Чалы патлумачыў, чым быў карысны Мясніковіч у час працы з Лукашэнкам
«Яго апарат увасабляў функцыю «абароны ад дурня».
У кулінарным ютуб-праекце Мікалая Халезіна «Ператром з Халезіным» рэжысёр разам з эканамістам Сяргеем Чалым разважалі пра беларускія эліты. Чалы згадаў, як на яго вачах ўлада ў Беларусі, як і ў шмат якіх іншых краінах у 1990-х гадах, вярнулася да старых партыйных эліт. На Захадзе гэты перыяд быў неабходны, па словах аналітыка, для таго, каб яны ператварыліся ў сацыял-дэмакратаў.
«Я проста памятаю, як сустрэў у мужчынскай прыбіральні Адміністрацыі прэзідэнта Міхаіла Уладзіміравіча Мясніковіча і зразумеў, што рамантычны перыяд працы ў адміністрацыі скончыўся.
Першае, з чаго я зразумеў, што цяпер усё будзе па-іншаму, гэта калі мне на працоўнае месца прынеслі кніжачку службовых інструкцый таўшчынёй у цалю. Я не ведаю нікога, хто б яе чытаў, але яна была такой таўшчыні. Гэта было зроблена пры Мясніковічы. Ён лічыў, калі гэта не напісана, то і абавязкаў няма. І гэта з яго пункту гледжання павышала эфектыўнасць», — распавядае эканаміст.
Па словах Чалага, прыход у Адміністрацыю Лукашэнкі Мясніковіча (у кастрычніку 1995 года) азначаў перамогу старой камуністычнай эліты над рамантыкамі першай хвалі.
Сяргей Чалы гаворыць, што высока цэніць ролю Мясніковіча ў час яго работы з Лукашэнкам:
«Гэты чалавек, які выконваў вельмі важную народна-гаспадарчую задачу. Яго апарат увасабляў функцыю «абароны ад дурня». На той момант гэты чалавек валодаў бясспрэчным аўтарытэтам ва ўсёй наменклатуры. Ён выбудаваў сістэму выканання абсалютна ідыёцкіх ідэй Лукашэнкі».
Чалы тлумачыць: калі ўказы, распараджэнні, дэкрэты падпісваюцца Лукашэнкам, то пратакол даручэнняў па выніках любой нарады — не.
«Гэта дазваляла часам выкінуць нейкае глупства, часцей перафармуляваць яго па-іншаму, а часам і ўставіць момант, які быў патрэбен», — гаворыць эканаміст.
Чытайце яшчэ:
У Чалага спыталі, калі ён запросіць Шрайбмана на сваё вечаровае шоу
«П****ец адбыўся». Вольга Кавалькова патлумачыла, чаму адышла ад палітыкі і царквы і як трансфармуе боль у любоў25
Каментары