Najlepšyja filmy «nie dla ŭsich» 2024 hoda. Što vy z hetaha hladzieli?

Mnohija vydatnyja kinastužki zastajucca pa-za ŭvahaj šyrokaj aŭdytoryi — ci to z-za abmiežavanaha biudžetu na rekłamu ci tamu, što zmahli trapić daloka nie va ŭsie kinateatry, abo ź inšych pryčyn. Kinakrytyk i žurnalist The Wall Street Journal Kajł Śmit sabraŭ dziesiać takich filmaŭ amierykanskaj vytvorčaści. Mnohija ź ich užo možna pahladzieć doma. Voś jany:

«Asleep in My Palm» (litaralna: «Jana śpić u majoj dałoni»)

Debiutny film scenarysta i režysiora Hienry Nelsana (Henry Nelson), dzie hałoŭnuju rolu vykonvaje jaho baćka — viadomy akcior druhoha płana Cim Błejk Nelsan. Film raspaviadaje pra Toma (u vykanańni Cima Nelsana) i Bet En (Chłoja Kiervin), biazdomnaha baćku i jaho dačku, jakija žyvuć kala kaledža ŭ sielskaj miascovaści Ahajo, sprabujučy pieražyć zimu.

Film daśleduje temy baćkoŭstva i sacyjalnaha kłasu, raskryvajučy prablemy, ź jakimi jany sutykajucca, i suviaź, jakuju jany padzialajuć. Jon taksama zakranaje patrebu dački ŭ niezaležnaści i pakazvaje jaje seksualnaje daśpiavańnie, u toj čas jak baćka sprabuje ŭciačy ad svajho hvałtoŭnaha i kanfliktnaha minułaha. Choć baćka — złodziej, jon akazvajecca vydatnym nastaŭnikam u praktyčnych pytańniach.

Film dastupny na «Prime Video».

«Perfect Days» («Idealnyja dni»)

Niahledziačy na naminacyju na «Oskar» u minułym hodzie, hety spakojny, ale zachaplalny film tolki z časam pačaŭ dachodzić da šyrokaha hledača. Vim Vienders (Wim Wenders) źniaŭ prostuju, elehantnuju, amal biassłoŭnuju kinastužku pra ścipłaha prybiralščyka (Kodžy Jakušo) u Tokia, jaki ŭmieje znachodzić asałodu ŭ samych zvyčajnych rečach.

Hladzieć hetaje kino — «jak trapić na dzen-sieminar, dzie navučajuć znachodzić radaść u fakcie isnavańnia», — ličyć Kajł Śmit.

Film dastupny na «Hulu».

«Coup de Chance» («Pašenciła!»)

Vudzi Alen źniaŭ svoj 50-y film u Paryžy dy pa-francuzsku, zychodziačy z taho, što nichto z bujnych amierykanskich dystrybjutaraŭ im nie zacikavicca. «I sapraŭdy, tak i zdaryłasia, a darma, — miarkuje Kajł Śmit. — Heta stylny tryler i najlepšaja praca režysiora za apošniaje dziesiacihodździe».

U centry ŭvahi — žonka bahataha mužčyny (Łu de Łaaž), jakaja stupaje na niebiaśpiečny šlach, zavioŭšy flirt z panurystym na vyhlad piśmieńnikam (Nils Šnedar) i sprabujučy chavać heta ad muža (Mielvil Pupo).

Film dastupny na DVD/Blu-ray.

«Daddio» («Tatka»)

90-chvilinnaja pajezdka na taksi z aeraporta imia Džona Kenedzi stanovicca miescam dla ščyraj dyjałohavaj dramaturhii pamiž maładoj damaj z vyšejšaha sacyjalnaha słoja (Dakota Džonsan) i jaje kiroŭcam, mudrym mužčynam starejšaha ŭzrostu (Šon Pen).

Kiroŭca pravakuje jaje na razvahi pra samaje intymnaje. Da kanca pajezdki abodva daviedajucca adno pra adnaho stolki, što stanovicca amal nievynosna ŭśviadomić: heta byŭ ich adziny sumiesny šlach u žyćci.

Scenar Chryści Choł (Christy Hall) poŭny daścipnych i niečakanych pavarotaŭ, jak i režysiorski padychod aŭtarki.

Dastupny na «Netflix».

«Memoir of a Snail» («Miemuary ślimaka»)

Aŭstralijski animatar Adam Elijat (Adam Elliot) napisaŭ scenar i źniaŭ hety dziŭny i miły film u farmacie stop-moŭšn, z rejtynham R z-za šerahu «darosłych» tem.

Hetaja sumnaja i adnačasova daścipnaja historyja raspaviadaje pra brata i siastru, čyje baćki pamirajuć zanadta rana. Dziaciej razłučajuć i adpraŭlajuć u roznyja pryjomnyja siemji ŭ roznych kutkach Aŭstralii, i jany marać, jak by znoŭ apynucca razam.

«Memoir of a Snail» — fantastyčnaja, piaščotnaja i ciopłaja karcina pra luboŭ u siamji i pra toje, jak ekscentryčnaść moža zrabicca formaj vyratavańnia.

Dastupna ŭ ramkach pasłuhi Video on Demand (VOD).

«Oddity» («Dziŭnaść»)

Irłandski režysior i scenaryst Demijan Makkarci (Damian McCarthy) stvaryŭ sapraŭdy napružany tryler pra žančynu, jakoj pahražaje niebiaśpieka, i jaje siastru-bliźniatku, jakaja maje ekstrasensornyja zdolnaści. Abiedźvie roli cudoŭna vykanała Keralin Breken.

Dziejańnie adbyvajecca ŭ adasoblenaj siadzibie, dzie, imavierna, byvajuć pryvidy.

«Heta film pra sutyknieńnie duchoŭnaści i navuki, žančyny i mužčyny, a finał vychodzić vuścišna daskanałym», — piša Śmit. Dastupny na DVD/Blu-ray i ŭ ramkach VOD.

«Back to Black» («Nazad da čornaha»)

«Hetaja bijahrafičnaja drama pra karotkaje žyćcio śpiavački retra-soŭłu Emi Uajnchaus — pravał z hledzišča kinakrytyki i kamiercyjnaha pośpiechu», — piša Śmit i dadaje: «Adnak stała sapraŭdnaj tvorčaj pieramohaj dziakujučy nievierahodnaj roli Marysy Abeły».

Jana ŭvasobiła pracoŭnaje dziaŭčo, jakoje pieraŭtvaryłasia ŭ pakutlivuju ikonu pačatku 2000-ch. Składanyja adnosiny Emi ź jaje mužam Błejkam Fiłderam-Siviłam (cudoŭna syhranym Džekam O'Konełam u vobrazie pryvabnaha «bandziuhana») — tolki adzin z mnostva aśpiektaŭ jaje žyćcia, atručanaha zaležnaściami.

Film Sem Tejłar-Džonsan nie sprabuje źvieści hetuju talenavituju, ale prablemnuju žančynu da roli achviary, a pakazvaje jaje supiarečlivy śviet z usimi adcieńniami.

Dastupny na «Prime Video».

«Piece by Piece» («Pa kavałačkach»)

«Puskać u kinateatrach hety šalony dakumientalny film — ryzykoŭny krok», — adznačaje Śmit i dadaje: «Ale raspovied pra žyćcio i tvorčaść Fareła Uiljamsa (Pharrell Williams), stvorany z dapamohaj animacyi z detalaŭ Lego, akazaŭsia čaroŭna pryvabnym ekśpierymientam».

Pryjemny vizualny styl arhanična spałučajecca z badziorym charaktaram samoha Fareła, jaki raspaviadaje pra svaju pracu nad takimi chitami, jak «Get Lucky» abo «Blurred Lines», a taksama pra svoj ułasny biestsieler «Happy».

Film dastupny na DVD/Blu-ray i ŭ ramkach VOD.

«September 5» («5 vieraśnia»)

Heta kamiernaja drama pra žurnalistaŭ, jakija apynulisia ŭ centry niečakanaha kryzisu, kali paleścinskija terarysty zachapili členaŭ izrailskaj alimpijskaj delehacyi padčas Alimpijskich hulniaŭ u Miunchienie 5 vieraśnia 1972 hoda.

My bačym, jak prezident ABC Sports Run Arledž (jaho spakoj i strymanaść vydatna pieradaje Piter Sarshard) paśpiešliva pierabudoŭvaje prahramu pieradač. Film prymušaje zadumacca nad šeraham składanych pytańniaŭ: nierašučaść dziaržaŭnych uładaŭ u spravie prymianieńnia siły, etyka žurnalisckaj pracy — usio heta na fonie hibieli ludziej u realnym časie.

Pakul što tolki ŭ kinateatrach.

«Slingshot» («Rahatka»)

Heta navukova-fantastyčnaja drama pra kanflikt pamiž tryma astranaŭtami (Kiejsi Eflek, Łoŭrens Fišbarn i Tamier Kapon), jakija pavinny vykanać składany manieŭr u kosmasie. Atmaśfiera filma nahadvaje «Zonu źmiarkańnia» (The Twilight Zone).

Režysior Mikael Chafstrom (Mikael Håfström) stvaryŭ efiekt pastajannaj niestabilnaści, kali hieroj Kiejsi Efleka ŭsio bolš błytajecca, imknučysia zrazumieć, što ž u realnaści adbyvajecca na borcie karabla.

Hetaja karcina dynamična pakazvaje, jak lohka źbicca z kursu navat vydatna abdumanaj kaśmičnaj apieracyi.

Dastupna na DVD/Blu-ray i ŭ ramkach VOD.

• 9
• 0
• 0
• 0
• 0
• 0
• 0
• 0