Blinkien acaniŭ dziejańni Bajdena va Ukrainie i raskazaŭ, što budzie z ukrainska-rasijskaj miažoj i jakija nieparazumieńni mieŭ ź Izrailem

— Vy pryniali dva rannija stratehičnyja rašeńni adnosna Ukrainy. Pieršaje, z-za strachu pierad pramym kanfliktam, zaklučałasia ŭ abmiežavańni vykarystańnia Ukrainaj amierykanskaj zbroi na terytoryi Rasii. Druhoje — padtrymać nastup Ukrainy biez paralelnaha dypłamatyčnaha treka, kab pasprabavać pakłaści kaniec kanfliktu. Jak vy zaraz aceńvajecie hetyja rašeńni?

— Pakolki my pradbačyli ŭźniknieńnie kanfliktu, nam udałosia zabiaśpiečyć hatoŭnaść nie tolki našaha boku, ale i sajuźnikaŭ dy partnioraŭ, a taksama samoj Ukrainy.

Jašče da pačatku rasijskaj ahresii, spačatku ŭ vieraśni 2021 hoda, a zatym u śniežni 2021 hoda, my biez šyrokaj ahałoski pastavili Ukrainie vialikuju kolkaść zbroi, kab upeŭnicca, što ŭ ich jość usio nieabchodnaje dla samaabarony. Siarod jaje [zienitna-rakietnyja kompleksy] Stinger i [pieranosnyja procitankavyja rakietnyja kompleksy] Javelin, jakija adyhrali važnuju rolu ŭ tym, kab nie dać Rasii zachapić Kijeŭ, zachapić krainu, ścierci jaje z tvaru ziamli i kab adkinuć ruskich nazad.

Ale, jak mnie padajecca, važna razumieć, što ŭ roznyja momanty času ludzi zasiarodžvajucca na tym ci inšym typie zbroi. Naprykład, tank «Abrams», ci F-16. I kožny raz nam treba hladzieć nie tolki na toje, što my pavinny dać ukraincam, ale i na toje, ci viedajuć jany, jak hetym karystacca? Ci zmohuć jany absłuhoŭvać hetuju techniku? Ci źjaŭlajecca heta častkaj paśladoŭnaha płana? Usie hetyja rečy ŭličvalisia pry pryniaćci nami rašeńniaŭ, što i kali im davać.

Što tyčycca dypłamatyi: my prykłali vyklučnyja dypłamatyčnyja namahańni, abjadnaŭšy i zachoŭvajučy padtrymku bolš čym 50 krain nie tolki ŭ Jeŭropie, ale i daloka za jaje miežami. Ja vielmi šmat pracavaŭ u pieradvajenny pieryjad, uklučajučy sustrečy z maim rasijskim kaleham Siarhiejem Łaŭrovym u Ženievie za niekalki miesiacaŭ da pačatku vajny, sprabujučy znajści šlach, kab ubačyć, ci zmožam my praduchilić jaje.

My sprabavali pravieryć dapuščeńnie, ci sapraŭdy heta źviazana z tryvohaj Rasii adnosna svajoj biaśpieki, z pahrozaj, jakaja pachodzić ad Ukrainy, ci z pahrozaj z boku NATA, abo heta źviazana z tym, čym nasamreč źjaŭlajecca situacyja — impierskimi ambicyjami Pucina i jaho imknieńniem adnavić «vialikuju Rasiju», viarnuŭšy Ukrainu pad kantrol Rasii. Ale nam treba było pravieryć heta dapuščeńnie. I my aktyŭna ŭzajemadziejničali z Rasijaj u dypłamatyčnym płanie.

Kali b źjaviłasia mahčymaść dypłamatyčnaha ŭzajemadziejańnia, jakoje mahło b skončyć vajnu na spraviadlivych i tryvałych umovach, my b pieršymi joju skarystalisia. Na žal, prynamsi na hety momant my nie bačym nijakich prykmiet taho, što Rasija sapraŭdy hatovaja da ŭzajemadziejańnia. Ja spadziajusia, što situacyja źmienicca.

— Ciapier prychodzić novaja administracyja, i ŭ jaje zusim inšy pohlad na kanflikt. U atačeńni abranaha prezidenta Trampa jość ludzi, jakija vielmi chočuć, kab Ukraina sastupiła terytoryju Rasii. Nie było nijakich paralelnych dypłamatyčnych šlachoŭ, i zbroja, vierahodna, budzie vyčerpvacca. Ci ličycie vy, što pakinuli Ukrainu ŭ najmacniejšaj pazicyi? Ci byli rečy, jakija vy (administracyja Bajdena — NN) mahli b zrabić pa-inšamu?

— Nu, pa-pieršaje, my zachavali Ukrainu, što nie było samo saboj zrazumieła, bo ambicyi Pucina zaklučalisia ŭ tym, kab ścierci jaje z tvaru ziamli. My spynili heta. Pucin zaznaŭ niaŭdaču. Ukraina trymajecca. I ja liču, što ŭ jaje jość vielizarny patencyjał nie tolki dla vyžyvańnia, ale i dla roskvitu ŭ budučyni. I heta zaležyć ad rašeńniaŭ, jakija prymie budučaja administracyja i mnohija inšyja krainy.

— Ci ličycie vy, što para skončyć vajnu?

— Hetyja rašeńni pavinny prymać sami ŭkraincy. Im daviadziecca vyrašać, jakoj budzie ich budučynia i jakim šlacham jany chočuć da jaje pryjści. Ja nie dumaju, što toje, dzie na karcie budzie praviedziena miaža, pryncypova źmienić situacyju.

— Vy majecie na ŭvazie, što terytoryi, jakija, na vašu dumku, kantraluje Rasija, treba budzie addać?

— Pytańnie nie ŭ addačy. Pytańnie ŭ tym, što ŭ bližejšaj budučyni hetaja miaža naŭrad ci značna zrušycca. Ukraina zaŭsiody budzie pretendavać na hetuju terytoryju. Pytańnie ŭ tym, ci znojdzie jana sposab pry padtrymcy inšych viarnuć stračanuju terytoryju?

Małaimavierna, što Pucin admovicca ad svaich ambicyj. Kali budzie zaklučana pieramirje, to, na dumku Pucina, jano, chutčej za ŭsio, daść jamu čas na adpačynak, pieraasnaščeńnie i paŭtornuju ataku ŭ niejki momant u budučyni. Tamu, kab luboje spynieńnie ahniu było sapraŭdy praciahłym, nadzvyčaj važna pierakanacca, što Ukraina vałodaje patencyjałam dla strymlivańnia dalejšaj ahresii.

I heta moža być dasiahnuta praz NATA, kali my nakirujem Ukrainu na šlach da členstva ŭ aljansie, abo praz harantyi biaśpieki — abaviazacielstvy z boku roznych krain, jakija daduć zrazumieć Rasii, što luby novy napad abierniecca dla jaje surjoznymi prablemami.

— Kali ja vas pravilna razumieju, vy kažacie, što budučynia Ukrainy bolš nie budzie zaležać ad jaje hałoŭnaha sajuźnika — ZŠA. Vy ličycie, što ciapier jana ŭ rukach Jeŭropy?

— Ja vielmi spadziajusia — nie mahu skazać, što čakaju, ale spadziajusia, — što Złučanyja Štaty zastanucca takim ža važnym sajuźnikam dla Ukrainy, jakim jany byli da hetaha času. Tamu što, paŭtarusia, havorka idzie nie tolki pra Ukrainu. Havorka nikoli nie išła tolki pra Ukrainu.

— Ja chaču zakranuć toje, što stała vyznačalnym kryzisam hetaj epochi — kanflikt u Hazie. Vy ličycie, što dziejańni Izraila adpaviadajuć praviłam viadzieńnia vajny?

— Kali havorka idzie pra toje, kab papiaredzić paŭtareńnie padziej 7 kastryčnika, ja dumaju, što my znachodzimsia ŭ dobraj pazicyi. (…) Izrail źniščyŭ vajskovyja mahčymaści CHAMAS. Jon likvidavaŭ kiraŭnictva, adkaznaje za padziei 7 kastryčnika.

— Navat były ministr abarony Izraila Moše Jaałon nazvaŭ toje, što adbyvajecca, vajennymi złačynstvami i etničnymi čystkami. Heta ŭnutranaja krytyka, a nie źniešniaja. Tamu, napeŭna, ja b paŭtaryła pytańnie i spytała vas: ci zachoŭvaje Izrail praviły viadzieńnia vajny ŭ Hazie?

— My, jak vy viedajecie, vyvučali i praciahvajem hłyboka vyvučać hetaje pytańnie. My apublikavali svaje ŭłasnyja spravazdačy z našymi acenkami. Kali havorka idzie pra dziejańni Izraila, jaho prava na samaabaronu i imknieńnie zrabić usio mahčymaje, kab 7 kastryčnika bolš nie paŭtaryłasia, my z samaha pačatku kazali, što važna nie tolki toje, što robić Izrail, ale i jak jon heta robić.

Padčas samaj pieršaj pajezdki ŭ Izrail praź piać dzion paśla 7 kastryčnika ja z majoj kamandaj pravioŭ dzieviać hadzin u štabie CACHAŁ u Tel-Avivie (šeść pavierchaŭ pad ziamloj), spračajučysia ź izrailskim uradam, uklučajučy premjer-ministra, u tym liku pra toje, jak zabiaśpiečyć humanitarnuju dapamohu dla paleścincaŭ u Hazie.

Hetaja sprečka była abumoŭlena tym, što ŭ Izraili paśla 7 kastryčnika było hramadstva, jakoje pieražyvała ciažkuju traŭmu. Heta nie byŭ tolki premjer-ministr abo asobnyja lidary Izraila. Heta było hramadstva ŭ cełym, jakoje nie chacieła, kab chacia b adzin paleściniec u Hazie atrymaŭ dapamohu. Ja spračaŭsia ź imi dzieviać hadzin.

Prezident Bajden pavinien byŭ pryjechać u Izrail praź niekalki dzion. I kali ja sutyknuŭsia z supracivam pa pytańni humanitarnaj dapamohi, to skazaŭ premjer-ministru: «Ja patelefanuju prezidentu i skažu jamu, kab jon nie pryjazdžaŭ, kali vy nie dazvolicie pačać pastupleńnie hetaj dapamohi».

Ja patelefanavaŭ prezidentu, kab pierakanacca, što jon padtrymlivaje hetuju pazicyju, i jon całkam pahadziŭsia. My dasiahnuli zhody nakont pačatku dapamohi (…). My ŭvieś hety čas sprabavali ŭličyć patreby ludziej, jakija apynulisia pad hetym žachlivym pierakryžavanym ahniom.

I my majem spravu z traŭmavanym paleścinskim nasielnictvam. (…) Ciapier Izrail dziejničaje va ŭnikalnaj situacyi, što nie vyzvalaje jaho ad adkaznaści.

— Ale ci vykanali jany hetyja abaviazacielstvy?

— Kali havaryć pra akazańnie humanitarnaj dapamohi, to byli pieryjady, kali my nie ličyli, što jany robiać dastatkova. Mienavita tamu niadaŭna my razam ź ministram abarony [Łojdam] Ościnam nastojliva patrabavali ad ich pryniaćcia mieraŭ, jakija zabiaśpiečyli b pastupleńnie bolšaj kolkaści dapamohi ludziam.

— Niedastatkovaja pastaŭka charčovaj dapamohi ličycca vajennym złačynstvam. Vy śćviardžajecie, što jany nasamreč nie chacieli davać navat charčovuju dapamohu?

— Jość vialikaja roźnica pamiž namieram i vynikam dziejańniaŭ, niezaležna ad taho, razhladajecca heta ź jurydyčnaha punktu hledžańnia ci pa inšym standarcie. Vyniki, jakija my nazirali, byli katastrafična niedastatkovymi. Havorka idzie pra vyniki ŭ zabieśpiačeńni ludziej nieabchodnaj dapamohaj. Taksama jak i ŭ pytańni abarony ludziej, ja liču, što miery byli niedastatkovymi.

(…) 

Pierš za ŭsio, my byli i zastajomsia pryncypova addanymi abaronie Izraila, i, na žal, jon sutykajecca z praciŭnikami i vorahami z usich bakoŭ. (…) Hetaja padtrymka žyćciova važnaja, kab u Izraila byŭ strymlivajučy faktar, kab jon moh abaraniacca. I, u svaju čarhu, heta aznačaje, što my nie sutykniomsia ź jašče bolš šyrokim kanfliktam, jaki pryviadzie da bolšaj kolkaści achviar i razburalnych nastupstvaŭ. Tamu tak važna padtrymlivać hetuju dapamohu.

Pa-druhoje, my praciahvajem vieryć, što najbolš chutki i efiektyŭny šlach da tryvałaha zaviaršeńnia kanfliktu ŭ Hazie — heta pahadnieńnie ab spynieńni ahniu, jakoje dazvolić viarnuć zakładnikaŭ.

• 5
• 4
• 1
• 6
• 1
• 0
• 0
• 0