«Zvalniajučy takich ikon, jak Mročak i Martaŭ, sistema paskaraje adjezd tych, chto jaho adkładvaŭ»: čysty adtok miedykaŭ tolki za studzień — 724 čałavieki
U Biełarusi publikujucca danyja ab čystym prytoku i adtoku rabočych roznych śfieraŭ. Paraŭnaŭšy jaho, možna ŭbačyć, jakija haliny ŭ zaniapadzie, a jakija rastuć. My vyvučyli hrafu «Achova zdaroŭja» jak adnu z fundamientalnych dla dziaržavy.
Realnaść sumnaja. Pa aficyjnych dadzienych, tolki za studzień 2021 hoda čysty adtok kadraŭ sa śfiery achovy zdaroŭja skłaŭ 724 čałavieki.
Kali zazirnuć jašče na sajt dziaržaŭnaj słužby zaniataści, to stanam na 10 sakavika tam 4335 vakansij doktara (+162 ź lutaha), 1736 vakansij sanitaraŭ i 2919 vakansij miedycynskich siostraŭ.
Adsačyŭšy dynamiku za apošnija niekalki hod, atrymlivajecca, što Biełaruś hublaje miedykaŭ na čystaj asnovie z 2016 hoda.
Da 2016-ha taksama byli hady z čystym adtokam, ale jany dzie-nidzie kampiensoŭvalisia hadami z čystym prytokam. A voś z 2016-ha jak prarvała.
Pakrysie, pakrysie, i ŭ 2019-m kraina straciła ŭžo bolš za 400 śpiecyjalistaŭ, u 2020-m kala taho, 2021 užo pabiŭ usie rekordy.
Z 2021 hodam usio zrazumieła. My ŭžo nieadnarazova apisvali maštaby ŭciokaŭ miedykaŭ.
Čytajcie taksama. Emihracyja miedykaŭ z RNPC ankałohii nabyvaje tryvožny maštab: «Zona kamfortu źniščana ludźmi ŭ čornym»
Čytajcie taksama. «Interny viaduć najciažejšych pacyjentaŭ»: vopytnyja daktary raźbiahajucca z RNPC dziciačaj ankałohii i hiematałohii, sačyć za paradkam dasłali śpiecsłužbista
Ale my pasprabavali zrazumieć, čamu 2019 staŭ pierałomnym, kali miedyki pačali biehčy rekordnymi tempami.
Paśla razmovaŭ sa śpiecyjalistami vymaloŭvajucca takija asnoŭnyja pryčyny:
— U 2019 Polšča i Hiermanija spraścili praceduru paćvierdžańnia miedycynskich dypłomaŭ krain, jakija nie ŭvachodziać u Jeŭrasajuz.
— Rekordnaja kolkaść abituryjentaŭ, jakija pastupali ŭ miedycynskija VNU u 2010 hodzie, akazalisia «svabodnymi» u 2019-m paśla zakančeńnia usich stadyj vučoby.
— U 2019 źmianiłasia sistema naličeńnia zarobkaŭ, premij i uliku pracoŭnaha času, u vyniku čaho mnohija stracili ŭ hrošach.
Pra heta nam skazali niekalki miedykaŭ, ź jakimi my pahavaryli.
Represavanyja vykładčyki BDMU dadajuć da pryčyn masavaha sychodu toj fakt, što zarobki miedykaŭ vyhladajuć mizernymi, i mnohija vypuskniki pačynajuć šukać lepšaj doli adrazu, jak heta stanovicca mahčymym.
Heta spraviadlivy arhumient. Varta zirnuć u aficyjnuju statystyku zarobkaŭ — pramysłovaść abhaniaje miedycynu na 20—30%. Pry tym što vielmi časta pramysłovaść — takaja ž datacyjnaja śfiera, jak i miedycyna.
Dachodzić da absurdaŭ: u lipieni 2020 hoda dyrektar Biełaruskaha mietałurhičnaha zavoda chvaliŭsia 1400 rublami siaredniaha zarobku na pradpryjemstvie. Jak potym stała viadoma, heta nie zaroblenyja, a całkam kredytnyja zarobki. U hety ž čas siaredni zarobak miedykaŭ pa krainie byŭ 1177 rubloŭ, navat z ulikam kavidnych vypłat.
Što z hetym usim rabić, rašuča nie zrazumieła. Niama nijakich prykmiet, što adtok miedykaŭ spynicca.
«Nahruzka pavialičvajecca, status padaje. Mnohich represavali, mnohija plunuć i źjeduć», — łakanična kažuć «Našaj Nivie» miedyki i dadajuć, što zvalniajučy takich ikon prafiesii, jak Martaŭ i Mročak, sistema padšturchoŭvaje da adjezdu tych, chto raniej adkładaŭ jaho.
Čytajcie taksama:
Doktar Martaŭ ź Viciebska vystupiŭ z žorstkaj krytykaj siłavikoŭ: Dzie reakcyja prakuratury, SK?
Doktar Martaŭ adkazaŭ Łukašenku: «Padača kisłarodu nie zaležyć ad taho, ci apazicyjanier zahadčyk adździaleńnia abo nie»
Zvolnieny dyrektar RNPC «Kardyjałohija» Mročak raspavioŭ, kudy ŭ aficyjnaj statystycy schavali śmierci ad kavidu
38-hadovaha vajskovaha lotčyka sudziać za abrazu Łukašenki2
Kamientary