Улады Ізраіля вырашылі прыбраць з навучальных праграм згадкі пра Грэту Тунберг з-за яе падтрымкі Палесціны
Міністэрства адукацыі Ізраіля абʼявіла, што прыбярэ з навучальных праграм любыя згадкі пра шведскую актывістку Грэту Тунберг з-за яе выказванняў у падтрымку Палесціны, піша «Медуза» са спасылкаю на ізраільскія медыя.
«ХАМАС — тэрарыстычная арганізацыя, адказная за забойства 1400 нявінных ізраільцян, у тым ліку дзяцей, жанчын і пажылых людзей, і выкраданне больш за 200 чалавек. Пазіцыя [Тунберг] пазбаўляе яе права быць адукацыйным і маральным узорам для пераймання, і яна больш не мае права натхняць і навучаць ізраільскіх студэнтаў», — заявілі ў ведамстве.
За некалькі дзён да гэтага Тунберг апублікавала паведамленне ў падтрымку Палесціны ў твітары. «Сёння мы пратэстуем у знак салідарнасці з Палесцінай і сектарам Газа. Свету неабходна выказацца і заклікаць да неадкладнага спынення агню, справядлівасці і свабоды для палесцінцаў, а таксама ўсіх пацярпелых мірных жыхароў», — напісала Тунберг.
Week 270. Today we strike in solidarity with Palestine and Gaza. The world needs to speak up and call for an immediate ceasefire, justice and freedom for Palestinians and all civilians affected.#FreePalestine #IStandWithPalestine #StandWithGaza #FridaysForFuture
Thread pic.twitter.com/0hVtya0yWO
Неўзабаве актывістка падверглася рэзкай крытыцы ў сацсетках, а больш за сто ізраільскіх эколагаў і актывістаў падпісалі калектыўны ліст да Тунберг, у якім падрабязна выклалі наступствы нападу ХАМАС на Ізраіль.
«Так вы сабе ўяўляеце барацьбу за правы чалавека? З забойствамі мірных жыхароў, згвалтаваннямі жанчын і выкраданнямі немаўлят і старых? Ці гэта гучыць як частка барацьбы за свабоду?» — гаварылася ў лісце.
Аўтары звароту таксама абвінавацілі Тунберг у павярхоўным і грэблівым стаўленні да ізраільска-палесцінскага канфлікту, які, як яны лічаць, можа паставіць пад пытанне сурʼёзнасць і абгрунтаванасць яе актывізму.
«Грэта больш не зʼяўляецца для нас прыкладам для пераймання ў кантэксце змены клімату. У нас ёсць шмат іншых фігур, на якіх можна раўняцца», — лічаць яны.
Пазней Тунберг адказала на крытыку, падкрэсліўшы, што яна супраць «жахлівых нападаў ХАМАС». Пры гэтым яна зноў працытавала свой пост, у якім пісала, што «свет павінен заклікаць да неадкладнага спынення агню, справядлівасці і свабоды для палесцінцаў і ўсіх пацярпелых мірных жыхароў», і паставіла хэштэг #StandWithPalestine.
Грэта Тунберг атрымала шырокую вядомасць у 2018 годзе пасля таго, як стала праводзіць забастоўкі ля будынка парламента Швецыі. Яна заявіла, што не будзе хадзіць у школу ў пятніцы, пакуль улады не пачнуць выконваць дамовы па клімаце. Улетку 2019 года Тунберг вырашыла зрабіць перапынак у навучанні. Праз год яна вярнулася ў школу.
У 2019 годзе людзі па ўсім свеце праводзілі забастоўкі, падобныя да тых, што ладзіла Грэта Тунберг. Сама актывістка ў тым жа годзе выступіла на кліматычным саміце ААН у Нью-Ёрку.
Часопіс Time назваў Тунберг Чалавекам года — 2019. З таго часу Тунберг чатыры разы намінавалі на Нобелеўскую прэмію міру.
Байпол назваў імёны магчымых забойцаў Андрэя Зельцэра. І заявіў, што сілавіка «Нірвану» застрэліў свой жа3
Каментары
Прыкол у тым, што ў яе такое ж павярхоўнае разуменне экалогіі і тэхналагічных працэсаў, якія ўплываюць на экалогію.