Нарадзіўся ва Украіне, быў дробным чыноўнікам, ваяваў у Афрыцы. Раскрытая асоба «Піянера», які ўзначаліў «Вагнер» у Беларусі

Па звестках расследавальнікаў рэсурсу All eyes on Wagner, «Піянер» — гэта 46-гадовы Сяргей Чубко. Яны вызначылі гэта з дапамогай дакументаў пра чальцоў «Вагнера», якія ім перадала неназваная крыніца.

З сям'і савецкага вайскоўца

Мужчына нарадзіўся ў 1976 годзе ў горадзе Чарнаўцы, які знаходзіцца на паўднёвым захадзе Украіны, ля межаў з Румыніяй і Малдовай. Ягоны бацька Уладзімір — былы вайсковец. У Чарнаўцах знаходзіўся 110-ы акружны навучальны цэнтр, радыёлакацыйная база і вайсковы аэрадром. А не пазней за 1984-ы яны з сям'ёй жылі ў горадзе Ізяславе, дзе была база войскаў спецпрызначэння. Таксама Уладзімір Чубко ваяваў у Афганістане і, магчыма, у іншых месцах (інфармацыя ў гэтым абзацы была ўдакладнена пасля публікацыі).

Павялічыць

Пасля развалу СССР сям'я Чубко пераехала ў Расію, у горад Новарасійск, які знаходзіцца на ўзбярэжжы Чорнага мора. У 1994-м Сяргей Чубко пайшоў служыць па кантракце ў армію Расіі. Ваяваў у Чачні.

Прыватныя ахоўныя прадпрыемствы

Сяргей Чубко разарваў кантракт у 2002-м і перайшоў у прыватную ахоўную кампанію ў Наварасійску.

Бацька мужчыны таксама працаваў у ахоўных кампаніях і займаўся бізнэсам у сферы прыватных ахоўных прадпрыемстваў (часта яны працавалі разам). А з 2014 па 2021 гады Чубко-старэйшы быў дырэктарам аднаго з іх. 

Павялічыць

Таксама Чубко-старэйшы праходзіў трэнінгі ў Міжнароднай контртэрарыстычнай трэнінгавай асацыяцыі, якая вучыць ахоўнай дзейнасці. У яго была ліцэнзія на ажыццяўленне прыватнай дэтэктыўнай дзейнасці. Да крымінальнай адказнасці бацька і сын Чубко не прыцягваліся.

Шлях у чыноўнікі і спроба пазбавіць грамадзянства

У 2003-м у Новарасійску памянялі мэра, і новы пачаў прызначаць на ключавыя пасты былых сілавікоў. Сяргей Чубко, які не меў вышэйшай адукацыі, нечакана ўзначаліў камітэт па справах моладзі ў адміністрацыі горада. А ў 2005-м ён перайшоў на пасаду намесніка кіраўніка адміністрацыі ў Мысхакскай сельскай акрузе, якая падпарадкоўваецца адміністрацыі Новарасійска.

У 2010-ым годзе Сяргей Чубко працаваў ахоўнікам у некалькіх фірмах, а таксама быў супрацоўнікам прыватнага ахоўнага прадпрыемства «Русіч». У кантактах нумар, асацыяваны з Чубко, падпісаны ў людзей як «ПАП Русіч намеснік дырэктара» (там жа працаваў тады ягоны бацька). Адметна, што ў 2011-м Чубко-малодшага хацелі пазбавіць расійскага грамадзянства за тое, што ён быццам бы таемна мае грамадзянства Украіны.

«Рускі свет»

Невядома, ці ваяваў Сяргей Чубко ва Украіне ў 2014-м, але ў снежні 2014-га ён стаў адным з заснавальнікаў «казацкай» арганізацыі ў Новарасійску. Расійскія казакі як добраахвотнікі масава паехалі ваяваць на баку Расіі пасля аб'яўлення незалежнасці марыянетачных «ДНР» і «ЛНР».

Павялічыць

Мужчына працягваў працаваць у ахоўнай кампаніі, якая называлася «Чарнаморская ахоўная фірма», а ягоны бацька акурат у той час узначаліў ахоўную кампанію «Абярог Чарнамор'я». У канцы верасня 2014-га Сяргей Чубко выехаў у Маскву і вярнуўся адтуль толькі 16-га кастрычніка.

ПВК «Вагнер»

Да ПВК «Вагнер» ён далучыўся 26 студзеня 2017-га года (паводле інфармацыі выдання All Eyes On Wagner). Пасля гэтага ён едзе ў Сірыю — гэта ўскосна пацвярджаюць запісы ягоных нумароў у тэлефонных кнігах («Сяргей. Сірыя»). Тут ён таксама робіць кар'еру: праз год службы яго ставяць кіраўніком вайсковай аперацыі «Вагнера» ва Усходняй Гуце.

Павялічыць

Ягоная група патрапіла пад абстрэл падчас бою пад Хашамам з 7 на 8 лютага 2018 года. Тады група ўрадавых войскаў разам з вагнераўцамі ды іншымі наймітамі спрабавалі адбіць газаперапрацоўчы завод у курдскіх паўстанцаў, якіх падтрымлівалі ЗША. У адказ ЗША пачалі масіраваную бамбардзіроўку групы, яна была цалкам разгромленая. Загінула некалькі дзясяткаў вагнераўцаў (да 80), яшчэ, па розных звестках, ад дзясяткаў да сотні былі параненыя.

У 2019-м Чубко пераводзяць на службу ў Лівію, дзе адкрываўся чарговы штаб «Вагнера», і ён становіцца кіраўніком ПВК у гэтым рэгіёне. Былы вагнеравец адгукаўся пра яго службу так:

Павялічыць

«У 2019 годзе прыйшоў загад хуценька адправіць сірыйцаў з нашага атрада «Паляўнічыя на ІДІЛ» у Лівію. Калі яны туды прыехалі, паступіў званок ад «Піянера»: «Слухай, а вось тых, каго вы даслалі, іх можна як смяротнікаў выкарыстоўваць?» Які нармальны чалавек такое спытае! Тым больш пра маіх хлопцаў».

Пасля Лівіі Чубко вяртаецца ў Расію на нейкі час. У 2020-м ён працаваў у кампаніі «Глобал Лінк», якая займаецца арганізацыяй грузаперавозак і гандлем, з заробкам 80 тысяч рублёў (каля 1100 даляраў).

Таксама ў мужчыны ёсць брат, 39-гадовы Дзмітрый Чубко. Па звестках СБУ, мужчына быў у складзе місіі «Вагнера» ў Судане ў 2019-м, хоць, мяркуючы па публічных звестках, аніякага асаблівага вайсковага досведу ён не мае. Ён працаваў шмат дзе, але аніводнага разу ягоная дзейнасць не была звязаная з ваенізаванымі фарміраваннямі ці ахоўнымі агенцтвамі, прынамсі, на першы погляд. Ён працаваў у фірме, якая гандлюе аўтамабілямі, лагістычных кампаніях, кол-цэнтрах банкаў. «Правал» у базах з месцамі працы прыходзіцца на 2015—2019 гады, таму ён мог быць наймітам «Вагнера» ў гэты час.

Вяртанне на вайну, ваенныя злачынствы і шлях у Беларусь

Сяргей Чубко ў выніку вярнуўся ў «Вагнер». У пачатку чэрвеня 2021-га ён ужо служыў у Сірыі, а 2 ліпеня яго пераводзяць кіраўніком аперацый ПВК у ЦАР. У гэтым рэгіёне «Вагнер» дзейнічаў асабліва жорстка.

Павялічыць

Па звестках арганізацыі ACLED, баевікамі «Вагнера» было забіта 686 цывільных асоб (і гэта толькі задакументаваныя выпадкі). Таксама вагнераўцы, згодна са звесткамі ААН, пераследвалі мясцовае насельніцтва, журналістаў і прадстаўнікоў гуманітарных арганізацый. Нярэдка практыкаваліся адвольныя затрыманні і катаванні, а таксама тэрор.

У ліпені Чубко прыехаў у Беларусь з Расіі разам з астатнімі калонамі ПВК, а Прыгожын паставіў яго кіраўніком базы ў Беларусі.

• 12
• 0
• 4
• 5
• 7
• 6
• 77
• 0