Былы кіраўнік КДБ, які палохаў беларусаў пацукамі, здае катэдж у Драздах па $3500 на месяц — шмат ФОТА
«Элітны катэдж у раёне Дразды» — аб'ява з такім зместам з'явілася на сайтах нерухомасці ў пачатку лістапада. Уласнік прапануе дом у арэнду на працяглы тэрмін. Кошт — $3500 на месяц. Гэта ў 8 разоў больш за сярэдні заробак у краіне.
Як стала вядома «Нашай Ніве», гаспадары дома — сям'я былога старшыні КДБ Сцяпана Сухарэнкі. Таго самага, які палохаў беларусаў пацукамі ў водаправодзе.
«Элітны катэдж, лес побач, вадаём побач, возера побач, рака побач, маляўнічае месца, душавая кабіна, альтанка, гараж, ландшафтны дызайн, ахова, еўрааддзелка, камін, месца для шашлыкоў, мэбля, тэлевізар, DVD прайгравальнік, спадарожнікавае тэлебачанне, халадзільнік, інтэрнэт», — такімі перавагамі заваблівае сям'я Сухарэнка патэнцыйных жыхароў дома.
Надзел пад будаўніцтва спецслужбіст атрымліваў у тым жа парадку, што і астатнія чыноўнікі — у падарунак ад кіраўніцтва краіны.
Праўда, за час будаўніцтва Сухарэнку ў той час ужо адправілі ў адстаўку з пасады старшыні КДБ і накіравалі паслом у Арменію.
Можа, кошт $3500 абгрунтоўваецца прэзентабельнымі суседзямі? З аднаго боку жыве былы міністр аховы прыродных рэсурсаў і аховы навакольнага асяроддзя Уладзімір Цалко, услед за ім — былы губернатар Міншчыны Барыс Батура.
У іншы бок ідуць катэджы Сяргея Ткачова, былога эканамічнага дарадцы Лукашэнкі, і экс-міністра замежных спраў Сяргея Мартынава.
Цяпер дом належыць дачцэ Сухарэнкі. Ён перапісаў на яе нерухомасць два гады таму. На жаль, Таццяна адмовілася каментаваць «Нашай Ніве» сваю аб'яву на сайтах агенцтваў нерухомасці.
***
Сцяпан Сухарэнка
Нарадзіўся ў 1957 годзе ў вёсцы Здудзічы Светлагорскага раёна. Скончыў Беларускі тэхналагічны інстытут (цяпер БДТУ), Вышэйшыя курсы КДБ СССР, Акадэмію кіравання пры прэзідэнце Беларусі (завочна).
Працаваў у структурах КДБ з 1984 да 2007 года, на працягу 2005—2007 узначальваў арганізацыю.
Праславіўся перад прэзідэнцкімі выбарамі — 2006, калі на прэс-канфэрэнцыі заявіў, што апазіцыя рыхтуе шэраг правакацый, у тым ліку збіраецца ўкідваць дохлых пацукоў у сістэму водазабеспячэння. Расследаванне не скончылася нічым, аднак Сухарэнка і пазнейшых інтэрв'ю настойваў на праўдзівасці гісторыі з пацукамі.
У 2008—2015 Сухарэнка быў паслом у Арменіі, пасля працаваў у Банку развіцця, адкуль сышоў некалькі месяцаў таму.
Мае дачку і сына. Сын Андрэй выступаў у СМІ як прадстаўнік Беларусі ў офісе Рады Еўропы ў Страсбургу.
Тур патлумачыў, што Лукашэнка меў на ўвазе, кажучы пра прызначэнне дырэктараў у прыватныя кампаніі2
Каментары