Эканамісты распавялі, колькі беларусаў перабралася ў апошнія гады ў ЕС
BEROC прадставіў вынікі даследавання міграцыі з Беларусі ў краіны Еўрасаюза. Вось асноўныя высновы экспертаў.
Старэйшая навуковая супрацоўніца BEROC Анастасія Лузгіна адзначае шэраг палітычных падзей, якія ў апошнія гады ўплывалі на характар міграцыі з Беларусі. Напрыклад, да 2020 года для беларусаў збольшага была характэрная працоўная міграцыя, якая расла паступовымі тэмпамі.
Пасля прэзідэнцкіх выбараў актывізавалася міграцыя па палітычных матывах, але спачатку гаворка ішла не пра краіны ЕС. Беларусы ў асноўным выбіралі для пераезду Украіну і Грузію як больш простыя варыянты. У 2020-2021 гады паездкі ў краіны ЕС былі абмежаваныя праз пандэмічныя меры перасцярогі, а наземная мяжа Беларусі з гэтымі краінамі была закрытая. Авіязносіны Мінска з аб’яднанай Еўропай былі абмежаваныя, а пасля пасадкі самалёта з Раманам Пратасевічам яны і ўвогуле скончыліся.
Аднак з сакавіка 2022 года ўзмацнілася міграцыя беларусаў у Польшчу з Беларусі і Украіны. Умовы для пераезду туды спрасціліся, бо каранцінныя абмежаванні былі аслабленыя. Праз больш просты працэс легалізацыі ў Польшчы гэтая краіна аказалася больш спрыяльнай для першаснай (з Беларусі) або другаснай (з Украіны ці Грузіі) міграцыі.
У той час з’явіліся і новыя эмігранты. Мужчыны пакідалі Беларусь праз страх мабілізацыі, цэлыя сем’і з’язджалі праз дрэнную палітычную і эканамічную сітуацыю, супрацоўнікаў кампаній, збольшага з ІТ-сектара, пераводзілі ў іншыя краіны, у тым ліку і ў Польшчу. Нарэшце, павялічылася другасная міграцыя, бо беларусы пакідалі Украіну праз ваенныя дзеянні.
Пра якія памеры міграцыі за азначаныя гады ідзе гаворка?
BEROC прыводзіць прыкладныя лічбы: ад 143,6 да 170,9 тысячы беларусаў, якія ўехалі ў ЕС для пастаяннага пражывання.
Калі параўноўваць па ніжняй мяжы дыяпазону, гэтая лічба перавышае сукупнае насельніцтва ўсяго Аршанскага раёна, калі па верхняй — параўнальная з колькасцю насельніцтва ў Баранавічах.
Эксперты мяркуюць, што асноўная частка беларусаў-мігрантаў (ад 96,7 да 111,5 тысячы) уехала на тэрыторыю Польшчы. Колькасць беларускіх эмігрантаў у Літву ў 2021-2022 гадах BEROC ацэньвае у лічбах ад 25,4 да 37,9 тысячы. За 2021-2022 год у іншыя краіны ЕС, акрамя Літвы і Польшчы, для пастаяннага пражывання маглі прыехаць каля 21,5 тысячы беларусаў.
Як гэта суадносіцца з афіцыйнай статыстыкай? Згодна з ёй, у 2022 годзе, каб працаўладкавацца за мяжой, з краіны з’ехалі 5590 беларусаў. У гэтым выпадку ўлічваюцца толькі тыя людзі, якія заключылі працоўны кантракт для працы за мяжой пры падтрымцы юрасобаў і ІП, якія дапамагаюць працаўладкоўвацца.
З іншага боку, ёсць статыстыка ўнутры краіны, якая супярэчыць гэтым даным. Так, чысты адток працаўнікоў ІТ-сектара на рынку працы склаў 17226 чалавек. Таксама ў 2021 і 2022 гадах назіралася ўстойлівае скарачэнне ўзроўню занятасці адначасова са зніжэннем і так невысокага ўзроўню беспрацоўя.
«Наша Нiва» — бастыён беларушчыны
ПАДТРЫМАЦЬ«Хіба адбылося нешта пазітыўнае?» Прэзідэнт Літвы супраць змякчэння санкцый адносна рэжыму Лукашэнкі
Даныя новага даследавання па беларусах у Літве — нечаканыя высновы
Каментары