“Persanaž”, “Elementarnyja čaścinki”, “Metamarfozy”, “Deža viu”, “Mistyfikacyja”, “Djabał nosić Prada”
Novyja filmy na dyskach
Deža viu (Deja Vu)
ZŠA, 2006, kalarovy, 128 chv.
Režyser: Toni Skot
Roli vykonvajuć: Denzeł Vašynhtan, Veł Kiłmer, Džejmz Kevizeł, Paŭła Patan, Adam Hołdberh
Žanr: Detektyŭny trymcieńnik z elementami fantastyki
Adznaka: 6 (z 10)
Ahient FBR Dah Karlinh šukaje terarysta, jaki padarvaŭ parachod. Śledčamu prapanujuć novuju technalohiju, jakaja dazvalaje padrabiazna sačyć za minułymi padziejami, jakija zafiksavanyja sietkaju spadarožnikaŭ. Ale ŭ pracesie vyšuku Dah adčuvaje, što ŭsio heta ŭžo kaliści bačyŭ...
Režyser Toni Skot zrabiŭ dynamičny trymcieńnik ź niečakanym fantastyčnym pavarotam. Pieraśled terarysta na aŭto nahadaje klasyčnuju scenu z “Francuskim suviaznym” – chacia pieraśled nabyŭ “virtualny” charaktar palavańnia za źnikłym pryšłym.A historyja pra mašynu času (dakručanaja meladramatyčnym drajvam) nikoli nie vyhladała takoj realnaju i žyvoj.
Djabał nosić “Prada” (The Devil Wears Prada)
ZŠA, 2006, kalarovy, 109 chv.
Režyser: Dejvid Frankiel
Roli vykonvajuć: Merył Stryp, En Heteŭej, Emili Błant, Steńli Tučy, Sajman Bejkier
Žanr: Drama
Adznaka: 6 (z 10)
Naminacyja na “Oskar” za najlepšyja kaściumy i najlepšuju žanočuju rolu
Pravincyjnaja žurnalistka Andrea traplaje ŭ sakratarki da despatyčnaj redaktarki modnaha časopisu Mirandy Prystli. Andrea moža dasiahnuć karjernych pośpiechaŭ (prajaviŭšy pry hetym nievierahodnuju vynachodlivaść), ale za košt svaich siabroŭ, svajoj lubovi... i svajoj dušy..
Dydaktyčnaja historyja pra spakusy, dzie ŭ roli djabła vystupaje modnaja ściarvoza, a hlamurny śviet symbalizuje piekła. Podyjumnyja kaściumy, jaskravyja kolery – i raźličana-talenavitaja Merył Stryp na abcasach.
Mistyfikacyja (The Hoax)
ZŠA, 2006, kalarovy, 115 chv.
Režyser: Łase Chałstrem
Roli vykonvajuć: Ryčard Hir, Alfred Malin, Hoŭp Devis, Marša Hej Harden, Stenli Tučy, Džuli Delpi
Žanr: Drama
Adznaka: 5 (z 10)
Niaŭdačlivy piśmieńnik Klifard Irvinh (Ryčard Hir) prydumlaje, što składaje bijahrafiju ekscentryčnaha milijardera Hovarda Hjuza, jaki, maŭlaŭ, pahadziŭsia supracoŭničać z hierojem. Hjuz, jaki viadomy svajoj skandalnaściu j zatvornictvam – łasy kavałak dla vydaŭcoŭ, i pierad Klifardam adčyniajucca ŭsie dźviery.
Hieroj usio hłybiej zakopvajecca va ŭłasnuju mistyfikacyju – i pakrysie sam pačynaje ŭ jaje vieryć.
Cikavaja drama pra chłuśniu i praŭdu, zasnavanaja na realnych padziejach.
Zabłytana-hlamurny Ryčard Hir – i napałochany Alfred Malina (siabra Klifarda).
Metamarfozy (Metamorphosis)
Vuhorščyna – Kanada – Niamieččyna – Vialikabrytanija – Aŭstryja, 2007, kalarovy, 105 chv.
Režyser: Jonia Chodzi
Roli vykonvajuć Krystafer Łambert, Kory Seŭjer, Irena Chofman, Čarli Hołŭej, Dženifer Hajem, Andraš Kiern
Žanr: Hatyčna-maładziovy vampiryčny film
Adznaka: 4 (z 10)
Try maładyja amerykancy vandrujuć pa Vuhorščynie. U darozie jany znajomiacca ź pieknaj dziaŭčynaj, u jakuju zakachaŭsia hałoŭny hieroj – amatar historyi i advakat kryvavaj hrafini Eržebet Batary.
Meta vandroŭki – stary pałac. Ale tam hierojaŭ čakaje sustreča z sapraŭdnymi vampirami.
Internacyjanalnaja kinabryhada skarystałasia słavaj samaha kasavaha vuhorskaha persanažu – Eržebet Batary. Tema “seryjnych zabojstvaŭ” ryfmujecca z vampiryčnaj, prašyvajecca maładziovym słenham – i razhortvajecca ŭ dekaracyjach pałacu (jaki naprykancy stajecca… čystcom!)
Hatyčnaja raskoša ŭ karcinie – małabiudžetna-trešavaja, vampir Krystafer Łambert viadzie doŭhija demahahičnyja hutarki, hieraini viała viskočuć, a niepamierłaja dačka hrafini demanstruje aholenaje cieła j pryjomy karate. Žanravyja štamy, źmiešanyja ŭ kaktejl, pa-svojmu miłyja j pryvabnyja.
Persanaž (Dzivośniej za vydumku) (Stranger Than Fiction)
ZŠA, 2006, kalarovy, 113 chv.
Režyser: Mark Forster
Roli vykonvajuć: Ŭił Fereł, Dastyn Chofman, Ema Tompsan, Kŭin Łacifa, Mehi Džylenhał
Žanr: Trahikamedyja z fantastyčnymi elementami
Adznaka: 6 (z 10)
Adnojčy zanudlivy mytar Harald Kryk čuje hołas, jaki kamentuje ŭsie jahonyja dziejańni. Hieroj nia źjechaŭ z hłuzdu, prosta piśmieńnica Karen Ejfiel składaje pra jaho knihu. Kab vyznačycca sa svaim losam Harald źviartajecca pa dapamohu da litaraturaznaŭcy (Dastyn Chofman). Vyhladaje, što mytar – hieroj kamedyi. Ale piśmieńnicca-suicydnica zaŭždy zabivaje svaich persanažaŭ…
Niestandartnaja trahikamedyja ź luboŭju, litaraturaj – i daścipnym zakadravym hołasam.
Elementarnyja čaścinki (Elementarteilchen)
Niamieččyna, 2006, kalarovy, 113 chv.
Režyser: Oskar Roler
Roli vykonvajuć: Moryc Blajbtroj, Krystyjan Ulmen, Marcina Hiedek, Franka Patente
Žanr: Drama pavodle ramanu Mišela Ŭelbieka
Adznaka: 6 (z 10)
Maci Bruna j Michaela hipavała – i zusim nie cikaviłasia svaimi dziećmi. Michael staŭsia hienetykam, jaki maryć źmianić čałaviečaje cieła, a Bruna pakutuje na lichamankavy seks.
Aćvierazieńnie paśla seksualnaj revalucyi, depresija – i sproba znajści luboŭ, kali ŭsio abniasłaŭlena. “Novy dzivosny śviet” Ołdasa Chakśli naprykancy.
Talenavita-nadryŭny Moryc Blajbtroj – i spakuśliva-samazabojčaja Franka Patente.
«Joj było vielmi drenna apošnim časam». Znajomyja pra Śviatłanu Krucikavu, jakaja skončyła žyćcio samahubstvam paśla cisku milicyi3
Kamientary