«Vyzvaleńnie časova zachoplenych terytoryj». Pačalisia vučeńni Uzbrojenych sił Biełarusi
Vučeńni praciahnucca da 14 vieraśnia i projduć na troch učastkach miascovaści.
Kamandna-štabnyja vučeńni, jak paviedamlaje Minabarony, pravodziacca ŭ adpaviednaści z płanam i pad kiraŭnictvam načalnika Hienštaba Uzbrojenych sił.
Hałoŭnaja meta — «navučańnie orhanaŭ vajennaha kiravańnia Uzbrojenych sił, inšych vojskaŭ i voinskich farmavańniaŭ Respubliki Biełaruś bieśpierapynnamu kiravańniu siłami i srodkami pry vykanańni zadač pa pryznačeńni».
Dla adpracoŭki praktyčnych dziejańniaŭ vojskaŭ (sił) zadziejničanyja: palihon «Brescki»; učastki miascovaści ŭ Minskaj i Viciebskaj abłaściach.
Minabarony paviedamlaje, što zaprošanyja dla ŭdziełu ŭ nazirańni za aktyŭnaj fazaj vučeńniaŭ pradstaŭniki vajenna-dypłamatyčnaha korpusa zamiežnych krain.
Vučeńni dazvolać na praktycy adpracavać nastupnyja pytańni:
— viadzieńnie bajavych (śpiecyjalnych) dziejańniaŭ pa vyzvaleńni terytoryi, časova zachoplenaj praciŭnikam;
— adnaŭleńnie kantrolu nad dziaržaŭnaj miažoj u zonach (pałosach) adkaznaści abjadnańniaŭ;
— avijacyjnaja padtrymka vojskaŭ;
— zabieśpiačeńnie siłavych mier vajennaha stanovišča, baraćba z dyviersijna-raźviedvalnymi hrupami praciŭnika i niezakonnymi vajennymi farmavańniami.
Zaniepakojenaść hetymi vučeńniami vykazali va Ukrainie. U Hienštabie USU 1 vieraśnia paviedamili, što asablivaściu vučeńnia źjaŭlajecca toje, što ŭpieršyniu adpracoŭvajecca pytańnie vyzvaleńnia časova akupavanych terytoryj, praviadzieńnia kontrnastupleńnia i vychad na dziaržaŭnuju miažu. Tam nie vyklučyli, što «pad tak zvanaj stračanaj terytoryjaj majucca na ŭvazie pamiežnyja rajony Vałynskaj, Rovienskaj i Žytomirskaj abłaściej».
Stali viadomyja pieršyja piać proźviščaŭ palitviaźniaŭ, vyzvalenych pa novym pamiłavańni5
Kamientary