Illa Mironaŭ: Mianie zatrymali za toje, što ja pišu skarhi

— Jak ličyš, za što ciabie nasamreč zatrymali?

— Za toje, što ja aktyŭna pišu skarhi. Ja skardziŭsia ŭ Ministerstva infarmacyi na praŭładny th-kanał «Žiołtyje ślivy». Ja padavaŭ zajavu ŭ Śledčy kamitet z prośbaj adkryć kryminalnuju spravu ŭ dačynieńni da adyjoznaha prapahandysta Ryhora Azaronka. Miarkuju, mnie vyrašyli dać 13 sutak u suviazi z majoj aktyŭnaj hramadskaj dziejnaściu.

— Jak adbyłosia tvajo zatrymańnie?

— 2 sakavika da mianie ŭ kvateru pryjšli dva siłaviki. Maci adkryła dźviery. Jany skazali, što chacieli b advieźci mianie ŭ Saviecki RAUS. Ja i maci pajechali ź imi. U Savieckim RAUSie mianie pačali raspytvać, čamu ja pišu ŭ internecie, što nie atrymaŭ kopiju pratakoła, kali ja atrymaŭ i raśpisaŭsia navat za heta. Ja adkazaŭ, što kopiju, nasamreč, nie atrymaŭ, choć i raśpisaŭsia za heta. Paśla mnie pakazali niejki dakumient ad HUBAZ ad 22 lutaha, dzie było napisana, što ŭ chodzie pravierki majoj staronki vyjaŭleny materyjał z łahatypam «Zierkała» i mnoha bieła-čyrvona-biełaj simvoliki.

I tam było prypisana jašče, što simvolika bečebe, pavodle mierkavańnia HUBAZ, pryraŭnoŭvajecca da artykuła 24,23 KaAP RB («Parušeńnie paradku arhanizacyi ci praviadzieńnia masavaha mierapryjemstva»).

Taksama mianie abvinavačvali, što ja staviŭ łajki pad materyjałami «Biełsata» i «Radyjo Svaboda». Na što ja im skazaŭ, što heta łuchta, bo artykułaŭ «Zierkała» ja nie raźmiaščaŭ i łajki nie staviŭ. Vinu ja svaju nie pryznaŭ. Pa vyniku ja da samaha viečara siadzieŭ u hetym kamiennym miašku. Uviečary taksama pryviali chłopcaŭ, jakich zatrymali za nibyta datyčnaść da «PVK Rodan».

— Raspaviadzi padrabiaźniej pra zatrymanych pa spravie «PVK Rodan».

— Pryviali 29 čałaviek. Ale jany kazali, što nie majuć nijakaha dačynieńnia da hetaha ruchu: chtości ź ich prosta ŭ bary pobač siadzieŭ, chtości kiedy pryjšoŭ nabyvać, chtości prosta išoŭ pobač. Usich małaletnich adpuścili, a ŭsich, chto starejšy za 17, zatrymali.

— Jak prajšli sutki ŭ IČU hetym razam?

— Tak, jak i raniej. Pieršyja sutki źmiaścili razam z ałkaholikami. Nas u dvuchmiesnaj kamiery było čaćviora. Pieradačy mnie maci nie zmahła pieradać. Joj navat skazali, što možna skardzicca na samy vyšejšy ŭzrovień, adnak pieradavać ničoha nie buduć. Kamiery byli poŭnyja. Jak zvyčajna ŭ kamierach byŭ skraźniak.

A ježa była jašče horš, čym letaś. Uziali, i kašu vielmi mocna razbavili vadoj, pryčym, jak my zrazumieli, vada navat nie hatavanaja była.

Kožny dzień nam źmianiali kamieru. I ŭsie, chto byŭ u hetyja dni ŭ IČU pa palitycy, siadzieli pavodle artykuła 19,11 č. 2 («Raspaŭsiudžvańnie infarmacyjnaj pradukcyi, uklučanaj u respublikanski śpis ekstremisckich materyjałaŭ»). A mienavita za padpiski na roznyja resursy za 2020-2021 hady.

— To-bok palityčnych u IČU vielmi šmat?

— Nie viedaju, na ŭzroŭni čutak heta ci nie, ale kali ja byŭ u Savieckim RAUSie, to krajem vucha pačuŭ, što za studzień-luty 72 spravy. To-bok palityčnych vielmi šmat. Ich było šmat i pry kancy 2022 hoda, i ciapier.

• 3
• 0
• 0
• 1
• 0
• 3
• 21
• 0