Jak padtrymać imunitet i zastrachavacca ad prastudy? Voś niekalki receptaŭ
Vosień tradycyjna prynosić z saboj rost reśpiratornych chvarob. Kab nie zalehčy doma z prastudaj, uzmacniajcie svoj imunitet i ješcie stravy, bahatyja na vitaminy. Prapanujem vam dva recepty, jakija cudoŭna padtrymajuć arhanizm vosieńniu.
Kažuć, što śviežyja i syryja pradukty — samyja karysnyja, ale jość adno vyklučeńnie, i heta — niekatoryja kansiervavanyja stravy. Časam ježa, što prajšła kansiervacyju, maje vialikuju charčovuju karyść za košt vitaminaŭ, minierałaŭ i prabijotykaŭ, piša onet.pl.
Prapanujem vam recepty vitaminnych kansiervavanych stravaŭ, jakija zdorava padmacujuć vaš imunitet.
Marynavanyja limony
Hetuju stravu lubiać u mižziemnamorskich krainach, asabliva ŭ Maroka. U marynavanych limonach šmat vitamina S, jaki dobra zapavolvaje praces stareńnia skury, palapšaje jaje strukturu i źniešni vyhlad, panižaje arteryjalny cisk i ŭzrovień chalesterynu. Narešcie, heta prosta cikavaja i aryhinalnaja zakuska.
Voś jak zhatavać marynavanyja limony:
- Aparcie limony (vy možacie ich brać stolki, kolki ličycie patrebnym).
- Razrežcie ŭsie limony na čatyry častki, ale nie całkam, a tak, kab čaćviarcinki schodzilisia la asnovy limona.
- Natrycie ŭnutranuju častku limona sollu bujnoha pamołu, a potym pakładzicie limony ŭ słoik tak, kab jany tam ščylna źmiaščalisia. Dadajcie łaŭrovy list, zubok časnaku i karycu. Utrambujcie limony, kab ź ich vydzialiŭsia sok, možna dla hetaha vykarystoŭvać kačałku. Kali sok nie pakryvaje limony całkam, dalicie dadatkovy limonny sok ci kipiačonuju vadu.
- Ščylna zakryjcie słoik i prybiarycie jaho ŭ prachałodnaje miesca. Praz tydzień limony možna jeści. Salonyja limony možna vykarystoŭvać jak samastojnuju zakusku, a možna narazać na kavałki i dadavać u lubyja niesałodkija stravy: u sałaty, stravy z bulby i harodniny — karaciej, usio, što pryjdzie ŭ hałavu.
Marynavanyja buraki
Takaja zakuska dapamahaje źnizić kryviany cisk i ŭzrovień chalesterynu ŭ kryvi, a taksama padtrymlivaje fizičnuju pracazdolnaść i navyk kancentracyi. Marynavanyja buraki mohuć stać dobrym harniram, taksama ich možna dadavać u supy. Recept marynavanych burakoŭ nastupny:
- Ačyścicie burak i narežcie na toŭstyja kubiki. Raskładzicie ich pa słoikach i zalicie vadoj, dadajcie časnok i sol.
- Zakryjcie słoiki, zamatajcie ich tkaninaj i pastaŭcie ŭ ciopłaje miesca.
- Pieramiešvajcie buraki raz na dzień draŭlanaj łyžkaj. Praz 5-7 dzion jany buduć hatovyja.
I jašče: vy vylivajecie rasoł z kansiervavanych praduktaŭ? Darma, bo tak vy pazbaŭlajecie siabie šmatlikich kaštoŭnych rečyvaŭ, jakija znachodziacca ŭ im, vitaminaŭ i minierałaŭ. Ale budźcie aściarožnyja, bo rasoł moža vyklikać dyskamfort u straŭniku, u dadatak, u im šmat soli, a jaje lišak škodzić zdaroŭju. Tamu picie rasoł, ale patrochu, pačynajcie niedzie z 50 mililitraŭ.
Kamientary