Румынскія вайскоўцы працягваюць пошукі абломкаў у іншых раёнах.
Міністэрства абароны Румыніі пацвердзіла, што каля горада Плаўру, размешчанага каля мяжы з Украінай, былі знойдзены абломкі расійскага беспілотніка-камікадзэ, піша Бі-бі-сі.
У паведамленні, апублікаваным на сайце румынскага абароннага ведамства, сказана, што спецыялісты ведамства знайшлі абломкі на адным з трох магчымых месцаў падзення расійскіх дронаў.
Яны ідэнтыфікаваны як фрагменты беспілотніка тыпу «Герань1/2», сказана ў паведамленні.
Па звестках СМІ, беспілотнік «Герань» — аналаг дрона тыпу «шахед», які Расія спачатку атрымлівала ад Ірана, а затым пачала вырабляць самастойна.
Румынскія вайскоўцы працягваюць пошукі абломкаў у іншых раёнах.
«Мы падкрэсліваем, што ўсе лакацыі, ідэнтыфікаваныя як магчымыя раёны інцыдэнтаў, размешчаны за межамі населеных раёнаў і там няма элементаў інфраструктуры», — піша Міністэрства абароны Румыніі.
Украінскія вайскоўцы сцвярджаюць, што ў ноч на чацвер збіць удалося 25 з 38 дронаў, а яшчэ тры былі «лакацыйна страчаныя пасля перасячэння дзяржаўнай мяжы з Румыніяй». Расія гэтыя звесткі не каментавала.
Каментары