Z balnicy źnik źbity 12 žniŭnia padletak, jakoha SK nazvaŭ udzielnikam masavych biesparadkaŭ
8 vieraśnia z balnicy źnik 16-hadovy Cimur Mickievič, paviedamlaje pošukava-vyratavalny atrad «Anioł».
Chłopiec znachodziŭsia ŭ 2-j haradskoj dziciačaj kliničnaj balnicy (vuł. Naračanskaja, d. 17), adkul 8 vieraśnia kala 14.00 syšoŭ u nieviadomym kirunku i źnik. Da hetaha času pra jaho miescaznachodžańnie ničoha nie viadoma.
13 žniŭnia Cimur trapiŭ u reanimacyju 3-j dziciačaj balnicy Mienska. Jaho dastavili ŭ balnicu z RUUS z čerapna-mazhavoj traŭmaj, strasieńniem mozhu, adkrytym pierałomam skuła-arbitalnaha kompleksu, sutarhavym sindromam, paraarbitalnaj hiematomaj sprava, množnymi ŭdarami miakkich tkanak i kaniečnaściaŭ, traŭmatyčnymi erozijami rahavicy abodvuch vačej. Chłopiec u balnicy znachodziŭsia niejki čas u miedykamientoznaj komie.
3 vieraśnia padletka zatrymali i advieźli na dopyt u ramkach art. 293 KK (Masavyja biesparadki). Śledčyja zajavili, što padletak aktyŭna ŭdzielničaŭ u masavych biesparadkach i datyčny da ŭzbrojenaha napadu na kiroŭcu hruzavoha aŭtamabila MAZ. Pa słovach śledčych, małady čałaviek jość na zapisach kamier videanazirańnia na vulicy Prytyckaha 10 žniŭnia, dzie prachodzili akcyi pratestu.
Jak paviedamili TUT.BY u siamji padletka, 3 vieraśnia ŭ SK maładomu čałavieku stała drenna — jaho adpravili ŭ balnicu. Niejki čas jon pravioŭ u reanimacyi, a ŭ dzień źniknieńnia jaho pieraviali ŭ zvyčajnuju pałatu. Vypisvać jaho na toj momant jašče nie źbiralisia, raspaviali blizkija chłopca. Pa źviestkach svajakoŭ, na kamierach videazapisu vidać, što Cimur sustreŭsia ŭ balnicy ź dziaŭčynaj u biełym płaščy, akularach i ź miadźviedziem u rukach. Miedyki i mama chłopca napisali zajavu ŭ milicyju ab jaho źniknieńni.
Minčanka pakinuła stanoŭčy vodhuk na sumku — i raptam vykryła zdradu čužoha muža16
Kamientary