«Znoŭ budzie iluzija». U Pierachodnym kabiniecie prakamientavali źviestki pra ihnaravańnie Ukrainaj Cichanoŭskaj
Pradstaŭnik pa mižnarodnych spravach Abjadnanaha pierachodnaha kabinieta Valer Kavaleŭski prakamientavaŭ «Biełsatu» źviestki pra toje, što Ukraina błakuje ŭdzieł Śviatłany Cichanoŭskaj u sumiesnych ź jeŭrapiejcami mierapryjemstvach.
Pra taki ban napisała ŭčora «Naša Niva» sa spasyłkaj na nienazvanych jeŭrapiejskich dypłamataŭ.
Dypłamatyčnyja krynicy: Ukraina błakuje ŭdzieł Cichanoŭskaj i biełarusaŭ u sumiesnych dypłamatyčnych mierapryjemstvach
Hetuju publikacyju «Biełsatu» prakamientavaŭ pradstaŭnik pa mižnarodnych spravach Abjadnanaha pierachodnaha kabinieta Valer Kavaleŭski. Jon zajaviŭ, što scenar cyrymonii ŭ Varšavie sapraŭdy byŭ źmienieny.
«Kali my rychtavali vizit, to ŭ nas była infarmacyja pra toje, što jość apazicyja da pramovy Śviatłany Cichanoŭskaj, prysutnaści biełaruskaha ściaha i prysutnaści biełaruskaha vianka. Było vidavočna, što była źmiena scenara, jaki płanavaŭsia spačatku».
Kavaleŭski pry hetym nie ŭdakładniŭ, chto vystupiŭ suprać pramovy Cichanoŭskaj, ale adznačyŭ, što važny i taki farmat jaje ŭdziełu va ŭračystaściach.
«Było važna prysutničać u hetym miescy, jakoje tyčycca historyi Biełarusi, i tam prysutničała Śviatłana Cichanoŭskaja, Abjadnany pierachodny kabiniet, i tam było vielmi šmat biełarusaŭ, što było samaje kaštoŭnaje i važnaje. Važna, što na mierapryjemstvie byli biełaruskija ściahi, ich było bolej za ŭsich. Paśla biełaruski vianok pryniesła biełaruskaja dyjaspara. To-bok usio-tki praŭda znajšła sabie darohu», — skazaŭ dypłamat.
Valer Kavaleŭski paviedamiŭ, što paśla cyrymonii vykazaŭ ambasadaru Ukrainy ŭ Polščy pratest praz toje, što Uładzimir Zialenski nie zhadaŭ Biełaruś u zajavie, pryśviečanaj paŭstańniu Kalinoŭskaha.
«Ja źviarnuŭ uvahu na niedarečnaść taho, što adsutničała zhadvańnie biełarusaŭ — faktyčna asnoŭnaj siły ŭ hetym paŭstańni. Spadar ambasadar pryniaŭ hetuju infarmacyju, zaŭvahi jon nijak nie prakamientavaŭ. Jak prafiesijny dypłamat, jon hetuju infarmacyju daviadzie da Kijeva, da svajho MZS. Dyj hramadskaja reakcyja dosyć vyraznaja. Na hetym etapie heta bolš čym dastatkova i zaŭvažna dla ŭkrainskaha boku».
Pradstaŭnik Kabinieta taksama padkreśliŭ, što «niapamiatlivaść» Zialenskaha nijak nie paŭpłyvaje na padtrymku Ukrainy ŭ vajnie z Rasijaj, chacia i pierapisvać historyju takim čynam nielha ni ŭ jakim razie.
«My źviarnuli ŭvahu na hety epizod, ale hety epizod nie budzie vyznačać našyja adnosiny i tym bolš nie budzie vyznačać našuju padtrymku ŭkrainskaha naroda na hetym etapie, kali jany abaraniajuć svaju radzimu. My budziem ich padtrymlivać, bo jany zmahajucca za svaju i za našu svabodu», — zaŭvažyŭ surazmoŭca «Biełsata».
Što datyčyć niezaprašeńnia Cichanoŭskaj na sioletni samit Lublinskaha trochkutnika, to Biełaruś u hetaj inicyjatyvie nijak nie zafiksavanaja, tamu i ŭdzieł abranaj prezidentki nie musić być abaviazkovym. Zaprašeńnie Cichanoŭskaj na sustreču pazaletaś «było situacyjnym», skazaŭ Kavaleŭski.
«My padkreślivajem, što chočam udzielničać u hetaj inicyjatyvie, ale pakul da hetaha nie dajšło. Tamu ja b nie razhladaŭ adsutnaść zaprašeńnia sioleta jak niejkuju prykmietu asablivaha staŭleńnia da Śviatłany Cichanoŭskaj asabista ci da Biełarusi ŭvohule».
Pradstaŭnik Abjadnanaha pierachodnaha kabinieta taksama prakamientavaŭ publikacyi pra toje, što ŭłady Ukrainy tajemna viaduć pieramovy z aficyjnym Minskam, kab paźbiehnuć novaha ŭvarvańnia rasijskaj armii ź biełaruskaj terytoryi. Mienavita dziela hetaha, jak paviedamlałasia, Kijeŭ nibyta zabłakavaŭ novyja sankcyi suprać Biełarusi.
«My razumiejem, što Ukraina vielmi nie chacieła b stvaryć niejkich umoŭ, jakija mahli b spravakavać novaje ŭvarvańnie z terytoryi Biełarusi. Ale ž kali było pieršaje ŭvarvańnie, nijakaj pravakacyi nie treba było: prosta Pucin zachacieŭ heta zrabić, skazaŭ pra heta Łukašenku, toj jaho padtrymaŭ — i pačałasia vajna. Kali treba budzie zrabić heta druhi raz, znoŭ ža nie treba budzie nijakich pravakacyj, budzie dastatkova žadańnia Pucina, i Łukašenka nikoha nie spynić. Jość vialikaja niebiaśpieka, što znoŭ budzie padman, znoŭ budzie zdrada, znoŭ budzie iluzija, jakaja nie spraŭdzicca», — padsumavaŭ Valer Kavaleŭski.
«Budzie zdymać maštabnyja prajekty z saboj u hałoŭnaj roli». Što dumajuć pra novaha ministra kultury Čarnieckaha jaho kalehi?8
Kamientary