Pa $200 tysiač za kožnaha zabitaha amierykanca. Jak rasijskaja raźviedka płaciła talibam za terakty

«Taliban» zabivaŭ našych sałdat. Mnohich ź ich. […] I tady ja skazaŭ: Abduł, nie rabi tak bolš! (Abduł — heta kiraŭnik «Talibana».) I ja skazaŭ: Abduł, kali ty budzieš praciahvać hetak sama, u ciabie buduć prablemy! I jon spytaŭ: čamu ty pasyłaješ mnie fota majho doma? A ja skazaŭ: ty sam pavinien heta zrazumieć. I my zaklučyli pahadnieńnie — vasiamnaccać miesiacaŭ jany nikoha nie zabivali».

Tak u debatach z Kamałaj Charys u vieraśni 2024 hoda Donald Tramp abmalavaŭ svajo ŭjaŭleńnie abvastreńnia ŭ Afhanistanie, jakoje adbyłosia padčas jahonaha pieršaha terminu. Praź miesiac jon słova ŭ słova pierakazaŭ hetuju historyju ŭ intervju Džo Rohanu.

Ci sapraŭdy niešta padobnaje na taki dyjałoh mieła miesca — nieviadoma, ale ŭ pieryjad z 2016 pa 2020 hod u Afhanistanie adbyłasia sieryja kryvavych teraktaŭ, skiravanych suprać amierykanskich sałdat i sił kaalicyi, a skončylisia hetyja ataki tolki paśla taho, jak Tramp u pačatku 2020 hoda zaklučyŭ uhodu z talibami ab vyvadzie amierykanskich vojskaŭ.

U svaim tvorčym pierakazie Tramp abyšoŭ bokam adnu niemałavažnuju detal: śpiecsłužbam ZŠA i Afhanistana było viadoma, što hetyja terakty finansavała Rasija.

U 2020 hodzie ŭ presu trapiła ŭciečka dakładu amierykanskich śpiecsłužbaŭ pra toje, jak rasijskija ŭłady płacili talibam za zabojstva sałdat zachodniaj kaalicyi ŭ toj čas, kali vialisia mirnyja pieramovy z paŭstancami.

Kiraŭnictva «Talibana» adprečyła abvinavačvańni, zajaviŭšy, što ataki na amierykanskija vojski byli stychijnymi, samafinansavanymi i papiaredničali ŭhodzie z administracyjaj Trampa, paśla jakoj jany spynili napadać na amierykancaŭ.

Bieły dom admaŭlaŭ, što ŭ jaho jość kankretnyja źviestki pra takuju tajemnuju rasijskuju prahramu. U lipieni 2020 hoda ministr abarony ZŠA Mark Eśpier zajaviŭ Kamitetu pa ŭzbrojenych siłach Pałaty pradstaŭnikoŭ, što «…abaronnyja raźviedvalnyja ahienctvy nie zmahli paćvierdzić vysnovy hetaj spravazdačy».

Džo Bajden, na toj momant kandydat u prezidenty, abvinavaciŭ administracyju Trampa va ŭtojvańni dokazaŭ napadaŭ, arhanizavanych Rasijaj. Adnak u 2021 hodzie Bieły dom užo pry samim Bajdenie pieramienšyŭ značeńnie spravazdač, nazvaŭšy ich zasnavanymi na dokazach nizkaha ci siaredniaha ŭzroŭniu, jakija abapiralisia tolki na «finansavyja tranzakcyi i zajavy zatrymanaha».

Rasśledavańnie The Insider nie tolki vyjaviła dokazy, jakija paćviardžajuć spravazdaču raźviedki 2020 hoda, ale i vyśvietliła, što śpiecsłužby Afhanistana dali ŭładam ZŠA fakty isnavańnia prahramy i aryštavali niekalkich klučavych pamahatych schiemy ŭznaharodžańniaŭ. Pry hetym amierykanskim i afhanskim śpiecsłužbam było mała viadoma pra ludziej, jakija kiravali prahramaj z rasijskaha boku, pakolki mnohija z rasijskich kurataraŭ byli viadomyja tolki pa pazyŭnych abo psieŭdanimach.

Novyja danyja, vyjaŭlenyja The Insider, zapaŭniajuć prabieły, identyfikujuć aficeraŭ, jakija chavajucca za kodavymi imionami, — heta aficery ŭsio toj ža vajskovaj čaści 29155, viadomaj pa atručvańni Skrypala i dyviersijach u Jeŭropie.

Urešcie, danyja, vyjaŭlenyja The Insider, śviedčać pra toje, što rasijskaja prahrama pa nackoŭvańni roznych paŭstanckich hrupovak na centralny ŭrad i amierykanskaje pradstaŭnictva była značna bolš ambicyjnaj i praciahvałasia značna daŭžej, čym prahrama ŭznaharodžańniaŭ «Talibana», zhadanaja ŭ dakładzie 2020 hoda.

Jak Rasija ładziła dyviersii ŭ Afhanistanie

Sem (imia źmieniena), aficer amierykanskaj armii, jaki słužyŭ u Bahramie na najbujniejšaj vajskovaj bazie ZŠA ŭ Afhanistanie, uspaminaje, jak pračnuŭsia ad huku vybuchu kala piataj-šostaj hadziny ranicy 11 śniežnia 2019 hoda. Jon adrazu zrazumieŭ, što heta nie zvyčajny minamiotny abo rakietny abstreł: «Ja nie pamiataju, ci zavyli sireny ŭ toj momant, ale ŭsie nadziavali ryštunak, chapalisia za zbroju».

Hruzavik, načynieny vybuchoŭkaj, urezaŭsia ŭ ścianu, jakaja atačała zakinutuju balnicu za hałoŭnaj bramaj Bahrama, što nikim nie achoŭvałasia.

Zatym druhi hruzavik vysadziŭ atrad uzbrojenych kulamiotami terarystaŭ, niekatoryja byli ŭ pajasach śmiarotnikaŭ. Jany zabarykadavalisia ŭnutry balnicy, spadziejučysia ŭciahnuć abaroncaŭ Bahrama ŭ boj unutry budynka, jakaja ciapier stała dynamičnaj pastkaj.

Zamiest hetaha sałdaty afhanskich Nacyjanalnych sił biaśpieki adkryli pa joj ahoń, uklučajučy viertaloty. Boj skončyŭsia nieŭzabavie paśla taho, jak dva F-16 skinuli bomby na budynak.

«My bambili našu ŭłasnuju bazu, — z žacham uspaminaje Sem. — Jak minimum adzin teraryst vyžyŭ paśla bambardziroŭki i pasprabavaŭ biehčy, jaho źniaŭ snajpier».

Čaćviora amierykanskich vajskoŭcaŭ atrymali ranieńni. Na bazie tady nichto nie zahinuŭ, ale vybuch bomby, ustalavanaj na aŭtamabili, razburyŭ damy ŭ prylehłym žyłym rajonie, zabiŭšy dvuch afhanskich mirnych žycharoŭ i paraniŭšy jašče 80.

«Raźnia była b našmat bolš kryvavaj, kali b terarysty vyrašyli nie adsiedžvacca ŭ balnicy», — kaža Sem.

Za niekalki miesiacaŭ da taho, 1 sakavika, ataka na vajskovy łahier Šarab u pravincyi Hilmiend skončyłasia dla sałdat kudy horš. Tady bajeviki «Talibana» i terarysty-śmiarotniki, pieraapranutyja sałdatami kaalicyi, pratačylisia na terytoryju vajskovaj bazy, dzie raźmiaščaŭsia 215-y korpus armii Afhanistana, a taksama harnizon ź niekalkich sotniaŭ marskich daradcaŭ ZŠA.

Adzin z terarystaŭ-śmiarotnikaŭ padarvaŭ siabie ŭ stałovaj, adnačasova inšyja bajeviki «Talibana» adkryli stralbu. U vyniku ataki zahinuli 23 afhanskija sałdaty (z amierykancaŭ nichto nie paciarpieŭ).

Heta tolki dva prykłady z mnostva padobnych teraktaŭ, jakija adbylisia ŭ pieryjad z 2016 pa 2019 hod.

The Insider pahutaryŭ z čatyrma byłymi afhanskimi dziaržaŭnymi słužboŭcami, troje ź jakich zajmali kiraŭničyja pasady va Upraŭleńni nacyjanalnaj biaśpieki (UNB), byłym hałoŭnym ahienctvie biaśpieki, da taho jak «Taliban» uzurpavaŭ uładu ŭ krainie ŭ 2021 hodzie. Usie jany niezaležna adzin ad adnaho raskazali, što hetyja terakty finansavalisia Rasijaj.

Rasija sprabavała ŭmiešvacca ŭ situacyju ŭ krainie adrazu paśla stvareńnia časovaj administracyi Afhanistana ŭ śniežni 2001 hoda. Pieršapačatkova Kreml sabatavaŭ interviencyju ŭ krainu pad kiraŭnictvam ZŠA praz svaje sietki ŭ miascovych śpiecsłužbach i ŭ vojsku, stvoranyja padčas savieckaj akupacyi Afhanistana. Adnak hetyja sietki šmat u čym stracili svaju karysnaść paśla reformaŭ i lustracyi Afhanskich nacyjanalnych sił abarony i biaśpieki (ANSAB), praviedzienych pad kiraŭnictvam ZŠA.

Tady, sa słoŭ byłych čynoŭnikaŭ, Iran prapanavaŭ pasiarednickija pasłuhi ŭ stasunkach z kamandzirami «Talibana» dla pastavak im rasijskaj zbroi i hrošaj. Paśla HRU ŭstalavała pramyja kantakty z «Talibanam». Spačatku heta była viarboŭka asobnych bajevikoŭ, zatym pastaŭki zbroi i bojeprypasaŭ praz Tadžykistan i, narešcie, finansavańnie teraktaŭ.

Byłyja afhanskija dziaržsłužboŭcy, ź jakimi pahavaryŭ The Insider, zajavili, što ŭ kołach miascovych siłavikoŭ ni dla kaho nie było sakretam, što Rasija padtrymlivaje «Taliban» suprać ANSAB i kaalicyjnych sił. Jany śćviardžajuć, što ŭ hetym nie było sumnieńniaŭ i ŭ zachodnich partnioraŭ, uklučajučy CRU.

Adnak, jak zajavili byłyja afhanskija dziaržsłužboŭcy, mała chto moh padazravać, što Rasija vyjdzie daloka za ramki svajoj zvyčajnaj roli ŭ Afhanistanie i pačnie niepasredna prapanoŭvać uznaharody za zabojstvy pradstaŭnikoŭ kaalicyjnych sił. 

Pa słovach Duhłasa Łondana, jaki adkazvaŭ u CRU za baraćbu z teraryzmam u Paŭdniovaj i Paŭdniova-Zachodniaj Azii z 2016 pa 2018 hod,

«u Kramli chacieli, kab «Taliban» traciŭ bolš času na zabojstvy amierykancaŭ i mienš na zabojstvy afhancaŭ. Jany prapanoŭvali finansavaje ŭznaharodžańnie, kab zaachvocić bajevikoŭ brać na siabie bolšuju ryzyku, napadajučy na amierykanskija celi ŭ Afhanistanie».

UNB Afhanistana daviedałasia pra hetuju praktyku ŭ siaredzinie 2019 hoda padčas dopytaŭ zatrymanych bajevikoŭ «Talibana». Pa śladach hetych dopytaŭ UNB udałosia aryštavać bolš za 10 čałaviek z pravincyj Kabuł, Kunduz i Łahar, jakija pracavali na HRU ŭ jakaści kurjeraŭ i pieravozili hrošy pad kiraŭnictvam byłoha kantrabandysta z Kunduza pa imieni Rachmatuła Azizi.

Farmalna Azizi ŭznačalvaŭ kampaniju pa handli kaštoŭnymi kamianiami ŭ Afhanistanie, zarehistravanuju na imia jaho baćki. UNB padazravała, što prynamsi častka ŭznaharodžańnia pieravodziłasia ŭ krainu praz kantrabandnyja kaštoŭnyja kamiani.

UNB atrymałasia źviazać hrupu Azizi sa zhadanymi vyšej napadami na siły ZŠA i kaalicyi.

Uznaharody ŭ siarednim składali pa $200 tysiač za kožnaha zabitaha sałdata ZŠA ci kaalicyi (za afhanskich sałdat płacili mienš). U ahulnym liku, jak padličyŭ adzin z byłych supracoŭnikaŭ UNB, Rasija vypłaciła «Talibana» nie mienš za $30 młn.

Taksama, pavodle jaho słoŭ, bujnyja sumy davali i inšym hrupoŭkam, što kanfliktavali z uładami, u tym liku płaciažy ŭ pamiery $15 młn atrymlivali lidary Paŭnočnaha aljansu ŭ 2017 i 2018 hadach.

The Insider udałosia znajści dokazy, jakija paćviardžajuć zajavy byłych supracoŭnikaŭ UNB i identyfikujuć kankretnych aficeraŭ HRU i FSB, jakija majuć dačynieńnie da hetaj apieracyi.

Afhanskija kurjery: praz kaho HRU pieradavała hrošy terarystam

Danyja The Insider nie tolki paćviardžajuć zajavy byłych aficeraŭ UNB, ale i dadajuć detali, raniej nie viadomyja afhanskim i amierykanskim śledčym. Jak vyśvietliŭ The Insider, siamja Azizi była zavierbavanaja padraździaleńniem 29155 HRU nie paźniej za 2015 hod, paśla čaho vykarystoŭvałasia na praciahu mnohich hadoŭ. Urešcie jana była vyviezienaja i atrymała prytułak dy pašparty na novyja imiony ŭ Rasii.

Klučavym členam siamji Azizi i padazravanym UNB u arhanizacyi schiemy pa pieradačy ŭznaharodžańniaŭ źjaŭlajecca Rachmatułła Azizi (1978 hoda naradžeńnia). U adroźnieńnie ad inšych členaŭ siamji, jon paźbieh aryštu, bo ŭciok u Rasiju da raskryćcia apieracyi ŭ 2019 hodzie.

Pavialičyć

Jak vyśvietliŭ The Insider, Rachmatuła Azizi dahetul žyvie ŭ Maskvie. Pry pierasiačeńni miažy jon vykarystoŭvaŭ pašparty z HRU-šnaj sieryi i lotaŭ pa adnym braniravańni z členami vajskovaj čaści 29155.

U Rasii Azizi źjaviŭsia nie paźniej za listapad 2015 hoda, kali jon atrymaŭ unutrany pašpart i pravy kiroŭcy na imia Rachima Achmadava, jaki naradziŭsia ŭ 1977 hodzie ŭ Astrachani. Numar unutranaha pašparta, vydadzienaha na hetaje imia, tolki dźviuma apošnimi ličbami adroźnivajecca ad pašparta «Rusłana Bašyrava» (Anatola Čapihi), jaki atruciŭ u Sołśbiery Siarhieja Skrypala niervova-paralityčnym rečyvam «Navičok».

Praz hod, u žniŭni 2016 hoda, «Achmadavu» byŭ vydadzieny novy zamiežny pašpart — i znoŭ z HRU-šnaj sieryi. A ŭ kastryčniku 2017 hoda Azizi atrymaŭ jašče adzin pašpart, jaki choć i byŭ z HRU-šnaj sieryi, ale hetym razam ź jahonymi sapraŭdnymi imieniem i dataj naradžeńnia — užo z rasijskim hramadzianstvam.

Pavialičyć

Vykarystoŭvajučy svaju falšyvuju asobu, u vieraśni 2017 hoda «Achmadaŭ» zarehistravaŭ rasijskuju kampaniju pad nazvaj ARIGS Ltd, jakaja zajmałasia handlem ałmazami i inšymi kaštoŭnymi kamianiami. Charakterna, što, pa słovach byłych aficeraŭ UNB, prykładna ŭ toj ža čas jahony baćka zarehistravaŭ padobnuju pa tematycy kampaniju ŭ Kabule.

UNB vykazała zdahadku, što handal kaštoŭnymi kamianiami pamiž Rasijaj i Afhanistanam byŭ adnym ź mietadaŭ pierapampoŭvańnia srodkaŭ dla HRU-šnaj prahramy ŭznaharodžańniaŭ.

Pavodle źviestak handlovaha rejestra, ARIGS spyniła dziejnaść u 2020 hodzie i była likvidavanaja ŭ 2022 hodzie. U jakaści juzerpika na adnoj sa staronak u fejsbuku Azizi pastaviŭ fatahrafiju Pucina.

Na toj ža staroncy jon paznačyŭ 17 listapada 2017 hoda jak datu pačatku svajoj pracy ŭ ARIGS, kampanii pa handli kaštoŭnymi kamianiami. Hetaja kampanija zarehistravanaja na vulicy Narodnaha Apałčeńnia, 34, za niekalki chvilin chady ad štab-kvatery HRU. Mnohija rasijskija špijony atrymali ad dziaržavy kvatery mienavita na hetaj vulicy.

Pavialičyć

U pieryjad z 2017 pa 2019 hod Azizi — spačatku jak «Achmadaŭ», a z 2018 hoda pad svaim imieniem — prylataŭ z Rasii ŭ Afhanistan jak minimum 13 razoŭ. Charakterna, što jon prysutničaŭ u Afhanistanie padčas niekalkich klučavych napadaŭ, jakija UNB ličyć apłačanymi HRU.

Afhanskaja raźviedka praviała sieryju rejdaŭ u 2019 hodzie ŭ Kabule i na poŭnačy Afhanistana, kanfiskavaŭšy «kala $650 tysiač» u domie Rachmatuły Azizi, jaki paśpieŭ źbiehčy ŭ Rasiju. Byłyja aficery UNB raskazali The Insider, što ŭsie zatrymanyja kurjery HRU byli vychadcami z adnoj z troch afhanskich pravincyj: Kabuła, Łahara i Kunduza.

Pavodle źviestak UNB, hałoŭnym kontrahientam Azizi ŭ «Talibanie» byŭ Chadžy Machamied Ajub, narkahandlar z pravincyi Hilmiend, jakoha afhanskaja słužba biaśpieki aryštavała ŭ studzieni 2020 hoda:

«Ajub byŭ hałoŭnaj kantaktnaj asobaj Azizi dla «Talibana» ŭ kiroŭnaj radzie hetaj terarystyčnaj arhanizacyi — Kvieckaj Šury, — skazaŭ The Insider adzin z byłych aficeraŭ UNB. — Ajub vystupiŭ pasiarednikam u pahadnieńni z «Talibanam» ab napadzie na łahier Šarab u Hilmiendzie. Jon i jahony baćka Machamad Sulejman akazvali finansavuju padtrymku bolšaści lidaraŭ «Talibana», uklučajučy mułu Amara».

Pavialičyć

Siamja Azizi była nie adzinaj jačejkaj, zavierbavanaj i kiravanaj HRU dla finansavańnia «Talibana». Inšaj jačejkaj kiravaŭ afhaniec Zafar Chan Par Huł 1982 hoda naradžeńnia, jaki taksama žyvie ŭ Rasii.

Zafar pracavaŭ pad pramym kiraŭnictvam člena padraździaleńnia 29155 Alaksieja Archipava. U elektronnaj pošcie Archipava možna znajści jahonyja dakumienty, da taho ž jahonaje imia ŭniesiena ŭ dakumienty ab strachavańni mašyny Archipava Toyota Land Cruiser. Jak i Azizi, Zafaru vydali jak pašpart z admysłovaj partyi, zareziervavanaj dla padraździaleńnia 29155, tak i pašpart na imia Zafara Daŭletšyna (proźvišča jany pazyčyli ŭ jahonaj rasijskaj žonki).

Žyvučy ŭ Maskvie, Zafar zavierbavaŭ hrupu afhancaŭ, jakija zatym jeździli ŭ jakaści kurjeraŭ u Afhanistan i susiednija krainy. Sam jon prynamsi adzin raz jeździŭ u Kabuł u sumiesnuju kamandziroŭku z Rachmatułoj Azizi ŭ vieraśni 2017 hoda.

Dvoje z členaŭ jačejki Zafara — Chamied i Nadžybuła Machibzada, čyje skany pašpartoŭ i zaprašeńni na atrymańnie viz byli vyjaŭlenyja The Insider u elektronnaj pošcie Archipava, — kiravali ŭłasnaj kurjerskaj sietkaj «siabroŭ i siamji» ŭ Kabule. Padčas adnoj sa svaich pajezdak u Afhanistan jany naviedali dzień naradžeńnia ź niekatorymi členami svajoj jačejki, jak vidać z pasta ŭ sacyjalnych sietkach adnaho ź ich, dzie jany pjuć koka-kołu.

Pavialičyć

U toj ža dzień, 26 kastryčnika 2016 hoda, adzin z udzielnikaŭ hetaha zastolla — Ismaił Pirzada — apublikavaŭ u «Adnakłaśnikach» dźvie fatahrafii z pačkami dalaraŭ, dzie, miarkujučy pa abjomie, było prykładna $100 tysiač.

Pavialičyć

Pavialičyć

Niekatoryja z afhancaŭ, čyje pašparty i inšyja asabistyja danyja byli znojdzienyja ŭ pierapiskach Archipava i jaho padnačalenych, emihravali ŭ Zachodniuju Jeŭropu pad vyhladam biežancaŭ ad «Talibana».

Vydańnie Der Spiegel, partnior The Insider pa rasśledavańni, vyjaviła, što jak minimum dvoje ź ich źviarnulisia pa prytułak u Hiermaniju nieŭzabavie paśla naviedvańnia Rasii pa zaprašeńniach, atrymanych ad HRU. Adzin ź ich — 27-hadovy afhaniec (imia viadomaje The Insider, ale nie nazyvajecca ŭ intaresach śledstva), jaki zajechaŭ u Hiermaniju z Rasii viasnoj minułaha hoda i ciapier žyvie ŭ Brandenburhu. Druhi, taksama pryjechaŭšy z Rasii, paprasiŭ prytułku ŭ Nižniaj Saksonii, dzie i žyvie ź leta 2023 hoda. Abodvum užo admovili ŭ prytułku, ale nie departavali.

Byŭ i treci afhaniec, ale jamu niamieckija ŭłady admovili va ŭjeździe. Prynamsi, adzin z małodšych bratoŭ Azizi, Chasibuła, dahetul zastajecca ŭ Maskvie z pašpartam na imia Chasiba Achmadava. Pa telefonnym bilinhu vidać, što Chasibuła aktyŭna pracuje z členami padraździaleńnia 29155. Adzin z prabiŭnikoŭ na čornym rynku źviestak admoviŭsia praviarać źviazanuju ź im infarmacyju: «Hety čałaviek pracuje ŭ Administracyi prezidenta, i jahonyja źviestki niedastupnyja».

Pavialičyć

Pavialičyć

Chto kiravaŭ afhanskim prajektam u HRU

Kiraŭnikom prahramy pa finansavańni teraktaŭ, jak vyśvietliŭ The Insider, byŭ hienierał-lejtenant Ivan Kaśjanienka, namieśnik kamandzira čaści 29155. Z 2008 hoda Kaśjanienka słužyŭ vajskovym ataše ŭ Tehieranie i nie paźniej za 2015 hod byŭ pieraviedzieny ŭ Kabuł.

Heta suadnosicca z zajavaj pradstaŭnikoŭ UNB ab tym, što Rasija spačatku dziejničała praz pasiarednictva Irana, a paśla stała finansavać «Taliban» naŭprost. Danyja ab pierasiačeńni miažy, ź jakimi aznajomiŭsia The Insider, śviedčać, što ŭ pieryjad z 2014 pa 2020 hod jon časta padarožničaŭ pamiž Maskvoj i Kabułam.

Pavialičyć

Hałoŭnym suviaznym HRU z «Talibanam» źjaŭlajecca pałkoŭnik Alaksiej Archipaŭ, jaki lotaje z pašpartam na imia Alaksieja Citova. Mietadanyja zvankoŭ i najaŭnyja ŭ rasparadžeńni The Insider masivy elektronnaj pošty śviedčać pra toje, što Archipaŭ adyhryvaŭ hałoŭnuju rolu ŭ arhanizacyi pieršych vizitaŭ delehacyi «Talibana» ŭ Maskvu ŭ listapadzie 2018 hoda, lutym 2019 hoda i mai 2019 hoda.

Archipaŭ i jaho načalniki Aviarjanaŭ i Kaśjanienka, vidać, byli hałoŭnymi inicyjatarami kanfierencyj pra budučyniu Afhanistana, dzie pradstaŭniki «Talibana» siadzieli pobač ź inšymi vysokapastaŭlenymi afhanskimi palitykami, nivodzin ź jakich nie byŭ pradstaŭnikom urada Ašrafa Hani, jaki padtrymlivaŭsia ZŠA. U brašury kanfierencyi Aviarjanaŭ nazvany «śpiecyjalnym pasłańnikam pa Afhanistanie» (choć aficyjna takoj pasady ŭ jaho niama). Archipaŭ paznačany jak «daradca śpiecyjalnaha pasłańnika».

Pavialičyć

Upieršyniu trapić na śled Archipava ŭ The Insider atrymałasia vypadkova — dziakujučy dakumientalnamu filmu 2023 hoda Hollywoodgate pra vyvad vojskaŭ ZŠA z Afhanistana i zachop «Talibanam» kompleksu Hollywood Gate, zakinutaj bazy CRU ŭ Kabule.

Archipaŭ, jaki chavajecca za ciomnymi akularami, pakazany tam jak adna z mnohich rasijskich vysokapastaŭlenych asob, jakija prysutničali na vajskovym paradzie 2022 hoda, pryśviečanym pieršaj hadavinie adnaŭleńnia ŭłady «Talibana». Jašče adna fihura na zadnim płanie — ciapierašni vajskovy ataše Rasii ŭ Iranie Alaksiej Hrabnioŭ, jaki, pa słovach byłych słužbovych asob UNB, adyhraŭ važnuju rolu ŭ stvareńni prahramy finansavańnia teraktaŭ.

Pavialičyć

Trecim klučavym udzielnikam prahramy byŭ jašče adzin člen padraździaleńnia 29155 Arciom Rubcoŭ. Hetaja kampanija vykarystoŭvałasia i inšymi supracoŭnikami HRU. U 2018 hodzie Arciom Rubcoŭ pad falšyvym imieniem Arciom Rubin zapisaŭsia na kurs «Acenka ałmaznaj syraviny» ŭ Hiemałahičnaj akademii MDU i paznačyŭ tuju samuju kampaniju ARGIS, stvoranuju siamjoj Azizi, u jakaści svajho pracadaŭcy pry rehistracyi na kurs. Miarkujučy pa bazie braniravańniaŭ, «Arciom Rubin» lotaŭ u Kabuł pa sumiesnych braniravańniach ź niekalkimi členami hrupy Azizi.

Pavialičyć

Metaj finansavanych Rasijaj teraktaŭ było stvareńnie cisku na ZŠA i krainy kaalicyi, kab padšturchnuć ich da vyvadu vojskaŭ z krainy. Hetaha ŭdałosia damahčysia: u 2020 hodzie Tramp zaklučyŭ z talibami pahadnieńnie ab pastupovym vyvadzie vojskaŭ, što pryviało da zachopu talibami ŭłady.

Paśla hetaha HRU praciahvała supracoŭničać z talibami ŭžo całkam aficyjna. Dakumienty ŭ pošcie Archipava śviedčać pra toje, što taliby źviartalisia pa dapamohu da HRU ŭ dastaŭcy ŭ Afhanistan «skradzienych viertalotaŭ i samalotaŭ», jakija ciapier znachodziacca ŭ Tadžykistanie i Pakistanie, «dapamohu ŭ navučańni supracoŭnikaŭ słužby biaśpieki» i «dapamohu ŭ adnaŭleńni abaronnych mahčymaściaŭ».

U znojdzienaj u pošcie Archipava zapiscy taksama ŭtrymlivajecca prośba da Maskvy nie dapuskać «dziejnaści vorahaŭ novaha isłamskaha ŭrada z terytoryi Tadžykistana» — namiok na byłych afhanskich uradavych čynoŭnikaŭ, jakija biehli tudy ŭ pošukach prytułku paśla krachu ŭrada Ašrafa Hani.

Pavialičyć

Biaździejnaść i biespakaranaść

Adzin z byłych supracoŭnikaŭ afhanskaha UNB raskazaŭ The Insider, što aficyjnamu rasśledavańniu schiemy finansavańnia talibaŭ rasijskimi śpiecsłužbami pieraškadžali ŭradavyja čynoŭniki, jakija ź nieviadomych pryčyn chacieli zakryć rasśledavańnie — «mahčyma, praz karupcyju, mahčyma, praź niejkija intaresy, źviazanyja z Rasiejaj».

Jašče adnym dematyvacyjnym faktaram dla rasśledavańnia ŭ Afhanistanie stała admova ŭrada ZŠA pryznać isnavańnie prahramy ŭznaharodžańniaŭ.

«Źviestki ab dačynieńni Rasii da finansavańnia teraktaŭ paćviardžali niekalki słužbaŭ na padstavie roznych krynic infarmacyi, tak što dokazy hetaj prahramy byli ŭ najaŭnaści, — skazaŭ The Insider inšy supracoŭnik raźviedki ZŠA, ciesna ŭklučany ŭ analiz hetaj temy na mižviedamasnym uzroŭni. — Nie chapała tolki kankretnych imionaŭ».

Ź jahonych słoŭ, niežadańnie adnaznačna abvinavacić Rasiju ŭ podkupie terarystaŭ z metaj zabojstva amierykanskich vajskoŭcaŭ «było vyklikana nie adsutnaściu infarmacyi — heta było adsutnaściu pryjarytetu, moža być, navat mužnaści».

Infarmacyja pra prahramu HRU pa finansavańni teraktaŭ była ŭklučanaja ŭ štodzionny bryfinh dla prezidenta Trampa 27 lutaha 2020 hoda. Padčas prezidenckich debataŭ, arhanizavanych kanałam NBC u kastryčniku taho samaha hoda, tahačasny kandydat Džo Bajden skazaŭ:

«Ja nie razumieju, čamu hety prezident nie žadaje zmahacca z Pucinym, u toj čas jak toj płacić uznaharody za zabojstva amierykanskich sałdat u Afhanistanie».

Paśla prychodu da ŭłady Bajden zaniaŭ bolš ćviorduju pazicyju ŭ dačynieńni da Pucina, ale praciahnuŭ liniju Trampa ŭ vyvadzie vojskaŭ z Afhanistana i nie vystaviŭ u dačynieńni da Rasii aficyjnych abvinavačvańniaŭ z nahody finansavańnia teraktaŭ — mahčyma, tolki tamu, što na toj momant amierykanskim i afhanskim raźviedsłužbam nie chapała tych źviestak pra rasijskich ahientaŭ, jakija apublikavanyja ŭ hetym rasśledavańni.

• 0
• 0
• 0
• 0
• 0
• 0
• 0
• 0