Z 1 studzienia dapamoha pa biespracoŭi ŭstanoŭlena ŭ pamiery 40 rubloŭ. Adpaviednaja pastanova ŭrada Biełarusi 4 studzienia apublikavanaja na Nacyjanalnym pravavym internet-partale.
U pastanovie vyznačajecca, što z 1 studzienia 2025 hoda štomiesiačnaja fiksavanaja dapamoha pa biespracoŭi ŭstanaŭlivajecca ŭ sumie 40 rubloŭ.
Pra namier uvieści fiksavany pamier dapamohi pa biespracoŭi ŭłady zajaŭlali ŭ vieraśni 2024 hoda. U 2024 hodzie jaje pamier składaŭ maksimum dźvie bazavyja vieličyni, heta značyć 80 rubloŭ. Ale niekatorym katehoryjam hramadzian, naprykład tym, jakija vychoŭvajuć dziaciej, była praduhledžanaja nadbaŭka ŭ pamiery 10%.
Ciapier ža stali bolš strohimi i ŭmovy atrymańnia dapamohi. Ciapier na jaje zmohuć pretendavać tolki tyja biespracoŭnyja, jakija zarehistravalisia ŭ orhanie zaniataści na praciahu miesiaca z dnia zvalnieńnia i pry ŭmovie, što da sychodu z pracy jany byli pracaŭładkavanyja na praciahu piaci hadoŭ (raniej było dastatkova dvanaccaci miesiacaŭ), zvolnienyja z apošniaha miesca pracy tolki pa stroha vyznačanym pieraliku padstaŭ abo pracavali pa hramadzianska-pravavych dahavorach z vypłataj uznosaŭ u Fond sacyjalnaj abarony nasielnictva.
Kali raniej ahulny termin vypłaty dapamohi składaŭ 26 tydniaŭ, to ciapier — nie bolš za 13 kalandarnych tydniaŭ z dnia rehistracyi biespracoŭnym, a na terytoryjach z napružanaj situacyjaj na rynku pracy abo biespracoŭnym za 5 hadoŭ da dasiahnieńnia ahulnaŭstanoŭlenaha piensijnaha ŭzrostu — 26 tydniaŭ. Maksimalny pieryjad znachodžańnia na ŭliku ŭ słužbie zaniataści skaracili z 18 da 12 miesiacaŭ.
Ułady ličać, što takija miery dazvolać vyklučyć «utrymanskija nastroi».
Pavodle źviestak Minpracy i sacabarony, pa stanie na 1 kastryčnika 2024 hoda na ŭliku ŭ jakaści biespracoŭnych znachodziłasia 3,9 tysiačy čałaviek.
Chto taja prafsajuznaja aktyvistka z MAZa, jakaja paprasiła Łukašenku razabracca ŭ jutubie z «biehłymi»?5
Kamientary