Eks-kandydat u prezidenty Biełarusi Dźmitryj Us 22 sakavika nakiravaŭ zajavu z paviedamleńniem ab uručeńni na imia prakurora Minska Mikałaja Kulika. Palityk paviedamiŭ, što jon skardzicca na dziejańni śledčaha Anatola Sukały, jaki viadzie jaho kryminalnuju spravu.
«Abvinavačvańnie śledstva nie adpaviadaje ni materyjałam spravy, ni maim fizičnym dziejańniam», — skazaŭ Us. Pavodle jaho mierkavańnia, dziejańni śledčaha padpadajuć pad častku 2 artykuła 188 Kryminalnaha kodeksa (paklop, <…> spałučany z abvinavačvańniem va ŭčynieńni ciažkaha ci asabliva ciažkaha złačynstva).
«Mianie abvinavačvajuć u tym, što, vystupajučy na pieršym kanale telebačańnia i pa radyjo, ja zaklikaŭ vybarščykaŭ pryjści na płošču 19 śniežnia,
choć pa radyjo ja naohuł nie vystupaŭ.
Mianie taksama abvinavačvajuć u zaklikach praź internet», — paviedamiŭ Us. Jon zajaviŭ, što hetyja źviestki nie adpaviadajuć rečaisnaści.
Us paviedamiŭ taksama, što śledstva vystaviła jamu abvinavačvańnie ŭ arhanizacyi masavych biesparadkaŭ na toj padstavie, što niby ŭ dzień prezidenckich vybaraŭ 19 śniežnia jaho syn Ivan padličyŭ kolkaść milicejskich aŭtobusaŭ, a jon, u svaju čarhu, byccam by pieradaŭ hetyja źviestki Mikałaju Statkieviču. Us śćviardžaje, što ŭ płanavańni i arhanizacyi masavych biesparadkaŭ nie ŭdzielničaŭ.
«Śledstva taksama abvinavačvaje mianie va «ŭpuščanym prybytku restarana „Makdonalds“ na sumu 8,4 młn. biełaruskich rubloŭ», — skazaŭ Us.
Jak paviedamiŭ BiełaPAN mieniedžer pa markietynhu i suviaziach z hramadskaściu ZP «Restarany Makdonalds» Artur Juran,
nijakich iskavych patrabavańniaŭ «Makdonalds» Dźmitryju Usu nie vystaŭlaŭ.
Pavodle słoŭ Usa, ciapier jon znajomicca z materyjałami spravy, jakaja zajmaje vosiem tamoŭ. Jon chacieŭ zaklučyć dahavor z advakackaj firmaj, adnak jaho admovilisia abaraniać 30 advakataŭ, pabajaŭšysia pazbavicca licenzii.
Byłym kandydatam u prezidenty Mikałaju Statkieviču i Dźmitryju Usu śledčym upraŭleńniem papiaredniaha rasśledavańnia HUUS Minharvykankama pradjaŭlena abvinavačvańnie va ŭčynieńni złačynstva, praduhledžanaha častkaj 1 artykuła 293 Kryminalnaha kodeksa Respubliki Biełaruś (masavyja biesparadki).
U im havorycca, što «arhanizacyja masavych biesparadkaŭ, jakija supravadžajucca hvałtam nad asobaj, pahromami, padpałami, źniščeńniem majomaści, uzbrojenym supraciŭleńniem pradstaŭnikam ułady, karajecca pazbaŭleńniem voli na termin ad piaci da piatnaccaci hadoŭ».
Anton Taras, BiełaPAN.
38-hadovaha vajskovaha lotčyka sudziać za abrazu Łukašenki2
Kamientary