Rasijskija ŚMI masava pišuć pra «dyviersantaŭ u Krymie». Adciahvajuć uvahu ad pravałaŭ u Siryi?

Dyviersanty, jakija płanavali ździejśnić terakty ŭ Krymie, mieli namier padarvać trasu Simfieropal — Jałta padčas pieramiaščeńnia kartežaŭ kiraŭnictva respubliki i fiederalnych uładaŭ, śćviardžajuć krynicy aficyjnaj «Rośsijskoj haziety».

TASS

Pra toje, što Hałoŭnaje ŭpraŭleńnie raźviedki Minabarony Ukrainy mieła namier ździejśnić terakty na paŭvostravie, FSB paviedamiła raniej u sieradu. Pavodle źviestak rasijskaj śpiecsłužby, u vyniku praviadzieńnia śpiecapieracyi ŭ noč na 7 žniŭnia ŭ Armiansku zahinuŭ supracoŭnik FSB, u noč na 8 žniŭnia zahinuŭ vajskoviec Ministerstva abarony Rasii. Tady, jak śćviardžaje FSB, śpiecpadraździaleńni Ministerstva abarony Ukrainy zrabili «dźvie sproby praryvu dyviersijna-terarystyčnych hrup».

«Kamiersant» sa spasyłkaj na krynicy paviedamlaje, što zahinuły akazaŭsia kamandziram roty HRU, jaki ciapier pachavany ŭ Simfieropali.

«Rośsijskaja hazieta» sa spasyłkaj na krynicy piša, što apieracyja 7 žniŭnia pačałasia paśla taho, jak žychary Armianska paviedamili FSB ab «padazronych ludziach u vajskovaj formie». «Kamiersant» piša, što na niekalki dzion była abmiežavanaja praca KPP praź miažu. U Armiansku, Džankoi, Krasnapierakopsku na vulicach źjavilisia ŭzbrojenyja rasijskija vajennyja i bronietechnika, nieba patrulavali viertaloty. Žychary paviedamlali i ab masavych adklučeńniach internetu na terytoryi paŭnočnaha Kryma.

«Rośsijskaja hazieta» piša, što pa pryjeździe na miesca ŭ noč na 7 žniŭnia siłaviki vyjavili prykładna 20 čałaviek, jakija hruzili z tajemnaha schovišča vybuchoŭku i zbroju. Vydańnie śćviardžaje, što, ubačyŭšy supracoŭnikaŭ FSB, hrupa adrazu adkryła ahoń na paražeńnie, u chodzie śpiecapieracyi «adkaz ahniom jak minimum adzin dyviersant byŭ źniščany i niekalki paraniena». FSB padkreślivała, što tady siłaviki vyjavili 20 samarobnych vybuchovych pryład mahutnaściu bolš za 40 kh u traciłavym ekvivalencie, bojeprypasy, supraćpiachotnyja i mahnitnyja miny i hranaty.

Krynicy vydańnia raspaviali i pra maršrut praniknieńnia dyviersijna-terarystyčnych hrup 8 žniŭnia. Hazieta piša, što jany sprabavali prajści praz voziera Sivaš, jakoje častkova pierasychaje letam, pryčym «ukrainskija BTR navat zachodzili ŭ vadu Sivaša, kab prykryć ahniom svaich dyviersantaŭ». Krynica «Interfaksa» u pravaachoŭnych orhanach zajaviła, što kolkaść hrupy składała 15 čałaviek.

Vidavočcy ŭ hutarcy z «Kommiersantom» raspaviali, što ŭ noč na 8 žniŭnia «byli dobra čutnyja» aŭtamatnyja čerhi na punkcie propusku «Armiansk». Pavodle dadzienych vydańnia, supracoŭniki pamiežnaj słužby vyklučyli śviatło na KPP i zahadali ŭsim ludziam zastavacca ŭ aŭtamabilach. Na nastupny dzień pamiežnik zajaviŭ, što punkt propusku zakryty.

Pavodle infarmacyi krynicy «Kommiersanta» ŭ pravaachoŭnych orhanach, padčas apieracyi było paraniena dziesiać rasijskich vajskoŭcaŭ. Aficyjnaha paćvierdžańnia infarmacyi niama. Pry hetym niekalki dyviersantaŭ zmahli schavacca na terytoryi Kryma, ciapier praciahvajecca ich pošuk, śćviardžajuć surazmoŭcy vydańnia.

FSB paviedamiła, što padčas apieracyj byli zatrymanyja ludzi, jakija akazali sadziejničańnie ŭ padrychtoŭcy teraktaŭ. Siarod ich byli hramadzianie Rasii i Ukrainy, u tym liku supracoŭnik vyviedvalnaha kiravańnia Jaŭhien Panoŭ. Jon daje pryznalnyja pakazańni. «Interfaks» sa spasyłkaj na krynicu paviedamiŭ ab troch zatrymanych, krynica «RIAN» paviedamiła pra siem zatrymanych. Adnak vyviedka Minabarony Ukrainy abvierhła infarmacyju pra zatrymańnie svaich supracoŭnikaŭ, pieradaje «RIAN».

Upraŭleńnie FSB pa Krymie i Sievastopali raspačało kryminalnuju spravu pa fakcie zdareńnia. Rasija ŭzmacniła pamiežny režym z Ukrainaj, na terytoryi Krymu ŭviedzienyja dadatkovyja miery biaśpieki.

Ministerstva abarony Ukrainy admaŭlaje dačynieńnie da padrychtoŭki teraktu na paŭvostravie. Hetaja infarmacyja źjaŭlajecca fejkavaj, zajaviŭ pradstaŭnik hałoŭnaha ŭpraŭleńnia raźviedki Minabarony Ukrainy ŭ razmovie z Reuters. Daradca kiraŭnika SBU Juryj Tandyt padkreśliŭ, što Ukraina nie sprabuje viarnuć Krym z dapamohaj siły.

Vice-śpikier Dziaržaŭnaj rady Kryma Remzi Iljasaŭ zajaviŭ, što praniknieńnie dyviersantaŭ na terytoryju paŭvostrava možna rasceńvać jak abjaŭleńnie vajny. Prezident Rasii Uładzimir Pucin abvinavaciŭ ukrainskija ŭłady ŭ pierachodzie da teroru.

«Z rasijskaha boku jość straty, zabita dvoje vajskoŭcaŭ. My, biezumoŭna, mima takich rečaŭ prachodzić nie budziem. Chacieŭ by źviarnucca da našych amierykanskich i jeŭrapiejskich partnioraŭ. Dumaju, dla ŭsich vidavočna, što siońniašnija kijeŭskija ŭłady nie šukajuć sposabu vyrašeńnia prablem na pieramovach, a pierachodziać da teroru. Heta vielmi tryvožnaja reč», — skazaŭ jon.

U svaju čarhu prezident Ukrainy Piatro Parašenka zajaviŭ, što abvinavačvańni rasijskim bokam Ukrainy ŭ teraryźmie — heta fantazii i nahoda dla čarhovych vajennych pahroz u adras Ukrainy.

«Mienavita Rasija ŭžo daŭno ščodra finansuje i aktyŭna padtrymlivaje teraryzm na terytoryi Ukrainy, padniaŭšy jaho da ŭzroŭniu svajoj dziaržaŭnaj palityki — i ŭ akupavanych rajonach Danbasa, i ŭ anieksavanym Krymie, u styli 30-ch hadoŭ minułaha stahodździa. Rasii nie ŭdasca svaimi pravakacyjnymi zajavami dyskredytavać Ukrainu ŭ vačach mižnarodnaj supolnaści i damahčysia admieny zasłužanych sankcyj, uviedzienych z boku našych partnioraŭ», — zajaviŭ Parašenka.

Skaardynavanaja chvala publikacyj pra ŭkrainskich dyviersantaŭ u rasijskich ŚMI supała z adstupleńniem rasijska-siryjskich siłaŭ u Alepa, dzie paŭstancy prarvali błakadu horada.

• 0
• 0
• 0
• 0
• 0
• 0