SBU: Siarod najomnikaŭ PVK «Vahniera» ŭ Sudanie jość dvoje biełarusaŭ

Ukrainskaja śpiecsłužba praanalizavała bolš za tysiaču pašpartoŭ «vahneraŭcaŭ», jakija prylatali ŭ afrykanskija krainy i śćviardžaje, što pieravažnaja bolšaść dakumientaŭ była aformlenaja centralizavana ŭ Maskvie (UFMS 770001) — tam, dzie i pašparty «Piatrova» i «Bašyrava», abvinavačanych u atručvańni Skrypaloŭ. Pavodle kiraŭnika SBU Vasila Hrycaka, heta naŭprost ukazvaje na suviaź PVK Vahnera z Hałoŭnym upraŭleńniem Hienštabu Uzbrojenych siłaŭ Rasiei (raniej — HRU). Pry hetym u niekalkich sotniaŭ najmitaŭ numary pašpartoŭ adroźnivajucca vyklučna apošnimi ličbami.

Pavialičyć

Viedamstva taksama apryludniła śpis sa 149 asobaŭ, jakija ŭ pačatku 2019 hoda brali ŭdzieł u zadušeńni antyŭradavych demakratyčnych pratestaŭ u Sudanie. Pieršaj pra heta paviedamiła brytanskaja hazieta The Times, ale śpikier rasiejskaha MZS Maryja Zacharava źniapraŭdziła heta. Jana zajaviła, što pryvatnyja rasiejskija instruktary zajmajucca tam tolki padrychtoŭkaj miascovych siłavikoŭ.

Raniej, 25 studzienia, SBU taksama paviedamlała, što «vahneraŭcaŭ» dastaŭlali ŭ Sudan na samalotach Minabarony. Pavodle damovy ad 30 lipienia minułaha hoda z TAA «M-Inviest», jakuju ŚMI źviazvajuć ź mierkavanym ułaśnikam PVK Vahnera Jaŭhienam Pryhožynym, «223 lotny atrad» Minabarony ździejśniŭ vosiem rejsaŭ z Maskvy ŭ Chartum praź siryjskuju avijabazu Chmejmim.

Biełaruskija «vahneraŭcy»: z Danbasu ŭ Afryku

Siarod udzielnikaŭ «kamandzirovak» tajemnaha padraździaleńnia ŭ Sudan, pavodle SBU, jość nie tolki rasiejcy i žychary akupavanych Rasiejaj terytoryjaŭ, ale i hramadzianie Biełarusi. Heta 38-hadovy Alaksiej Biarhovin rodam z Horak i 29-hadovy aršaniec Alaksandr Stupnicki.

Imia Stupnickaha ŭžo fihuravała ŭ papiaredniaj spravazdačy SBU, apublikavanaj minułym letam, siarod 11 biełarusaŭ, jakija vajavali na Danbasie ŭ składzie PVK Vahnera. Nieŭzabavie belsat.eu daviedaŭsia, što Stupnicki z žonkaj žyli ŭ Voršy apošnija niekalki hadoŭ, tut u ich naradziłasia dzicia. Nijakich prablemaŭ ź biełaruskimi pravaachoŭnikami pa viartańni z Danbasu ŭ eks-bajevika nie ŭźnikła. Akramia taho, u kastryčniku 2016 hoda Stupnickamu vydali novy pašpart u adździele ŭnutranych spravaŭ pa miescy prapiski. Krynica belsat.eu śćviardžała: na toj momant jon užo paśpieŭ pavajavać i ŭ Siryi, atrymaŭ bajavoje ranieńnie i dziaržaŭnuju ŭznaharodu RF.

U lipieni 2018-ha (adnačasova z vychadam pieršaj spravazdačy SBU) Stupnickija pakinuli Biełaruś. Z analizu akaŭntu jahonaj žonki ŭ sacsietkach vynikaje, što siamja adpačyvała ŭ Krymie, a potym znachodziłasia ŭ Daniecku. Tady svajaki Stupnickaha skazali nam: «Dzieci prosta pajechali pahulać pa Rasiei», udzieł Alaksandra ŭ bajavych dziejańniach jany kateharyčna admaŭlali. Admietna, što maci Stupnickaha Darja pracuje ŭ Departamiencie achovy MUS — heta nam paćvierdzili jejnyja kalehi i siabry.

«Jak vy ŭžo nadakučyli… Adkul vy ŭsio heta biarecie? Što vy vydumlajecie? Vy śmierci majoj čakajecie ci što?!Pakińcie nas u spakoi», — skazała Maryja Stupnickaja, rodnaja ciotka bajevika.

Samoha Alaksandra ŭ sacyjalnych sietkach ciapier niama, vyjści ź im na suviaź pakul nie atrymałasia.

«Sakretnaja misija» u Krasnadarskim krai

Alaksiej Biarhovin naradziŭsia ŭ Horkach Mahiloŭskaj vobłaści, da vajny žyŭ u Miensku. Viadoma, što ŭ minułym jon — kadravy aficer biełaruskaha śpiecnazu, słužyŭ u vajskovaj častcy 3214. Paźniej zvolniŭsia i zajmaŭsia biźniesam jak indyvidualny pradprymalnik. Darečy, kampanija dahetul nie likvidavanaja.

Alaksiej Biarhovin, fota z sajtu «Miratvorac».

Z krasavika 2015 hoda vajavaŭ na Danbasie ŭ składzie 5-j bataljonna-taktyčnaj hrupy «Respublikanskaj hvardyi» DNR, mieŭ roznyja śpiecyjalnaści — ad kulamiotčyka da instruktara. Naprykancy 2016 hoda Biarhovin atrymaŭ dypłom ab druhoj vyšejšaj adukacyi — jon zavočna navučaŭsia ŭ Biełaruskaj sielskahaspadarčaj akademii, pryjazdžajučy na siesii prosta z frontu.

Čym bajavik zajmaŭsia apošnija dva hady — da novaj spravazdačy SBU nie było viadoma. Usie staronki ŭ sacsietkach jon vydaliŭ. My źviazalisia z baćkam Biarhovina Uładzimiram.

— Ja nie viedaju, dzie jon znachodzicca ciapier, ničoha nie kaža.

— Źjaviłasia infarmacyja, što jon palacieŭ u Sudan. Vy viedali pra heta?

— Nie, jon usio chavaje.

— Kali syn apošni raz vychodziŭ z vami na suviaź?

— Sam jon nie vychodzić uvohule, niešta daviedvajusia praź jahonych siabroŭ. Viedaju, što jon niedzie ŭ Rasiei, u Krasnadarskim krai. Ja tak zrazumieŭ, u jaho tam niejkaja sakretnaja misija.

Mienavita niepadalok ad chutaru Molkina ŭ Krasnadarskim krai, pavodle šmatlikich śviedčańniaŭ ŚMI, i raźmiaščajecca treniravalnaja baza PVK Vahnera. Baćka «vahneraŭca» taksama raspavioŭ, što apošnim razam jon bačyŭ syna ŭ Biełarusi «prykładnna miesiac tamu». Vierahodna, Biarhovin prajšoŭ padrychtoŭku na bazie i zajechaŭ dadomu pierad vyletam u Sudan.

Alaksiej Biarhovin, fota z sajtu «Miratvorac».

Pry hetym Biarhovin-starejšy ŭzhadvaje: 22 lutaha 2018 hoda da jaho ŭ chatu pryjšli z vobšukam supracoŭniki KDB.

«Niejki artykuł Łukašenka prydumaŭ, užo nie pamiataju. Nie najmictva, niešta inšaje było ŭ pratakole… Ale mnie heta ŭsio kaštavała mikrainsultu».

Kali vieryć jahonym słovam, atrymlivajecca, što Biarhovin spakojna naviedvaŭ Biełaruś paśla vizitu KDB, paśla čaho bieź pieraškodaŭ dałučyŭsia da šerahaŭ najmitaŭ u Sudanie.

***

U listapadzie krynicy Bloomberg śćviardžali: «vahneraŭcy» pracujuć u 10 afrykanskich krainach — akramia Sudanu i CAR, heta taksama Livija, Zimbabvie, Anhoła i inšyja krainy. Pavodle dadzienych ahienctva, u abmien na prava na zdabyču karysnych vykapniaŭ jany achoŭvajuć vysokapastaŭlenych čynoŭnikaŭ, rychtujuć vajennych, a taksama dapamahajuć z arhanizacyjaj pieradvybarčych kampanijaŭ. U Sudanie zołata zdabyvaje Meroe Gold — padraździaleńnie źviazanaj ź biźniesoŭcam Jaŭhienam Pryhožynym kampanii «M-Inviest».

• 1
• 0
• 0
• 0
• 0
• 0
• 0
• 0