У Беларусі ўпершыню правялі ўнікальную аперацыю дзіцяці — сэрца спынялі на 2,5 гадзіны
Хірургі адкарэктавалі прыроджаны парок сэрца па японскай методыцы.
Беларускія хірургі правялі ўнікальную аперацыю па карэкцыі рэдкага прыроджанага пароку сэрца.
Дырэктар РНПЦ дзіцячай хірургіі, галоўны пазаштатны дзіцячы кардыяхірург Міністэрства аховы здароўя Канстанцін Драздоўскі расказаў, што аперацыю па японскай методыцы Nikaidoh у Беларусі правялі ўпершыню, піша БелТА.
«Паўтара года таму да нас паступіла дзіця, якое мы назіралі да 5 месяцаў. У яго рэдкі парок, яму трэба было дзве аперацыі. Адна часовая, каб даць хлопчыку магчымасць падрасці і дажыць да другой аперацыі, і другая канчатковая — аперацыя Nikaidoh, якую робяць вельмі нешматлікія цэнтры ў свеце. У Беларусі яе дагэтуль не праводзілі», — растлумачыў хірург.
Падчас першай аперацыі лекары выкарысталі зусім новы падыход — з дапамогай міні-інвазіўных тэхналогій далі дзіцяці магчымасць жыць яшчэ год, зрабілі так званую імплантацыю стэнта ў сэрца дзіцяці, у лёгачную артэрыю. Такім чынам палепшылі лёгачны крывацёк, і дзіця змагло дачакацца канчатковай аперацыі.
«Калі прыйшоў час рабіць канчатковую аперацыю, гэта, вядома, было для нас выклікам, таму што аперацыя вельмі складаная тэхнічна. І ўсё ж, пагаварыўшы з мамай, мы прынялі рашэнне ісці на яе. Нам удалося зрабіць так, што цяпер дзіця адчувае сябе добра.
Аперацыя праходзіла даволі складана, мы спынялі сэрца на 2,5 гадзіны. У гэты час адбывалася перасоўванне сасудаў і аднаўленне працаздольнасці сэрца ў тым выглядзе, у якім яно ёсць ва ўсіх нармальных людзей», — расказаў дырэктар РНПЦ.
Раней дзеці з гэтым парокам апераваліся некалькі разоў і былі вымушаныя ўсё жыццё паўторна аперавацца, але японскі дзіцячы кардыяхірург прыдумаў аперацыю Nikaidoh, і цяпер увесь свет актыўна развівае яе ў розных мадыфікацыях.
Дзякуючы каманднай працы пасляаперацыйны перыяд прайшоў гладка і праз 5 дзён дзіця было пераведзена да мамы. Цяпер хлопчык адчувае сябе добра.
Каментары