Sacyjał-demakrat Uładzimir Sieviaryn i Kaciaryna Hibkaja atrymali pa 1,5 hady kałonii
Były mižnarodny sakratar Biełaruskaj sacyjał-demakratyčnaj partyi Uładzimir Sieviaryn atrymaŭ 1,5 hady kałonii ahulnaha režymu pa č. 2 art. 342 Kryminalnaha kodeksa. Pra heta paviedamili jahonyja adnapartyjcy. Razam ź im pa toj ža spravie sudzili Kaciarynu Hibkuju, jakaja atrymała toj ža termin.
Takoje rašeńnie siońnia, 14 maja 2022 hoda, vynies sud Leninskaha rajona horada Minska.
Pavodle infarmacyi pravaabaroncaŭ, siłaviki zatrymali Sieviaryna razam ź jahonaj dziaŭčynaj 21 kastryčnika 2021 hoda. Jaho spačatku viali pa kryminalnaj spravie ab teraryźmie, ale paśla abvinavačvańnie pierakvalifikavali na hrubaje parušeńnie paradku (artykuł 342 KK).
Viadoma, što dziaržabvinavačvańnie zaprošvała dla Sieviaryna dva hady kałonii, tamu tut akazaŭsia dastatkova redki dla ciapierašniaha biełaruskaha «pravasudździa» vypadak, kali sud daŭ mienš, čym prasiŭ prakuror.
Razam ź Sieviarynam sudzili i palitźniavolenuju Kaciarynu Hibkuju, aryštavanuju razam ź im. Sudździa Taćciana Šocik vyniesła joj tyja ž 1,5 hady pazbaŭleńnia voli ŭ kałonii ahulnaha režymu.
Kaciarynie i Uładzimiru nie buduć zaličanyja ŭ termin dni, jakija jany praviali ŭ SIZA KDB. Tamu ŭ termin adbytaha pakarańnia im zaličyli tolki dni z 16 śniežnia, kali ich pieraviali ŭ SIZA na Vaładarskaha. Takim čynam, chłopcu i dziaŭčynie zastałosia pravieści ŭ kałonii krychu bolš za 10 miesiacaŭ.
Kamientary