ЭЗ і Расея — галоўныя рынкі
Паводле Мінстату, 43,4% беларускага экспарту прыпадае на краіны Эўразьвязу, 36% — на Расею. Агульная лічба аб’ёму экспарту за дзевяць сёлетніх месяцаў склала $11,6 млрд (у Расею — 4,2 млрд, у Галяндыю — 1,7 млрд, Брытанію — 773 млн, Украіну — 700 млн, Польшчу — 628 млн). Галоўныя экспартныя галіны — нафтапрадукты, тэлевізары, грузавікі, калійныя ўгнаеньні, лес, мэталапракат.
Рэйтынг банкаў
Банкаўскае агенцтва пры БДУ склала рэйтынг беларускіх банкаў па прыцягненьні ўкладаў насельніцтва. Паводле яго, 57% ад агульнай колькасьці ўкладаў ад фізычных асобаў знаходзяцца ў «Беларусбанку», 12% — у «Белаграпрамбанку», 9,28% — у «Белпрамбудбанку», 8,6% — «Белынвэстбанку», 4,8% — у «Белзамежэканамбанку», 4,4% — у «Прыёрбанку». У рэйтынг трапілі 22 банкі з 31, што дзейнічаюць у Беларусі.
Увесну — заяўка, увосень — FAO
Беларусь прынята ў Сусьветную харчовую й сельскагаспадарчую арганізацыю ААН (FAO). Сябрамі арганізацыі зьяўляюцца 188 краінаў плюс Эўразьвяз. Заяўку на ўступленьне ў FAO падала ўвесну, прынялі на паседжаньні ў Рыме 18—21 лістапада. Першы намесьнік міністра сельскай гаспадаркі Надзея Каткавец паабяцала рэфармаваць сельскую гаспадарку й лясны сэктар, павысіць эфэктыўнасьць сыстэм абароны навакольнага асяродзьдзя.
Далоў чужародны элемэнт!
Пры канцы году адбудзецца конкурс праектаў на будаўніцтва бізнэс-цэнтру з гандлёвымі памяшканьнямі па былым пр.Машэрава, 9 (там цяпер знаходзіцца інтэрнат БДУ, які мусіць быць перанесены на праспэкт Дзяржынскага). Згодна з рашэньнем Менгарвыканкаму, новы будынак па пр.Машэрава зьявіцца не пазьней за 2012 год.
Біржа прадае цукар
6 сьнежня Беларуская ўнівэрсальная таварная біржа правядзе таргі па продажы на экспарт айчыннага цукру. Выставяць 20 тысяч тон. Гэта зьвязана з тым, што з продажам цукру ў Расею ўзьніклі праблемы: на наш цукар павялічана мыта ды распачата антыдэмпінгавае расьсьледаваньне.
ЗД
«А што ў вас за праблемы? Далёка да Мінска ці няма каму падвезці?» Публічная пікіроўка Лукашэнкі і Пашыняна12
Каментары