Viciebskamu prahramistu dali 2,5 hoda pazbaŭleńnia voli za hvałt u dačynieńni da supracoŭnika milicyi
«Viciebskaja viasna»
Prahramistu Alaksandru Kirylenku prysudzili 3 śniežnia dva z pałovaj hady pazbaŭleńnia voli ŭ kałonii ahulnaha režymu, paviedamlaje spring96.org.
Sudździa Kastryčnickaha rajona Viciebsku Ina Hraboŭskaja pryznała jaho vinavatym va ŭčynieńni hvałtu nad supracoŭnikam orhanaŭ unutranych spraŭ (art. 364 KK). Prakurorka prasiła dla Kirylenki 3 hady źniavoleńnia.
Pavodle abvinavačańnia, jak piša «Viciebskaja viasna», 6 vieraśnia padčas vuličnaha šeścia Alaksandr Kirylenka pieraškodziŭ dziejnaści milicyjanta patrulna-pastavoj słužby — starejšaha praparščyka Juryja Valejčanki. Dziaržaŭny prakuror abvinavaciŭ Kirylenku ŭ tym, što z pomsty za vykanańnie Valejčankam słužbovych abaviazkaŭ toj nanios jamu nie mienš za dva traŭmujučyja ŭździejańni ŭ vobłaść hałavy i pravaj ruki, vybiŭšy ź jaje humavy dručok. Tym samym ździejśniŭ złačynstva, praduhledžanaje art. 364 KK, a mienavita — hvałt u dačynieńni da supracoŭnika MUS, supraćdziejańnie zakonnaj dziejnaści, prymus da źmieny charaktaru hetaj dziejnaści i pomsta za vykanańnie słužbovaj dziejnaści.
Alaksandr Kirylenka pryznaŭ siabie vinavatym častkova, zajaviŭšy, što nie mieŭ matyvu pomścić supracoŭniku MUS za vykanańnie jahonaj dziejnaści pa achovie pravaparadku.
Incydent adbyŭsia kala domu №43 na vulicy Praŭdy ŭ Viciebsku 6 vieraśnia. Adna z udzielnic pratesnaha maršu sarvała miedycynskuju masku z tvaru praparščyka Valejčanki, toj sprabavaŭ jaje zatrymać, ale za žančynu ŭstupiŭsia Alaksandr Kirylenka, jon adpichnuŭ milicyjanta. Žančyna prachodzić pa spravie ŭ jakaści śviedki, ale na pieršaje pasiadžeńnie nie źjaviłasia.
Maci Kirylenki, apytanaja ŭ jakaści śviedki, zaśviedčyła, što jaje syn dobrazyčlivy, spakojny čałaviek, z abvostranym pačućciom spraviadlivaści. Jon uvieś čas addaje prahramavańniu i zachaplajecca rovarnymi prahułkami. 6 vieraśnia jaho zatrymali z rovaram.
Pryvatnaje pradpryjemstva, dzie pracuje padsudny, acharaktaryzavała Alaksandra Kirylenku jak «klučavoha vysakakłasnaha śpiecyjalista, adkaznaha, dobrazyčlivaha i niekanfliktnaha».
«Telefanujcie dzieciam, prasicie viarnucca ŭ Biełaruś». Biełarusy na miažy sutyknulisia z novaj pravierkaj26
Kamientary