«Яндэкс Go» тлумачыць рост цэн на таксі: у Мінску кіроўцаў на лініі стала на 35% менш
Пасля ўвядзення «Рэестра аўтаперавозак пасажыраў у нерэгулярных зносінах» мінчукі заўважылі скачок цэн на таксі. У буйным сэрвісе патлумачылі, што адбываецца.
Кіраўнік «Яндэкс Go» у СНД Кірыл Свінцоў патлумачыў, што пасля ўвядзення новых правілаў колькасць кіроўцаў на лініі істотна скарацілася.
З ягоных слоў, жыхары заўважылі не толькі рост цэн, але і павялічаны час чакання машыны, піша Onliner.
«Паводле звестак нашага сэрвісу, у першыя дні працы рэестра колькасць кіроўцаў на лініі скарацілася ў сярэднім на 25% у краіне і на 35% у Мінску. Жыхары, якія хацелі замовіць машыну, заўважылі, што чаканне стала часта займаць больш часу, а кошт паездак па звыклым маршруце мог павялічыцца», — канстатуе Кірыл Свінцоў.
З-за таго, што выканаўцаў у сэрвісе стала менш, а колькасць ахвотных з'ехаць засталася звычайнай, у сістэме стаў спрацоўваць падвышаючы кошт каэфіцыент.
«Калі алгарытм не павялічыць цану, у дадатку мы часта будзем бачыць «Няма свабодных машын», — адзначыў Свінцоў.
Ён дадаў, што пры той колькасці кіроўцаў, якія выконваюць заказы з дапамогай сэрвісу цяпер, немагчыма забяспечыць узровень цэн і час падачы, якія былі да 1 лістапада.
«Вярнуць попыт і прапанову ў стан балансу (калі кіроўцаў на лініі дастаткова, каб выканаць усе бягучыя заказы) можна, толькі павялічыўшы колькасць кіроўцаў у рэестры і, як следства, у нашым сэрвісе», — лічыць кіраўнік «Яндэкс Go» у СНД.
Пры гэтым Свінцоў лічыць стварэнне рэестра добрай ідэяй.
«Рэестр як інструмент павышэння празрыстасці галіны — добрая ініцыятыва, якая працуе ў многіх краінах. Для яе паспяховай рэалізацыі ў Беларусі цяпер неабходна ліквідаваць праблемы, якія перашкаджаюць кіроўцам і перавозчыкам уступаць у рэестр.
Важна змякчыць патрабаванні да абсталявання аўтамабіля, так як выдаткі на падрыхтоўку ўсяго неабходнага для ўступлення ў рэестр для многіх кіроўцаў перавышаюць іх месячны даход, гэта можа быць крытычна для кіроўцаў з частковай занятасцю, а іх большасць. Неабходна ліквідаваць тэхнічныя праблемы, з якімі сутыкаюцца вадзіцелі і перавозчыкі пры рэгістрацыі ў рэестры.
Як я ўжо казаў раней, значна дапаможа спрасціць уступленне ў рэестр увядзенне статусу самазанятасці для кіроўцаў», — прапанаваў ідэю Свінцоў.
Прадстаўнік «Яндэкс Go» прагназуе, што ў хуткім часе кіроўцаў таксі стане больш.
«Міністэрства транспарту ўжо ўвяло некаторыя змены ў парадак уступлення ў рэестр. Напрыклад, тэрмін праходжання курсаў павышэння кваліфікацыі для кіроўцаў быў ссунуты на 1 сакавіка 2025 года, а з 3 лістапада пастановай Савета Міністраў №809 было дазволена не ўносіць у рэестр звесткі аб працоўнай дамове.
Спадзяемся, што найбліжэйшым часам кіроўцаў у рэестры і на лініі стане больш», — падкрэсліў Свінцоў.
З 1 лістапада ўступілі ў сілу новаўвядзенні ўказа №32 «Аб аўтамабільных перавозках пасажыраў». Пачаў працаваць «Рэестр аўтаперавозак пасажыраў у нерэгулярных зносінах», які змяшчае звесткі аб перавозчыках, іх ТС (аўтобусах, легкавых аўтамабілях, аўтамабілях-таксі), кіроўцах, дыспетчарах.
Усе, хто працягне працаваць у нерэгулярных перавозках, не ўключыўшыся ў рэестр, будуць лічыцца нелегаламі і несці адказнасць па артыкуле 13.3 КаАП «Незаконная прадпрымальніцкая дзейнасць» (пакаранне — аж да канфіскацыі ТС).
У канцы кастрычніка чыноўнікі ў Беларусі ўзяліся за «Яндэкс Go» з-за скаргаў на павышаныя тарыфы нават не ў гадзіну пік. Сэрвіс прызналі манапалістам на рынку пасажырскіх перавозак Беларусі. Цяпер «Яндэкс Go» трэба выканаць шэраг патрабаванняў. У першую чаргу — увесці цэнавае рэгуляванне.
Байпол назваў імёны магчымых забойцаў Андрэя Зельцэра. І заявіў, што сілавіка «Нірвану застрэліў свой жа3
Каментары