"Maładaja była ŭ čornym", "Apošniaje metro"
Z retraspektyvy Fransua Trufo.
Z retraspektyvy Fransua Trufo.
12 kastryčnika 2007, piatnica
MAŁADAJA BYŁA Ŭ ČORNYM (La Mariée était en noir)
Francyja – Italija, 1967, kalarovy, 107 chv.
Režyser: Fransua Trufo
Roli vykonvajuć: Žana Maro, Mišel Bukie, Žan-Kłod Bryali, Šarl Dener, Mišel Łandal, Daniel Bułanže
Žanr: Trymcieńnik pavodle scenaru Žana-Łui Ryšara j Fransua Trufo i ramanu Ŭiljama Ajryša
Pryzy: Naminacyja na “Załaty hlobus” za najlepšy zamiežny film, naminacyja na premiju Edhara Ałana Po (Fransua Trufo i Žan-Łui Ryšar)
Adznaka: 9,5 (z 10)
Maładaja (Žanna Maro) aŭdavieła adrazu paśla viančańnia. Nieviadomyja zastrelili jejnaha muža na carkoŭnym hanku. Depresija mahła zavieršycca samazabojstvam, ale hierainiu vyratavali. I ciapier sprava jejnaha žyćcia – pomsta. Krok za krokam, razvažliva – jana zabivaje kožnaha ź piaci vinavatych. I ništo nia moža jaje spynić…
Zadoŭha da Ŭmy Turman, jakaja z asałodaju adpomściła Biłu, była Žanna Maro – strymanaja, pačućciovaja – francuski abraz niezaležnaha eŭrapiejskaha kino. Kryminalnaja karcina Trufo prasiaknutaja piaščotaj, liryzmam – i vizualnaj vykštałconaściu.
Lacić u pavietry fata, mścivica apranaje kaścium palaŭničaj-Dyjany, vyhinajecca čorny rot, niazdolny na spoviedź…
Historyja pomsty padadzienaja Trufo z taktam, bolem – i adstaronienym choładam.
26 kastryčnika 2007, piatnica
APOŠNIAJE METRO (Le Dernier Metro)
Francyja, 1980, kalarovy, 133 chv.
Režyser: Fransua Trufo
Roli vykonvajuć: Katryn Denioŭ, Žerar Depardjo, Žan Puare, Andrea Fiereol, Polet Dziubo, Žan-Łui Ryšar, Chajnc Bienent, Morys Ryš
Žanr: Drama pavodle scenaru Fransua Trufo i Śjuzan Šyfman
Pryzy: Premii “Sezar” za najlepšy film, najlepšuju režysuru, najlepšyja mužčynskuju i žanočuju roli, najlepšuju muzyku, huk, dyzajn, najlepšaje aperatarskaje mastactva. Naminacyi na premii “Załaty hlobus” i “Oskar” za najlepšy zamiežny film – usiaho 12 uznaharodaŭ i 3 naminacyi.
Adznaka: 10 (z 10)
Akupavany nacystami Paryž. Aktrysa Maryjon Stejner (Katryn Denioŭ) chavaje svajho muža-habreja ŭ sklepie teatru. Pad jahonym kiraŭnictvam jana stavić pjesu. Ale niečakana hierainia zakachałasia ŭ aktora Bernara (Žerar Depardjo).
Vialiki film pra luboŭ, adkaznaść, čałaviečnaść – i mastactva, jakoje dapamahaje zastacca ludźmi. Siužet, niemahčymy dla siońniašniaj Biełarusi.
Natchnionyja “Apošnim metro” Alaksandar Kačan i Andrej Kudzinienka składali scenar naveli, dziejańnie jakoj adbyvajecca ŭ mienskim teatry padčas akupacyi. Ale film nia byŭ ździejśnieny praź finansavyja ciažkaści.
Filmy demanstrujucca ŭ Muzei kino, seansy a 15.00 i 18.30
Kamientary