Nie ŭsie ŭltraapracavanyja pradukty adnolkava škodnyja. Niekatoryja možna śmieła jeści

Ultraapracavanyja pradukty charčavańnia vyrablajucca z rafinavanych i maksimalna ačyščanych ad damieškaŭ inhredyjentaŭ. Ich mocna apracoŭvajuć, a taksama časta dadajuć usialakija dadatki — emulhatary, uzmacnialniki smaku, antyaksidanty. U vyniku jany mohuć być vielmi dalokija ad syraviny, ź jakoj vyrablenyja.

Da ŭltraapracavanych praduktaŭ adnosiacca čypsy, šakaładnyja batončyki, piečyva, kurynyja nahietsy, multyfruktovyja soki i navat marožanaje. Navukoŭcy daŭno kažuć, što ŭltraapracavanyja pradukty pavyšajuć ryzyku raźvićcia cukrovaha dyjabietu 2 typu, sardečna-sasudzistych zachvorvańniaŭ, atłuścieńnia i navat raku. Jany mohuć upłyvać nie tolki na naša cieła, ale i na mozh, vyklikać psichičnyja razłady.

Adnak novaje daśledavańnie, jakoje pravodziać amierykanskija vučonyja, pakazvaje, što nie ŭsie ŭltraapracavanyja pradukty adnolkava škodnyja dla našaha zdaroŭja, a niekatoryja navat mohuć być dastatkova karysnymi. Pra heta piša The Wall Street Journal.

U daśledavańni prymali ŭdzieł 36 čałaviek, jakija miesiac žyli ŭ śpiecyjalna abstalavanaj łabaratoryi. Ich charčavańnie stroha kantralavałasia: kožny tydzień jany znachodzilisia na adnoj z čatyroch typaŭ dyjet. Kožnaja ŭtrymlivała prykładna 6000 kałoryj u dzień, prykładna adnolkavuju kolkaść tłušču, cukru, soli i klatčatki. Pry hetym udzielniki mahli jeści kolki zachočuć.

Pieršy typ dyjety składaŭsia ź minimalna apracavanych praduktaŭ typu aŭsianki z kłubnicami i hreckimi arechami. Astatnija byli sfarmiravanyja z ultraapracavanych praduktaŭ, ale adroźnivalisia pa ich składzie. Tak, u druhim typie dyjety byli vielmi kałaryjnyja i «supiersmačnyja» pradukty.

U składzie treciaj dyjety taksama byli vysokakałaryjnyja pradukty, ale dola «spakuślivych» praduktaŭ była źmienšanaja. U składzie apošniaj byli ŭltraapracavanyja pradukty, ale ź nizkaj kałaryjnaściu i zusim nie było «supiersmačnych».

Udzielniki adznačyli, što na ŭsich čatyroch dyjetach adčuvali siabie adnolkava sytymi. Adnak, pa nazirańniach vučonych, na samaj kałaryjnaj dyjecie z «supiersmačnymi» praduktami ŭdzielniki źjadali na 1000 kałoryj bolš, čym na dyjecie ź minimalna apracavanych praduktaŭ, i za tydzień nabrali kala paŭkiłahrama vahi.

Nie ŭsie try dyjety z ultraapracavanych praduktaŭ mieli takuju istotnuju roźnicu ŭ praźmiernym spažyvańni kałoryj. Kali ŭdzielniki siadzieli na dyjecie, što składałasia z ultraapracavanych praduktaŭ ź nizkaj kałaryjnaściu i nie mieła ŭ składzie «supiersmačnych» praduktaŭ, pierajadańnie skłała 170 kałoryj. Za tydzień na hetaj dyjecie, jak i na dyjecie ź minimalna apracavanych praduktaŭ, udzielniki zhubili prykładna 200 hramaŭ vahi.

Vučonyja adznačajuć, što atrymanyja danyja śviedčać pra toje, što nie ŭsie ŭltraapracavanyja pradukty adnolkava ŭpłyvajuć na pierajadańnie i nabor vahi.

Da bolš zdarovych jany adnieśli takija ŭltraapracavanyja pradukty, jak kansiervavanyja piersiki, fasolu, fruktovyja kaktejli ŭ blašancy, mieksikanski sous salsa, kansiervavanyja supy ź nizkim utrymańniem soli i ŭzmacnialnikaŭ smaku, a taksama niatłusty aramatyzavany johurt.

Jak tłumačać vučonyja, kali vytvorcy robiać, naprykład, enierhietyčny batončyk, jany časta źmianiajuć strukturu inhredyjentaŭ i vydalajuć vadu. Heta treba, kab pradukty daŭžej zachoŭvalisia, bo vada spryjaje razmnažeńniu bakteryj. Akramia taho, takaja apracoŭka robić ich bolš kałaryjnymi. U daśledavańni stravy z takimi praduktami ŭtrymlivali kala dźviuch kałoryj na hram, a stravy ź minimalna apracavanymi praduktami — kala adnoj kałoryi na hram.

Zychodziačy z papiarednich vynikaŭ svajho daśledavańnia vučonyja rajać,

jak charčavacca smačna i zachavać zdaroŭje

Pa-pieršaje, nieabchodna źviartać uvahu na kałaryjnaść i vybirać pradukty, dzie na hram prychodzicca kala adnoj kałoryi, jak u johurtu ź nizkim utrymańniem tłušču. A voś praduktaŭ, u jakich hety pakazčyk pieravyšaje dźvie kałoryi na hram, naprykład, zamarožanych frykadelek, lepš paźbiahać.

Pa-druhoje, možna źmienšyć ahulnuju kałaryjnaść stravy, kambinujučy pradukty. Naprykład, razam z kurynymi nahietsami źjeści vialikuju porcyju zialonaj sałaty.

I, narešcie, pry vybary praduktaŭ źviartać uvahu na ŭtrymańnie ŭ ich soli. Heta dapamoža paźbiehnuć spakuślivych «supiersmačnych».

• 5
• 0
• 0
• 3
• 2
• 0
• 0
• 2