Zvolnieny supracoŭnik pasolstva Biełarusi ŭ Indyi, jaki pryjšoŭ na akcyju pratestu: Nie škaduju pra zroblenaje
Andreju Misiuru 30 hadoŭ, ad 2017 hoda jon pracavaŭ u statusie treciaha sakratara pasolstva Biełarusi ŭ Indyi.
«Ja pačaŭ pracu ŭ MZS u 2015 hodzie, da hetaha ja skončyŭ Maskoŭski dziaržaŭny instytut mižnarodnych adnosin (MHIMO). Tudy ja byŭ nakiravany pa tak zvanym «prezidenckim nabory», to-bok uśviedamlaŭ, što budu pracavać u našym Ministerstvie zamiežnych spraŭ», — kaža Andrej Misiura.
Pavodle profilu, Andrej Misiura — uschodaznaŭca, jahonyja pracoŭnyja movy — anhlijskaja i japonskaja. Ad pačatku pracy ŭ MZS jon staŭ kurataram mienavita Indyi, a ŭ 2017 hodzie byŭ nakiravany tudy na pracu. Misija Andreja Misiury pavinna była skončycca ŭ listapadzie, ale ŭ Biełaruś jon viarnuŭsia raniej.
Spadar Misiura kaža, što nie moža ŭ padrabiaznaściach raskazvać pra akaličnaści zvalnieńnia, bo niekatoraja źviestki mohuć razhladacca jak «słužbovaja infarmacyja».
Ale viadoma, što jon padtrymaŭ mirnuju akcyju suprać hvałtu, što adbyvałasia ŭ Deli.
«U piersanalnym statusie ja padtrymaŭ hetuju akcyju. Heta była nie palityčnaja akcyja, a mirnaja akcyja suprać hvałtu. Vielmi karotki čas ja na joj prysutničaŭ. Mnie jak dypłamatu taksama važna było zaśviedčyć, što heta była vyklučna mirnaja akcyja. Heta nie padtrymka kandydata A i nie ahitacyja suprać kandydata B. Ja byŭ śviedkam, chaj i nie pry vykanańni, mirnaj akcyi», — havoryć užo były dypłamat.
Jakaja mienavita była reakcyja supracoŭnikaŭ pasolstva i MZS, Andrej Misiura ličyć za lepšaje nie havaryć. A voś zvyčajnyja ludzi, jakim dypłamat dapamahaŭ z evakuacyjaj ź Indyi padčas karanavirusa i stychijnych biedstvaŭ, nakiroŭvali na adras pasolstva i MZS šmat słovaŭ padtrymki. Praŭda, heta nie dapamahło.
«Ja liču, što nie parušaŭ nijakich punktaŭ zakanadaŭstva, ale ŭsio moža być kvalifikavana pa-inšamu. Ničoha z hetym rabić nie płanuju, ja padziakavaŭ kadravaj kamisii za toj čas, kali ja byŭ supracoŭnikam MZS», — havoryć Misiura. Z pracy jon byŭ zvolnieny 24 žniŭnia. Litaralna za dzień da hetaha jon prylacieŭ u Minsk z Deli.
«Ja adčuvaŭ padtrymku siabroŭ jak ź biełaruskaha, tak i ź indyjskaha boku. Zusim nie škaduju pra zroblenaje. Ja rady, što byŭ častkaj biełaruskaj dypłamatyčnaj słužby, i rady, što sychodžu mienavita ciapier», — adznačaje eks-dypłamat.
Piersanalnaj razmovy ź ministram Makiejem u jaho nie było. Što tyčycca płanaŭ ab dalejšym pracaŭładkavańni, to havaryć pra heta jašče ciažka. «Nie da kanca zrazumieła, što ciapier adbyvajecca ŭ krainie, mianie tut nie było try hady».
Kamientary