Apple прэзентавала новыя акуляры змяшанай рэальнасці. У іх аб'яднаюцца віртуальны і рэальны светы
Рынак гэты гаджэт чакаў з вялікім нецярпеннем 10 гадоў.
Кампанія Apple прэзентавала новыя акуляры дапоўненай (або змяшанай) рэальнасці Apple Vision Pro. Гэта першы буйны гаджэт, выпушчаны тэхнагігантам амаль за дзесяцігоддзе, і рынак чакаў яго з вялікім нецярпеннем, піша Бі-бі-сі.
Па словах генеральнага дырэктара Apple Ціма Кука, новая гарнітура «бездакорна спалучае ў сабе рэальны свет і віртуальны свет».
Прадукт прэзентавалі на штогадовай канферэнцыі для распрацоўшчыкаў Worldwide Developers Conference — 2023.
Акрамя акуляраў, Apple таксама прапанавала абнаўленні для MacBook Air і анансавала новую аперацыйную сістэму iOS 17.
Лыжныя акуляры
Apple Vision Pro не падобныя да аналагічных гаджэтаў віртуальнай рэальнасці і хутчэй нагадваюць пару лыжных акуляраў.
Яны разлічаныя на дзве гадзіны аўтаномнай працы.
У апісанні прынцыпу працы прылады Apple выкарыстоўвае словы «дапоўненая» або «змяшаная» рэальнасць.
Яна накладвае віртуальныя аб'екты на навакольны свет, дазваляючы нам злучаць рэальнасць вакол нас з віртуальным светам.
Карыстальнікі могуць атрымліваць доступ да розных дадаткаў, глядзець фільмы і складаць дакументы ў віртуальнай прасторы.
Падчас прэзентацыі Цім Кук патлумачыў, што новая прылада дазволіць карыстальнікам «бачыць, чуць і ўзаемадзейнічаць з лічбавым кантэнтам гэтак жа, як быццам гэта адбываецца ў вашай фізічнай прасторы».
Кіруюцца акуляры з дапамогай рук, а таксама голасам і вачыма.
Дарагоўля, недахопы, канкурэнцыя
Першую партыю Apple Vision Pro плануюць выпусціць у ЗША ў пачатку наступнага года.
Аднак у экспертаў ёсць сумневы, што такі прадукт можа зацікавіць шырокі рынак.
Верагодна, якраз таму падчас даклада прадстаўнікоў Apple на Worldwide Developers Conference — 2023 акцыі кампаніі трохі ўпалі ў цане.
Многіх бянтэжыць заяўленая цана Apple Vision Pro. Пара акуляраў абыдзецца пакупніку ў 3499 даляраў — гэта значна вышэй, чым у аналагічных прадуктаў на рынку.
Старшы рэдактар профільнага выдання MacRumors Хартл Чарльтан не ўпэўнены, што навінка з лёгкасцю заваюе шырокую публіку.
«Спачатку прадукт не спадабаецца масаваму спажыўцу праз яго надзвычай высокі кошт і непасрэдныя недахопы, уласцівыя прыладам першага пакалення. Адзін з іх — асобны дротавы акумулятар», — лічыць Чарльтан.
Аднак, нагадаў ён, многія прадукты Apple на пачатку ўспрымаліся скептычна, і ў кампаніі ёсць вялікі досвед у пераадоленні гэтага бар'ера.
Прэзентацыя Apple прайшла праз тыдзень пасля таго, як Meta і Lenovo абвясцілі пра стварэнне новых версій сваіх існых гарнітур віртуальнай рэальнасці, якія, аднак, пакуль не могуць накладваць аб'екты на малюнак рэальнага свету.
Meta ўклала значныя сродкі ў распрацоўкі змяшанай рэальнасці, але цяпер гэты сектар мае цяжкасці.
Па даных International Data Corporation, у мінулым годзе сусветныя продажы на рынку гаджэтаў віртуальнай рэальнасці ўпалі на 54%.
«За апошнія некалькі гадоў агульная прастора AR/VR была трохі перагружаная метасусветам і падобнымі штукамі, — лічыць эксперт Forrester Research Томас Хасан. — Таму я думаю, што [прыняцце публікай новага прадукту Apple] зойме трохі больш часу».
iOS 17
Акрамя Vision Pro, Apple таксама прэзентавала iOS17 — апошнюю версію аперацыйнай сістэмы iPhone.
Абнаўленні ўключаюць у сябе магчымасць персаналізаваць экран прылады пад запыты карыстальнікаў, расшыфроўку галасавых паведамленняў у тэкставы фармат з дапамогай дадатку iMessage і многае іншае.
Асабліва вылучаюцца дзве новыя функцыі: NameDrop, з дапамогай якой можна будзе абменьвацца фатаграфіямі, відэа і кантактамі, проста дакрануўшыся прыладамі, і Check-In — аўтаматычнае апавяшчэнне абранага карыстальнікам кола асоб пра тое, што ён вярнуўся ці не вярнуўся дадому ў вызначаны час.
Новая аперацыйная сістэма будзе даступная восенню 2023 года.
«А што ў вас за праблемы? Далёка да Мінска ці няма каму падвезці?» Публічная пікіроўка Лукашэнкі і Пашыняна13
Каментары