«U fakcie masavaha hvałtu nad mirnym nasielnictvam z boku rasijskaj armii ničoha novaha niama». Vajenny ekśpiert pra pavodziny rasijskich sałdat

U intervju jutub-kanału «Papularnaja palityka» jon vykazaŭsia nakont złačynstvaŭ armii ŭ pryharadach Kijeva.

«Sam pa sabie fakt masavaha hvałtu nad mirnym nasielnictvam z boku savieckaj armii, z boku rasijskaj armii — ničoha ŭ hetym, na žal, novaha niama. Kali vy pahladzicie vajennyja złačynstvy savieckaj armii va Uschodniaj Prusii ŭ 1944-1945 hadach (darečy, i nie tolki tam, ale i ŭ Polščy, Čechasłavakii, Vienhryi), dyk tam možna znajści absalutna žachlivyja apisańni vidavočcaŭ, u tym liku dastatkova viadomych paśla ludziej u Savieckim Sajuzie, — kaža Fiodaraŭ. —

Toje samaje paśla prajaŭlałasia, choć i ŭ trochi inšych maštabach i formach, u Afhanistanie i ŭ Čačni. Toje ž samaje maradziorstva, toj ža samy hvałt nad mirnym nasielnictvam u absalutna sadysckich formach — usio heta było.

Usio heta śviedčyć pra hłybokuju raspusnaść nie tolki vajskovaj sistemy, ale rasijskaha hramadstva ŭ cełym, jakoje, za vyklučeńniem paraŭnalna nievialikaj častki, prosta nie choča viedać pra heta, zapluščvaje vočy, a to i, kryj Boža, maŭkliva ŭchvalaje heta.

Jość jaŭnyja śviedčańni siońniašniaj vajny, kali rasijskija sałdaty byli ŭziatyja ŭ pałon razam z zavušnicami, na jakich była kroŭ, to-bok ich vydzirali z vušej u žančyn, dziaŭčat. Heta nie prosta maradziorstva — heta sadyzm. I ja dumaju, što toje samaje budzie paŭtaracca i ŭ inšych vyzvalenych ukrainskich haradach, na žal».

Adkazvajučy na pytańnie ab roli aficeraŭ u situacyjach, padobnych da toj, što zdaryłasia ŭ Bučy, Fiodaraŭ kaža:

«Nakolki ja mahu sabie ŭjavić, aficery albo sami ŭdzielničajuć (takoje taksama moža być, prynamsi takoje było i ŭ Afhanistanie, i ŭ Čačni), albo zapluščvajuć na heta vočy, albo prosta nie mohuć heta spynić. Niekatoryja sami hruziać pralnyja mašyny na svaje BMP z razrabavanych damoŭ i kram».

Adychod rasijskaj armii ź niekatorych abłaściej Ukrainy, na dumku ekśpierta, śviedčyć pra pierahrupiroŭku vojskaŭ.

«Vojski z-pad Kijeva, z-pad Čarnihava iduć u Rasijskuju Fiederacyju, tam adbyvajecca pierafarmiravańnie patrapanych bataljonna-taktyčnych hrup, prybyvaje technika, i jany adpraŭlajucca na ŭschod Ukrainy, dla taho kab ruchacca pa linii ad Iziuma na poŭdzień u bok Papasnaj i Rubiežnaha.

Adtul taksama mahčymy nastup, asabliva kali, kryj Boža, budzie ŭziaty Maryupal, i tady tyja siły, jakija trymajuć Maryupal u abłozie, a heta dastatkova značnyja siły, jany buduć ruchacca na poŭnač praz Vałnavachu. Heta budzie sproba akružyć hrupiroŭku Uzbrojenych sił Ukrainy. I pa sutnaści paŭtaryć toje, što było ŭ 2015 hodzie ŭ Debalcava. I kali heta atrymajecca, a ŭ hetym u mianie jość surjoznyja sumnievy, tady buduć naviazvać Ukrainie tyja ŭmovy, jakija buduć dazvalać Pucinu pradstavić hetuju avanturu, jakuju jon narabiŭ, jak pieramohu».

Adkazvajučy na pytańnie ab najaŭnaści ŭ Rasii resursaŭ, na toje kab ažyćciavić taki płan, ekśpiert kaža, što hałoŭnaj prablemaj źjaŭlajecca nie niedachop techniki, choć i jon vidavočny, a niedachop padrychtavanych kadraŭ. Fiodaraŭ adznačaje, što na vajnu va Ukrainie było kinuta pryblizna dźvie traciny najaŭnaha bajazdolnaha składu. Astatniaja tracina — heta siły, jakija patrebnyja, kab padtrymlivać bałans na zachadzie z krainami NATA, i siły ŭ Centralnaj Azii.

«Što datyčycca techniki, rasijskaja armija ŭsio bolš nahadvaje paciomkinskuju viosku. Heta niečakana dla ŭsich naziralnikaŭ. Sapraŭdy ŭźnikaje nieabchodnaść u pracujučaj technicy.

Čamu technika biarecca z «vučebak»? Bo tam technika znachodzicca ŭ pracoŭnym stanie. A kali byli sproby raskansiervavać tanki, BMP, jakija znachodziacca ŭ rehularnych častkach, vyjaviłasia, što šmat pałamanaj techniki, raskradziena ŭsio, akumulataraŭ niama, navat ruchaviki papradavali kudyści.

Adnak sprava navat nie ŭ hetym. Nastup — heta vielmi składany vid bajavych dziejańniaŭ, jon patrabuje naładžanaha kamandavańnia, dobraha kiravańnia vojskami, łahistyki. I z hetym u rasijskaj armii vialikija składanaści».

Śviedčańniem hetych prablem ekśpiert nazyvaje toj fakt, što zahinułyja i paranienyja rasijskija hienierały byli vymušanyja asabista znachodzicca na pieradavoj i hnać sałdat u boj, bo siaredni aficerski skład nie vykonvaŭ naležnym čynam svaje abaviazki.

Cieły sa znakami katavańniaŭ, trupy na vulicach, brackija mahiły. Rasijskija vojski pakinuli na Kijeŭščynie strašnyja ślady

Piaskoŭ: Rasija kateharyčna adchilaje lubyja abvinavačvańni ŭ zabojstvach cyvilnych ludziej u Bučy

• 20
• 0
• 5
• 1
• 1
• 0
• 10
• 0