Зяленскі павіншаваў Трампа з абраннем кандыдатам ад Рэспубліканскай партыі і назваў яго прэзідэнтам
Прэзідэнт Украіны патэлефанаваў Дональду Трампу.
![](http://d3kcf2pe5t7rrb.cloudfront.net/img/w840d4webp1/photos/z_2024_02/zel_trump_ap240217-yhkfl.jpg.webp)
«Я пагаварыў з Дональдам Трампам, каб павіншаваць яго з вылучэннем [у кандыдаты ў прэзідэнты ЗША] ад Рэспубліканскай партыі і асудзіць шакуючую спробу забойства ў Пенсільваніі. Я пажадаў яму сіл і абсалютнай бяспекі ў будучыні», — заявіў прэзідэнт Украіны Уладзімір Зяленскі ў сацсетках.
Паводле яго слоў, ён казаў аб «жыццёва важнай» падтрымцы дзвюх галоўных амерыканскіх партый і дзвюх палат амерыканскага кангрэса «ў абароне свабоды і незалежнасці нашай краіны».
«Мы дамовіліся з прэзідэнтам Трампам абмеркаваць на асабістай сустрэчы, якія крокі могуць зрабіць мір справядлівым і па-сапраўднаму трывалым», — напісаў Зяленскі ў сацсетцы X (назваўшы яго менавіта прэзідэнтам, а не былым прэзідэнтам).
Дональд Трамп таксама пацвердзіў тэлефонную размову з Уладзімірам Зяленскім, піша Бі-бі-сі.
«Ён павіншаваў мяне з паспяховым правядзеннем нацыянальнага з'езда Рэспубліканскай партыі і з тым, што я стаў кандыдатам ад Рэспубліканскай партыі на пасаду прэзідэнта Злучаных Штатаў», — напісаў Трамп у сваёй сацсетцы Truth Social.
Па словах Трампа, Зяленскі асудзіў замах на яго. Экс-прэзідэнт ЗША чарговы раз выступіў са сцвярджэннем аб тым, што пасля перамогі на выбарах ён зможа пакласці канец вайне ва Украіне, «якая забрала так шмат жыццяў і спустошыла незлічоную колькасць нявінных сем'яў».
«Абодва бакі змогуць сабрацца разам і дамовіцца аб пагадненні, якое пакладзе канец гвалту і пракладзе шлях да працвітання», — напісаў Трамп.
Раней Зяленскі моцна крытыкаваў Трампа за яго заявы пра Украіну і спосабы скончыць вайну.
Каментары
З іншага боку - Трамп - гэта хлус, які са сваёй сектай MAGA поўгады цалкам блакаваў дапамогу Ўкраіне і з-за каго загінулі шмат ваяроў ЗСУ, якім не хапала снарадаў. І наўрадці ён зменіцца