Apošni hieroj

Alaksandr Barazienka — apošni z abvinavačanych pa spravie 14‑ci junakoŭ i dziaŭčat, što ŭziali ŭdzieł u manifestacyi za źmienu ekanamičnaj palityki ŭ studzieni. Chłopcu pahražaje turemnaje źniavoleńnie. Ad 27 kastryčnika Alaksandr znachodzicca ŭ śledčym izalatary.

17:09 Jak adjazdžaŭ aŭtazak, znoŭ uźnikła patasoŭka. Milicyjanty rabili śpieckalidor, u hety momant začapili Andreja Kima, za jakoha ŭstupiłasia jahonaja maci.

16:33 Žančyny nadavali kuchtaloŭ lideru brsmaŭcaŭ z BDTU, što pryvioŭ bryhadu svaich maładzionaŭ u sud.

«Ratujcie, ratujcie, milicyja, — lamantuje jon, — źbivajuć».

* * *

16:30 Maci Alaksandra Barazienki spadarynia Alena kaža, što spadziajecca na spraviadlivy prysud, prynamsi štraf, choć nadziei na heta niašmat. "Tady treba apraŭdvać inšych aktyvistaŭ", - rezonna zaŭvažaje jana.

Moj syn ni ŭ čym nie vinavaty

Pa listach adčuvajecca, kaža sp. Alena, što Alaksandr trymajecca vielmi dobra, žartuje ŭ listach. Jon napisaŭ, što źmianiŭ try kamiery. Žartuje, što nijak nie moža pryvyknuć da sukamiernikaŭ. "Z adnymi zžyŭsia, u inšuju kamieru pieravodziać".

"Ale piša, što mianie nie złomiš, jak by jany nie staralisia", - kaža Alena Barazienka.

Sam Alaksandr Barazienka navat žartavaŭ na sudzie.

***

16:26 Źjaviłasia dyrektarka ŭniviersamu "Centralny" Valancina Vojnach. Jana kaža, što vyručka štodnia roznaja, ale 10 studzienia naviednikaŭ było mała.

Abvieščany pierapynak da zaŭtra. Praciah a 9:30.

Kali Barazienku vyvodzili z zały suda, jaho vitali apładysmientami

16:05 Udzielniki akcyi salidarnaści z Barazienkam zapuścili kala dziesiatka fiejervierkaŭ pobač z budynkam sudu.

15:49 Dapytali śviedak. Abvieščany pierapynak na 5-7 chvilin.

15:38 Padbiarozkin kaža, što manifiestanty mieli antydziaržaŭnuju simvoliku i raściažku, što łajalisia matam. Barazienku ŭ tvar nie paznaŭ, napeŭna, adzinaha ź fihurantaŭ spravy.

15:31 Idzie dopyt jašče adnaho śviedki -- namieśnika načalnika DAI Mienska Padbiarozkina.

15:26 Pačaŭsia dopyt śviedki - Alaksandra Subača. Pakul nichto nie skazaŭ, što bačyŭ Barazienku.

15:22 Aleś Barazienka pabačyŭ u aknie bieł-čyrvona-bieły ściah. Zadavolena ŭśmichajecca.

15:17 Daje pakazańni DAIšnik Harkun. Pad voknami suda pačałasia akcyja padtrymki Alaksandra. Ludzi ź bieł-čyrvona-biełymi ściahami hukajuć "Svabodu" dy "Žyvie Biełaruś!". U zale suda heta dobra čuvać.

15:12 Daŭ pakazańni inśpiektar DAI Šaścierykoŭ.

14:52 Inśpiektar DAI Dzieravianka amal na ŭsie pytańni adkazvaje, što ničoha nie pamiataje.

14:46 Daje pakazańni IPšnik Minič, jaki apynuŭsia 10 studzienia ŭ zatory.

14:35 Daje pakazańni dyrektarka kramy «Łasunak», što la HUMu, Filipienkava. Kaža, što vyručka 10 studzienia była mienšaja, čym zvyčajna, ale jana sama mitynhu - i naturalna, šeścia - nie bačyła.

14:28 Alaksandr Barazienka svajoj viny nie pryznaŭ, jon admoviŭsia davać pakazańni. Pačaŭsia dopyt śviedkaŭ.

14:22 Barazienku nie vypuścili z kletki. Alaksandr paprasiŭ vydalić z zały suda «dvuch niezrazumiełych hopnikaŭ» - adchilena.

14:14 Zajaŭlena dva chadajnictvy. Pieršaje, kab Alaksandr znachodziŭsia nie ŭ kletcy, a pobač sa svaim advakatam Paŭłam Sapiełkam, druhoje - ab źmienie miery strymańnia pad padpisku ab niavyjeździe. Abodva adchileny.

Krychu raniej sudździa paprasiła usim fotakoram pakinuć zału suda. Usie i pavychodzili.

14:08 Praces pačaŭsia, zajavilisia 6 śviedkaŭ, prakuror - Cichaviec, sudździa - Natalla Vajciachovič.

* * *

14:04 Zahadzia ŭ zału suda - tut, darečy, sudzili Andreja Kima - praviali hrupu studentaŭ adnaho sa staličnych VNU, jakija zaniali bolš za pałovu zali. Maci Alaksandra sprabuje apielavać da ich.

Šmat ludziej nie moža trapić u zału praz hetych padniavolnych studentaŭ.

* * *

14:00 Pryjšli palityki Vincuk Viačorka, Viktar Ivaškievič, (abodva - partyja BNF), Viačasłaŭ Siŭčyk, palitołah Aleś Łahviniec, pradprymalnickija lidery Aleś Makajeŭ, Ihar Lednik, moładzievy lider Jaŭhien Afnahiel.

Krychu paźniej padciahnulisia lider niezarehistravanaha Ruchu «Za Svabodu» Alaksandr Milinkievič ź Inaj Kulej dy lider Abjadnanaj hramadzianskaj partyi Anatol Labiedźka.

Sam Alaksandr Barazienka znachodzicca ŭ turemnaj kletcy. Trymajecca jon upeŭniena.

Źmicier Pankaviec

• 0
• 0
• 0
• 0
• 0
• 0