«Расіяне ехаць перасталі, а ў нашых няма столькі грошай». Што адбываецца на аўтамабільным рынку Беларусі
За апошнія некалькі месяцаў у беларускім аўтамабільным бізнэсе адбыўся шэраг змен, якія не маглі не адбіцца на продажах.
Нестабільная вясна 2024-га
Спачатку рынак скалыхнула навіна пра тое, што з 1 красавіка 2024 года расіяне больш не змогуць, як раней рэгістраваць у сябе аўтамабілі з Беларусі, размытненыя па льготным тарыфе без даплаты 50% розніцы.
Ад 1 красавіка пачалі дзейнічаць абноўленыя стаўкі ўтылізацыйнага збору, якія галоўным чынам закранулі імпарт грузавых аўто.
У дадатак да змен у заканадаўстве Расіі і Беларусі, краіны ЕС пачалі больш пільна сачыць за выкананнем санкцый у дачыненні да Расіі, увозіць з Еўрасаюза ў Беларусь аўтамабілі з аб'ёмам рухавіка большым за 1,9 літра стала складаней. Афіцыйныя дылеры на гэтым фоне прагназуюць рост продажаў новых машын.
Першая навіна справакавала павышаны попыт на аўто. Прадаўцы тады казалі, што на рынку назіралася сапраўднае ажыўленне праз узрослы попыт з боку расіян.
Патрабуюць зніжку ў 3-5 тысяч даляраў
Цяпер на рынку зацішша. Суразмоўца, якія мае ў продажы тры свежапрыгнаныя з Еўропы аўтамабілі, кажа, што цягам апошніх двух месяцаў інтарэс да ягоных машын амаль нулявы.
«За тыдзень можа быць 1-2 пустыя выклікі, па выніках якіх не даходзіць нават да агляду аўто. Што тычыцца расіян, то апошні раз даводзілася мець з імі справу ў сярэдзіне сакавіка», — згадвае перагоншчык.
Па словах мужчыны, расіяне, якія дагэтуль цікавяцца аўто, звычайна прапаноўваюць цану адразу на некалькі тысяч меншую ад указанай у аб'яве.
«Я на іх нават не рэагую, бо гэта відавочна нейкія хітразробленыя перакупы з Расіі, якія з ходу прапануюць на 3-5 тысяч менш. Магчыма, яны такім чынам намагаюцца знайсці тых, каму хутка патрэбныя грошы, а машына не прадаецца. Інакш іх логіку зразумець складана, бо прапанаваць 15 тысяч за машыну, якая каштуе 19-20, гэта поўная бязглуздзіца», — тлумачыць перагоншчык.
Калі расіяне не едуць у Беларусь па машыны, то машыны едуць да расіян
Іншы суразмоўца таксама скардзіцца, што продажы апошнім часам амаль ніякія. Распрадаць машыны яму ўдалося толькі пасля таго, як іх перавезлі непасрэдна ў Расію.
«Пасля таго, як машыны завіслі ў Беларусі, мы вырашылі паспрабаваць прадаць іх у Расіі з дапамогай нашых партнёраў, якія купляюць машыны з Еўропы. Як расіяне адгулялі майская, то ў іх там продажы аднавіліся, і нам удалося прадаць некалькі машын», — кажа суразмоўца.
Уласнік аўтакаміса таксама адзначыў, што апошнія два месяцы продажы ніякія.
«Расіяне ехаць перасталі, а ў нашых няма столькі грошай. Калі яшчэ ў пачатку года добра прадаваліся свежыя аўто з Еўропы, то цяпер зноў самыя папулярныя — гэта «карчы» за 5-7 тысяч.
Сярод свежапрыгнаных бяруць толькі машыны ў дыяпазоне 13-18 тысяч. Усе, што даражэйшае за дваццатку, практычна стаіць колам».
Прадаўцоў стала больш, чым пакупнікоў
Мужчына выказвае меркаванне, што
аўтабізнэсу варта перажыць цяжкі час, каб ён змог ачысціцца ад выпадковых людзей, якія ніколі ў жыцці не займаліся машынамі, але вырашылі ўкласціся ў іх, бо на гэтым можна было добра зарабіць, пакуль існаваў павышаны попыт.
«Без стабільнага попыту з боку расіян беларускі рынак не такі ўжо і вялікі, таму нам проста не трэба столькі прадаўцоў. Былі часы, калі больш за палову купцоў былі з РФ, цяпер, калі іх амаль не засталося, рынак перанасыціўся.
Жадаючых прыганяць машыны на перапродаж з Еўропы або ЗША стала больш, чым гатовых іх купляць», — упэўнены ўласнік аўтакаміса, які ўжо каля 20 гадоў займаецца продажам патрыманых аўто.
Яшчэ адзін суразмоўца, якія займаецца аўтамабілямі са Штатаў, глядзіць на будучыню крыху больш аптымістычна, чым ягоныя калегі.
Ён мяркуе, што нягледзячы на тое, што аўтамабілі цяпер прадаюцца сапраўды дрэнна, рынак мусіць ажывіцца.
«Рэч у тым, што расіяне перад 1 красавіка набралі машын у запас, таму трэба пачакаць, пакуль яны іх распрададуць. У дадатак да гэтага, няма адзінага меркавання ў пытаннях даплаты мыту, калі машына размытнена ў Беларусі на льготніка.
Адныя кажуць, што трэба, а іншыя, што не. Наколькі я зразумеў, то яшчэ год размытненыя праз Беларусь машыны можна будзе ўвозіць у Расію без дадатковых даплат», — кажа суразмоўца.
Мужчына сцвярджае, што ў маі прадаў адну машыну расіянам, якія ўжо не першы раз куплялі праз яго аўто са Штатаў.
«Яны былі гатовыя набыць машыну, пакуль яна яшчэ была ў дарозе. Але потым адмовіліся праз асцярогі з даплатамі. Недзе праз месяц зноў з'явіліся, калі машына была ўжо ў рамонце. У выніку яны яе ўсё адно забралі, толькі не ў аварыйным стане, як спачатку планавалі, а ўжо адрамантаваную».
Пры гэтым суразмоўца прызнаўся, што цікавасці да іншых машын, якія цяпер знаходзяцца на шляху ў Беларусь, у іх няма.
Зняволены расказаў, як сядзеў у калоніі ў Глыбокім у суседняй камеры са Статкевічам3
Каментары