«Moj śviet źniščyła rasijskaja rakieta». Apovied baćki zahinułaha niemaŭlaci z Adesy
Juryj Hłodan vyjšaŭ z kvatery, dzie zastałasia jaho siamja, kab pajści ŭ kramu, i pačuŭ navinu ab vybuchu. La padjezda jon kryčaŭ na palicyju, kab jaho prapuścili da pałajučaha doma. Kali trapiŭ u kvateru, to znajšoŭ cieła svajoj žonki i jaje maci, zabitych rasijskaj rakietaj, jakaja trapiła ŭ nižnija pavierchi.
Paźniej znajšli cieła jaho trochmiesiačnaj dački Kiry. Jon ubačyŭ jaho ŭpieršyniu, kali viarnuŭsia ŭ kvateru ŭ niadzielu, piša «Bi-bi-si».
Śmierć troch pakaleńniaŭ adnoj siamji vyklikała šok i abureńnie va Ukrainie, užo zahartavanaj dvuma miesiacami vajny.
Kamientujučy rakietnyja ŭdary, prezident Uładzimir Zialenski byŭ vielmi zasmučany, kali kazaŭ pra zabojstva trochmiesiačnaj Kiry.
«Čym jana pahražała Rasii? Zdajecca, što zabojstva dziaciej — heta novaja nacyjanalnaja ideja Rasijskaj Fiederacyi», — skazaŭ Zialenski ŭ zvarocie da ŭkraincaŭ. Jon nazvaŭ tych, chto spłanavaŭ i ździejśniŭ napad, padonkami.
U vyniku rakietnaha ŭdaru zahinuli jašče piaciora čałaviek.
U niadzielu Juryj viarnuŭsia ŭ razburany dom, kab ubačyć, što možna vyratavać z kvatery. Fotaalbomy, kalekcyja cukrovych pakunačkaŭ žonki, rukapisnyja natatki. Kałyska jaho dziciaci była razarvanaja na kavałki.
«Kali ja pakinu rečy ŭ kvatery, jany stanuć śmiećciem, i ludzi jaho vykinuć, — skazaŭ jon BBC. — Ja chaču zachavać heta dla ŭspaminaŭ».
Jany z Valeryjaj byli razam dzieviać hadoŭ.
«Jana mahła znachodzić radaść va ŭsim. Adesa była jaje lubimym horadam. Jana pracavała ŭ PR i mahła kantaktavać z mnohimi ludźmi, razumieć ich. Ja zachaplaŭsia tym, jak dobra jana piša», — skazaŭ jon.
«Jana była vydatnaj mamaj, siabroŭkaj, z usimi najlepšymi jakaściami. Takuju, jak Valeryja, mnie niemahčyma budzie znajści. Jana była idealnaj. Takoha čałavieka možna sustreć tolki raz u žyćci, i heta padarunak ad boha», — dadaŭ jon.
Kira naradziłasia ŭ kancy studzienia, usiaho za miesiac da pačatku vajny.
Praź niekalki tydniaŭ paśla hetaha Valeryja napisała ŭ Instagram, što dasiahnuła «novaha ŭzroŭniu ščaścia» paśla naradžeńnia pieršaha dziciaci.
«Heta byli najlepšyja 40 tydniaŭ, — napisała jana pra svaju ciažarnaść. — Užo miesiac našaj dziaŭčyncy».
Juryj pakazaŭ na telefonie fatahrafii Kiry, jakija jamu dasłała žonka.
«My byli vielmi ščaślivyja, kali jana naradziłasia, — kaža jon. — Ja byŭ u radzilnym domie, kali jana naradziła. Mnie vielmi ciažka ciapier uśviedamlać, što majoj dački i žonki ŭžo niama. Uvieś moj śviet źniščyła rasijskaja rakieta».
Jon choča, kab śviet daviedaŭsia pra toje, što adbyłosia ź jaho siamjoj.
«Toje, što adbyvajecca — heta hora dla majoj siamji, dla našaha horada, dla Ukrainy, heta hora dla ŭsioj cyvilizacyi. Ja spadziajusia, što naša historyja dapamoža spynić hetuju vajnu», — skazaŭ Juryj.
Kali my sychodzim, jon daje nam niekalki padhuźnikaŭ u sumcy — adnu ź niamnohich rečaŭ, jakija jon moh uziać z kvatery.
«Kali łaska, vaźmicie ich, — kaža jon nam. — Addajcie na dabračynnaść. Mnie jany bolš nie patrebnyja».
U Baranavičach aryštavali siem byłych rabotnikaŭ zakrytaj niezaležnaj haziety «Inteks-Pres»1
Kamientary