecie «Čyrvonaja źmiena». Paśla taho vydaŭ šmat paetyčnych zbornikaŭ, mnohija vieršy pakładzienyja na muzyku.
U 2002 hodzie jahony tekst, jaki byŭ tvorčaj pierapracoŭkaj tekstu himna BSSR aŭtarstva Michasia Klimkoviča, byŭ abrany dla dziaržaŭnaha himna Respubliki Biełaruś, pieramohšy ŭ vyniku praviedzienaha konkursu. Na samaj spravie praviadzieńnie taho konkursu vyklikała vialikija pytańni, bo najbolš ludskich hałasoŭ tady nabrała pieśnia «Krasuj, Biełaruś» aŭtarstva Leanida Prančaka i Vasila Rainčyka, ale čynoŭniki manipulatyŭna pryniali rašeńnie na karyść muzyki časoŭ BSSR Nieściera Sakałoŭskaha sa słovami Uładzimira Karyzny.
Arhumientam było toje, što na muzyku staroha himna na konkurs byli padadzienyja teksty troch aŭtaraŭ, i razam jany nabrali bolš hałasoŭ, čym «Krasuj, Biełaruś». Tamu, maŭlaŭ, narod vykazaŭsia za hetu muzyku. A siarod hetych troch najbolš hałasoŭ nabraŭ tekst Karyzny, tamu jon i pieramožca.
Paśla svajho prychodu da ŭłady Łukašenka amal nie prysvojvaŭ zvańni Narodny piśmieńnik Biełarusi i Narodny paet Biełarusi, u značnaj stupieni tamu, što ŭsie realna dastojnyja ŭhanaravańnia litaratary znachodzilisia ŭ apazicyi da jahonaj ułady. Tamu paśla śmierci 29 sakavika 2016 hoda Niła Hileviča žyvych nośbitaŭ hetych hanarovych zvańniaŭ nie zastałosia.
U apošnija hady, adnak, hetuju praktyku pierahledzieli i stali prysvojvać zvańni «narodnych» praŭładnym litarataram. U 2022 hodzie Narodnym piśmieńnikam Biełarusi staŭ šmathadovy kiraŭnik praŭładnaha Sajuza piśmieńnikaŭ Biełarusi Mikałaj Čarhiniec, a ciapier voś Narodnym paetam staŭ Uładzimir Karyzna. Apošni, u adroźnieńnie ad Čarhinca, prynamsi piša svaje tvory pa-biełarusku.
U minskaj škole imia praŭładnaha piśmieńnika Čarhinca adkryli muziej, pryśviečany Čarhincu. Pry jahonym žyćci
Upieršyniu zvańnie «narodnaha piśmieńnika Biełarusi» prysvoili ruskamoŭnamu litarataru
«Piensija ŭ piśmieńnika — jak u bamža». Mikałaj Čarhiniec vykazaŭsia pra samoha siabie, Aleksijevič i Šunieviča
Kamientary