Ekanamisty raspaviali, kolki biełarusaŭ pierabrałasia ŭ apošnija hady ŭ ES
BEROC pradstaviŭ vyniki daśledavańnia mihracyi ź Biełarusi ŭ krainy Jeŭrasajuza. Voś asnoŭnyja vysnovy ekśpiertaŭ.
Starejšaja navukovaja supracoŭnica BEROC Anastasija Łuzhina adznačaje šerah palityčnych padziej, jakija ŭ apošnija hady ŭpłyvali na charaktar mihracyi ź Biełarusi. Naprykład, da 2020 hoda dla biełarusaŭ zbolšaha była charakternaja pracoŭnaja mihracyja, jakaja rasła pastupovymi tempami.
Paśla prezidenckich vybaraŭ aktyvizavałasia mihracyja pa palityčnych matyvach, ale spačatku havorka išła nie pra krainy ES. Biełarusy ŭ asnoŭnym vybirali dla pierajezdu Ukrainu i Hruziju jak bolš prostyja varyjanty. U 2020-2021 hady pajezdki ŭ krainy ES byli abmiežavanyja praz pandemičnyja miery pieraściarohi, a naziemnaja miaža Biełarusi z hetymi krainami była zakrytaja. Avijaznosiny Minska z abjadnanaj Jeŭropaj byli abmiežavanyja, a paśla pasadki samalota z Ramanam Pratasievičam jany i ŭvohule skončylisia.
Adnak z sakavika 2022 hoda ŭzmacniłasia mihracyja biełarusaŭ u Polšču ź Biełarusi i Ukrainy. Umovy dla pierajezdu tudy spraścilisia, bo karancinnyja abmiežavańni byli asłablenyja. Praz bolš prosty praces lehalizacyi ŭ Polščy hetaja kraina akazałasia bolš spryjalnaj dla pieršasnaj (ź Biełarusi) abo druhasnaj (z Ukrainy ci Hruzii) mihracyi.
U toj čas źjavilisia i novyja emihranty. Mužčyny pakidali Biełaruś praz strach mabilizacyi, cełyja siemji źjazdžali praz drennuju palityčnuju i ekanamičnuju situacyju, supracoŭnikaŭ kampanij, zbolšaha ź IT-siektara, pieravodzili ŭ inšyja krainy, u tym liku i ŭ Polšču. Narešcie, pavialičyłasia druhasnaja mihracyja, bo biełarusy pakidali Ukrainu praz vajennyja dziejańni.
Pra jakija pamiery mihracyi za aznačanyja hady idzie havorka?
BEROC pryvodzić prykładnyja ličby: ad 143,6 da 170,9 tysiačy biełarusaŭ, jakija ŭjechali ŭ ES dla pastajannaha pražyvańnia.
Kali paraŭnoŭvać pa nižniaj miažy dyjapazonu, hetaja ličba pieravyšaje sukupnaje nasielnictva ŭsiaho Aršanskaha rajona, kali pa vierchniaj — paraŭnalnaja z kolkaściu nasielnictva ŭ Baranavičach.
Ekśpierty miarkujuć, što asnoŭnaja častka biełarusaŭ-mihrantaŭ (ad 96,7 da 111,5 tysiačy) ujechała na terytoryju Polščy. Kolkaść biełaruskich emihrantaŭ u Litvu ŭ 2021-2022 hadach BEROC aceńvaje u ličbach ad 25,4 da 37,9 tysiačy. Za 2021-2022 hod u inšyja krainy ES, akramia Litvy i Polščy, dla pastajannaha pražyvańnia mahli pryjechać kala 21,5 tysiačy biełarusaŭ.
Jak heta suadnosicca z aficyjnaj statystykaj? Zhodna ź joj, u 2022 hodzie, kab pracaŭładkavacca za miažoj, z krainy źjechali 5590 biełarusaŭ. U hetym vypadku ŭličvajucca tolki tyja ludzi, jakija zaklučyli pracoŭny kantrakt dla pracy za miažoj pry padtrymcy jurasobaŭ i IP, jakija dapamahajuć pracaŭładkoŭvacca.
Ź inšaha boku, jość statystyka ŭnutry krainy, jakaja supiarečyć hetym danym. Tak, čysty adtok pracaŭnikoŭ IT-siektara na rynku pracy skłaŭ 17226 čałaviek. Taksama ŭ 2021 i 2022 hadach nazirałasia ŭstojlivaje skaračeńnie ŭzroŭniu zaniataści adnačasova sa źnižeńniem i tak nievysokaha ŭzroŭniu biespracoŭja.
«Naša Niva» — bastyjon biełaruščyny
PADTRYMAĆDanyja novaha daśledavańnia pa biełarusach u Litvie — niečakanyja vysnovy
«Damokłaŭ Mieč». Kanał «Biełorusskij siłovik» nastolki prarasijski, što mnohija mierkavali, što heta rasijanie jaho viaduć. Nie, za im staić supierahient Łukašenki9
Kamientary