Dzianis Rabianok z Kalinkavič: Heta ja patrabavaŭ raspačać spravu na Ału Broń z Regnum'a

Dzianis Rabianok miesiac tamu źviarnuŭsia ŭ prakuraturu z nahody publikacyj na «Rehnumie» aŭtara Ały Broń. U artykułach jon ubačyŭ prykmiety raspalvańnia nacyjanalnaj varožaści. Dzianisu admovili, a praź miesiac vyśvietliłasia, što Ała Broń — heta brastaŭčanin Dźmitryj Alimkin. Sprava zaviedzienaja ŭ dačynieńni da jaho i na inšaha aŭtara taho ž sajta, Juryja Paŭłaŭca. Zatrymany sabkora «Rehnuma» Siarhiej Šyptenka. Viadziecca śledstva.

«Ja pisaŭ zajavu hienprakuroru, kab raspačali kryminalnuju spravu suprać Ały Broń. Ja nie viedaŭ, što heta mužčyna, jaki žyvie ŭ Biełarusi. Druhim punktam ja paznačyŭ, kab jany napisali zapyt u Ministerstva infarmacyi, kab zabłakavali hety «Rehnum». Mnie dasłali adkaz, što kryminalnuju spravu raspačynać admaŭlajucca. Ale źviernucca da Ministerstva infarmacyi», — kamientuje dla Jeŭraradyjo demakratyčny aktyvist z Kalinkavič Dzianis Rabianok.

Jeŭraradyjo: A paśla my daviedvajemsia, što sprava zaviedzienaja…

Dzianis Rabianok: Na dobry ład, spravu musili zavieści adrazu. Kali tam adkryta pišuć, što biełarusy heta nie nacyja. Ale ž u nas rašeńni prymajuć ludzi, jakich my nie viedajem. Mabyć, hetaja kryminalnaja sprava raspačataja pa inšych matyvach, moža, jana źviazanaja z Kramlom, z płatami za haz. U nas miechanizmy pryniaćcia takich rašeńniaŭ zakrytyja.

Jeŭraradyjo: Zatrymany jašče adzin aŭtar «Rehnuma». Jak vy ličycie, ci adekvatnaja heta miera — aryšt?

Dzianis Rabianok: Ja dvuma rukami za toje, što raspačali spravu. A aryšt — heta zusim nie abaviazkova. U nas sistema praźmierna karnaja. Chaj by da suda siadzieli doma, ale pakarańnie jany musiać panieści.

Jeŭraradyjo: Kali ich spravy abjadnajuć, to jany pojduć jak hrupa pa zmovie, i tam ad 5 da 12 hadoŭ pazbaŭleńnia voli. Vy za jakoje pakarańnie?

Dzianis Rabianok: Jany pavinny siadzieć za kratami. Heta nie dziciačyja hulni. Pad udaram isnavańnie Biełarusi jak niezaležnaj dziaržavy.

Jeŭraradyjo: Ale resurs, dzie jany pisali nie zabłakavany?

Dzianis Rabianok: Tam jašče horšyja artykuły pačali źjaŭlacca. Nie viedaju, jak ludzi, hramadzianie Biełarusi, tak nienavidziać svaju dziaržavu. Kali tabie tak nie padabajecca, dyk biary rečy i jedź na Sachalin, prastory ŭ Rasii chapaje.

* * *

Aktyvistu Ruchu «Za svabodu» i Abjadnanaj hramadzianskaj partyi Dzianisu Rabianku 34 hady, jon žyvie ŭ Kalinkavičach, skončyŭ biełaruskuju fiłałohiju Mazyrskaha dziaržaŭnaha pieduniviersiteta.

• 0
• 0
• 0
• 0
• 0
• 0