«Pravavy defołt pierajšoŭ u katastrofu». Pravaabaroncy padličyli kolkaść zatrymańniaŭ i kryminalnych spraŭ za maj

Na siońnia pravaabaroncam viadomy 1231 fihurant kryminalnych spraŭ palityčnaha charaktaru, pad śledstvam abo ŭžo asudžany (+128 u paraŭnańni z 1 maja). Hetaja ličba niapoŭnaja, bo pry takim maštabie vałanciory i ŚMI niazdolnyja daviedacca pra ŭsie imiony. 

Viadoma pra 689 źniavolenych pa kryminalnych spravach palityčnaha charaktaru (+136, było ich 553 pa stanie na 1 maja). 470 ź ich pravaabaroncy pa vynikach detalovaha vyvučeńnia spraŭ užo pryznali palitviaźniami (+109, pa stanie na 1 maja było 361).

Usiaho za maj pravabaroncy zafiksavali 332 palityčna matyvavanyja zatrymańni (u krasaviku takich było 304). Tut jość apisańnie samych hučnych zatrymańniaŭ, u tym liku žurnalistaŭ.

«Pravavy defołt pierajšoŭ u katastrofu», — kamientuje adzin ź biełaruskich pravaabaroncaŭ.

Takim čynam, ad času prezidenckich vybaraŭ z paviedamleńniaŭ MUS i śpisaŭ pravaabaroncaŭ viadoma pra nie mienš za 35 243 zatrymańni. Najbolš zatrymańniaŭ było 9-12 žniŭnia, a taksama ŭ kastryčniku i listapadzie, zatrymańni praciahvajucca dahetul. U lutym zatrymlivali nie mienš za 511 čałaviek, u sakaviku — 1139 čałaviek.

Usiaho było zarehistravana bolš za 3000 «złačynstvaŭ, źviazanych z arhanizacyjaj i praviadzieńniem niezakonnych masavych mierapryjemstvaŭ i akcyj pratestu», zajaviŭ namieśnik hienprakurora Hienadź Dysko. Raniej pra 2407 spraŭ «ekstremisckaj nakiravanaści», paviedamlaŭ 4 sakavika staršynia Śledčaha kamiteta Ivan Naskievič, jaki paźniej straciŭ svaju pasadu. Pad «ekstremisckaj nakiravanaściu» ciapier razumiejucca spravy palityčnaha charaktaru.

Siarod suśvietna viadomych biełaruskich palitviaźniaŭ — Maryja Kaleśnikava, paplečnica Śviatłany Cichanoŭskaj. Jana praz advakata raskazała, što jaje sprabavali siłaj vyvieźci za miažu, ale jana na pahraničnym šłahbaumie parvała pašpart. Razam ź Cichanoŭskaj jana naminavanaja na Nobieleŭskuju premiju miru za svaju rolu ŭ arhanizacyi mirnaha ruchu za svabodnyja vybary i hramadzianskija pravy.

Za kratami ŭžo amal hod zastajecca i muž Śviatłany Cichanoŭskaj, Siarhiej.

Užo amal hod u źniavoleńni zastajucca taksama takija apanienty Alaksandra Łukašenki, jak Mikałaj Statkievič i Pavieł Sieviaryniec.

Za kratami — i hramadzianka Šviejcaryi biełaruskaha pachodžańnia Śviatłana Chierše, vina jakoj u tym, što jana sarvała bałakłavu z amapaŭca, jaki zatrymlivaŭ mirnych demanstrantak.

Vializnaje abureńnie ŭ susiedniaj Polščy vyklikali aryšty dziejačaŭ intelihiencyi ź liku polskaj nacyjanalnaj mienšaści.

Za kratami znachodziacca jak minimum 28 žurnalistaŭ i supracoŭnikaŭ ŚMI, niekatoryja ź ich — łaŭreaty nacyjanalnych i mižnarodnych žurnalisckich premij. Spynili vychad praktyčna ŭsie niezaležnyja haziety, niezaležnych TB i radyjo ŭ krainie niama ad 1996 hoda. U mai byŭ zakryty samy papularny internet-partał krainy — Tut.by.

Ciažkija ŭdary naniesienyja pa akademičnaj svabodzie. Pa padlikach supolnaści «Sumlennyja ludzi», z univiersitetaŭ za palityku adličanyja jak minimum 246 studentaŭ, zvolnieny 31 vykładčyk. 12 studentaŭ i vykładčykaŭ ciapier sudziać pa kryminalnaj spravie za sprobu arhanizacyi zabastoŭki.

Usiaho pa dapamohu da fondaŭ salidarnaści źviarnulisia bolš za 3100 zvolnienych pa palityčnych matyvach. Heta tolki častka ad ahulnaj kolkaści zvolnienych.

• 0
• 0
• 0
• 0
• 0
• 0
• 0
• 0