Masavaje šeście z pachodniami ŭ Lvovie: dzieci, staryja, vieterany ATA FOTA
Marš na honar Ściapana Bandery prajšoŭ praz uvieś stary horad.
1 studzienia u Lvovie prajšoŭ tradycyjny patryjatyčny marš ad budynku abłasnoj rady ŭ centry da pomniku Bandery amal kala čyhunačnaha vakzału. Udzieł u šeści ŭziali niekalki tysiač čałaviek, u tym liku vieterany ATA dy histaryčnyja rekanstruktary ŭ strojach «Siečavych stralcoŭ».
Arhanizataram vystupiła abjadnańnie «Svoboda» dy jaje padstruktury. Naprykancy la pomnika Bandery prajšoŭ nievialički mitynh dy ŭskładańnie viankoŭ.
Masavyja šeści pamiaci Bandery prajšli ŭčora taksama ŭ Adesie i Kijevie.
1 studzienia ŭkrainskija nacyjanalisty adznačajuć dzień naradžeńnia Ściapana Bandery — pravadyra Arhanizacyi ŭkrainskich nacyjanalistaŭ (AUN) u 1930—50-ja hady. Jaho postać pa-raniejšamu mocna padzialaje hramadstva. Nacyjanalnyja siły jaho šanujuć, a kamunisty i prarasijskija — nienavidziać.
Padzielenyja ŭ jaho acency i historyki. Z adnaho boku, jon uznačaliŭ uzbrojenuju baraćbu za niezaležnaść Ukrainy spačatku suprać palakaŭ, paśla proci nacystaŭ i savietaŭ. Z druhoha boku, jahonaja arhanizacyja vykarystoŭvała terarystyčnyja mietady. U vajnie suprać palakaŭ AUN raspaŭsiudziła teror na mirnaje nasielnictva. Niekatory pieryjad AUN supracoŭničała ź niamieckimi nacystami. Urešcie, praŭda, niemcy adpravili kiraŭnikoŭ AUN, u tym liku Banderu, u kancłahier, kali tyja pasprabavali abviaścić Ukrainu niezaležnaj.
Banderu ŭdałosia zrabić ukrainski niezaležnicki ruch masavym i papularnym.
Banderu zabiŭ ahient savieckaha KHB, jaki paśla raskajaŭsia i pierabieh na Zachad.
Prezident Juščanka nadaŭ Banderu zvańnie Hieroja Ukrainy. Janukovič hety ŭkaz admianiŭ.
U Dzień Bandery nacyjanalistyčnaje abjadnańnie «Svaboda» razam ź inšymi pravymi partyjami i supołkami arhanizoŭvajuć mitynhi i šeści ŭ roznych haradach Ukrainy. U šeści z pachodniami — pa-ŭkrainsku smołoskipy — u Kijevie sioleta ŭziało ŭdzieł da piaci tysiač čałaviek.
Ukrainskija nacyjanalisty ŭšanoŭvajuć čyrvona-čorny ściah AUN pobač ź dziaržaŭnym, žoŭta-błakitnym.
Pravanacyjanalistyčnyja partyi ciapier nabirajuć istotny pracent hałasoŭ nie tolki na zachadzie — kałyscy AUN, ale i ŭ centry krainy.
Kamientary