Праз дзесяць гадоў лятаючыя аўто стануць звычайнай з'явай. А першае аэраэлектратаксі з'явіцца ўжо ў 2025
Па ацэнках экспертаў, рынак лятаючых аўтамабіляў за 10 гадоў узрасце больш чым у 18 разоў. Дамінаваць на ім будзе Еўропа. А вось у ЗША ў наступным годзе можа зʼявіцца першае гарадское аэратаксі.
Паводле нядаўняй справаздачы, апублікаванай Allied Market Research, сусветны рынак лятаючых аўтамабіляў ацэньваецца ў 0,21 мільярда долараў у 2025 годзе і, паводле прагнозаў, дасягне 3,8 мільярда у 2035 годзе. Сярэднегадавыя тэмпы росту прагназуюцца на ўзроўні 34,1%.
Чакаецца, што Еўропа будзе займаць дамінуючае становішча на сусветным рынку дзякуючы пашырэнню дзейнасці па распрацоўцы прадуктаў рэгіянальнымі гульцамі, такімі як Klein Vision S.R.O. і AeroMobil. Росту гэтага сегменту спрыяе павелічэнне сродкаў, якія ўкладаюць у яго развіццё ўрады і фундатары.
Klein Vision Ltd
Улетку 2023 года славацкая кампанія-распрацоўшчык лятаючага аўтамабіля Klein Vision абвясціла аб атрыманні сертыфікату лётнай прыдатнасці. Гэта дало права на серыйны запуск аэрамабіляў. Продажы павінны наступіць ужо ў гэтым годзе.
Канструктары абсталявалі Klein Vision Ltd 1,6-літровым рухавіком BMW магутнасць 140 к.с. Прыблізная далёкасць палёту аэракара складае 1000 км, а спажыванне паліва ў палёце — 18 літраў у гадзіну.
Двухмесны аўтамабіль ператвараецца ў лятальны апарат усяго за 3 хвіліны. Ён важыць 1100 кг і можа несці дадатковую нагрузку ў 200 кг. У планах дапрацоўка праекту і стварэнне электрычнага аэракара.
Аэратаксі Midnight
Як паведамляецца, амерыканская кампанія Archer завяршыла першы этап лётных выпрабаванняў свайго паветранага таксі Midnight. Была пацверджана здольнасць планёра ўзлятаць, завісаць, паварочвацца і манеўраваць, як шматротарны дрон, нахіляючыся для паскарэння.
Кампанія Archer у гэтым годзе плануе выпрабаваць распрацоўку з пілотамі на борце і атрымаць сертыфікат, які дазваляе перавозіць пасажыраў за плату.
Як адзначаюць распрацоўшчыкі, Midnight спраектаваны для кароткіх пералётаў у межах гораду і можа змяшчаць да пяці пасажыраў. Максімальная хуткасць складае 241 км/г, а запас ходу — 161 км.
Archer плануе, што паветранае таксі замяніць паездкі на аўтамабілі працягласцю 60-90 хвілін палётам у 10-20 хвілін. Кампанія плануе пачаць камерцыйную эксплуатацыю сваіх машын да 2025 года.
Лятаючыя аўтамабілі і аэратаксі могуць стаць рашэннем ва ўмовах росту ва ўсім свеце аўтамабільнага трафіку на дарогах. Аднак ёсць у развіцці гэтага напрамку і перашкоды. Напрыклад, пакуль незразумела, якім чынам будуць рэгулявацца палёты такіх машын, бо для іх трэба распрацоўваць асобныя правілы, ствараць паветраныя калідоры, вызначаць вышыню палётаў.
Чытайце яшчэ:
Як выглядаюць самыя вялікія ў свеце могілкі самалётаў ВІДЭА
Сакрэтны амерыканскі беспілотны касмічны карабель можа правесці на арбіце да трох гадоў
У Беларускай праваслаўнай царкве абнавілі цэннік? Вось якія будуць рэкамендаваныя тарыфы7
Каментары