Суд Маскоўскага раёну Берасьця 20 красавіка прызнаў экстрэмісцкай літаратурай кнігу Зянона Пазьняка «Добрая фатаграфія», а таксама напісаную Зянонам Пазьняком і Валерам Буйвалам кнігу «Абарона Курапатаў. Народны мэмарыял».
Справа разглядалася па заяве Берасьцейскай мытні, перадае «Эўрапейскае радыё».
Судзьдзя Тацяна Гаргадзэ задаволіла заяву мытні.
Па два экзэмпляры кніг «Добрая фатаграфія» і «Абарона Курапатаў. Народны мэмарыял» мытнікі забралі 27 верасьня 2015 году ў Алеся Чахольскага на беларуска-польскай мяжы.
Адказны сакратар Кансэрватыўна-хрысьціянскай партыі БНФ вяртаўся з Польшчы, дзе і набыў гэтыя выданьні.
Экспэртная камісія Берасьцейскай вобласьці па ацэнцы інфармацыйнай прадукцыі знайшла ў гэтых кнігах прыкметы праяў экстрэмізму.
Актывіст дамагаўся, каб рашэньне экспэртнай камісіі было адменена і каб яму вярнулі забраныя кнігі.
23 лютага суд прызнаў паседжаньне экспэртнай камісіі правамоцным.
«Відавочна, што гэта палітычная справа, палітычная замова. Экспэртнае заключэньне — нікчэмнае. Фактычна за сем месяцаў змаганьняў мы давялі, што экспэртная камісія складаецца з заангажаваных асобаў. Высьветлілася, што ўсе яны — сябры «Белай Русі», — сказаў «Эўрарадыё» Алесь Чахольскі.
Чахольскі мае намер абскарджваць цяперашняе судовае рашэньне аб прызнаньні экстрэмісцкімі кніг «Добрая фатаграфія» і «Абарона Курапатаў. Народны мэмарыял».
Кніга «Добрая фатаграфія» — зборнік эсэ пра фота, зьнятыя ў краінах Эўропы і Амэрыкі зь сярэдзіны XIX стагодзьдзя і да нашых дзён. Кніга «Абарона Курапатаў. Народны мэмарыял» — зборнік артыкулаў, успамінаў і фатаздымкаў.
Двайнікі вядомых беларусаў. І не кажыце, што не задумваліся пра іх падабенства12
Каментары