Alimpijski pryzior Daščynski pradaje dom kala Drazdoŭ. Jak vam interjery?
Na sajtach ahienctvaŭ nieruchomaści źjaviłasia abviestka ab prodažy katedža na vulicy Vilejskaj, heta niepadaloku ad Drazdoŭ. Pa źviestkach «Našaj Nivy», elitnaje žyllo naležyć pryzioru zimovych Alimpijskich hulniaŭ Dźmitryju Daščynskamu. U 2022 hodzie frystajlist razam ź siamjoj źjechaŭ pracavać u Aŭstraliju. I ŭžo tady jon kazaŭ ab dumkach zastacca tam žyć.
Ahulnaja płošča doma — 270 kvadratnych mietraŭ, ź ich žyłaja — kala 113 kvadrataŭ. Płošča ŭčastka z łandšaftnym dyzajnam prykładna 13 sotak.
Ziamla vydzialałasia Daščynskamu jak i inšym zasłužanym asobam — jak padarunak ad dziaržavy. Naprykład, bližejšaja susiedka — viełasipiedystka Natalla Cylinskaja.
Dvuchpaviarchovy katedž z brusu, pakryty zvonku i ŭnutry finskimi nasyčeńniami. Pabudavany jon byŭ u 2015 hodzie.
Na pieršym paviersie znachodzicca davoli vialiki haraž, topačnaja, kuchnia z prastornaj i ŭtulnaj haścioŭniaj, a taksama adna spalnia (mahčyma, dla haściej).
Na druhim paviersie jość davoli vialiki choł i try žyłyja pakoi.
Padłoha ŭ domie z dubovaj parkietnaj doški i kieramahranitu (u sanvuzłach, prychožaj, kuchni i kacielni). Kab zołkaj biełaruskaj zimoj u haspadaroŭ nie mierźli nohi, u piaredniaj, sanvuzłach i kuchni zroblenaja vadzianaja ciopłaja padłoha. Jość taksama ŭbudavanaja sistema pyłavydaleńnia.
U abjavie adznačana, što ŭsiu santechniku pryvozili ź Ispanii, Italii i Hiermanii.
Nabyć dom alimpijskaha pryziora prapanujecca za $650 tysiač — ale mahčyma tarhavacca.
U 2022 hodzie frystajlist Dźmitryj Daščynski źjechaŭ pracavać u Aŭstraliju trenieram zbornaj i daŭ intervju błohu «Adlustravańnie». Dźmitryj raskazaŭ, što razam ź siamjoj raźmiaściŭsia ŭ Bryśbienie — tam dobraja baza, jość vodny tramplin i možna treniravacca ceły hod.
Adkazvajučy na pytańnie ab pryčynach pierajezdu, jon skazaŭ, što ich niekalki:
— Najpierš, heta budučynia dziaciej. Jany adrazu z entuzijazmam pastavilisia da mahčymaha pierajezdu. Daniłu 15 hadoŭ, a Ściapanu 10. Starejšamu chutka dumać ab pastupleńni. Jon u apošni čas byŭ zusim nie ŭ zachapleńni ad škoły. U pačatkovych kłasach padabałasia, a voś u starejšych užo nie toje. Prychodzić, naprykład, maładaja nastaŭnica. Sama siadzić uvieś urok u telefonie, a dzieciam zadaje niešta zubryć. Abo dajuć vielmi šmat chatnich zadańniaŭ. Niešta nie zadavalniaje — tvaje prablemy.
Jon ščyra pryznaŭsia, što siamja surjozna razhladaje varyjant zastacca ŭ Aŭstralii nazaŭždy.
— Kali ŭ dziaciej usio składziecca, to čamu b nie zastacca tut? Mnie chočacca, kab jany pahladzieli śviet, pažyli ŭ inšaj abstanoŭcy. Ciapier ža i ź vizami vielmi ciažka, šmathadzinnyja čerhi na miažy — nikudy ź Biełarusi amal nie vybracca navat u adpačynak. Raniej syny z radaściu čakali hetaha momantu, chacieli ŭbačyć niešta novaje. Turcyja ci Jehipiet pry ŭsioj pavazie — nie varyjant.
Zdajecca, zaraz Daščynski razam ź siamjoj pryniaŭ kančatkovaje rašeńnie zastacca ŭ Aŭstralii, tamu vystaviŭ na prodaž nieruchomaść u Biełarusi.
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič10
Kamientary