Łukašenka ŭdvaja skaraciŭ terminy vypłaty dapamohi pa biespracoŭi

U pres-słužbie palityka padkreślili, što takoje rašeńnie pryniata «ŭ metach vyklučeńnia ŭtrymanskich nastrojaŭ». U pryvatnaści, ułady skaracili pieryjad vypłaty dapamohi pa biespracoŭi i zrabili bolš žorstkimi patrabavańni da jaho atrymańnia.

Z hetaha času dapamohu dla biespracoŭnych hramadzian pryznačać tolki tady, kali buduć vykananyja kankretnyja ŭmovy. Tak, naprykład, havorka idzie pra rehistracyju ŭ słužbie zaniataści na praciahu miesiaca z daty zvalnieńnia.

Akramia taho, pa novych praviłach treba nie mienš za 5 hadoŭ da rehistracyi biespracoŭnym znachodzicca ŭ pracoŭnych adnosinach z vypłataj uznosaŭ u FSAN.

Taksama, zhodna z zakonam, skaračajecca maksimalny pieryjad znachodžańnia na ŭliku ŭ słužbie zaniataści z 18 da 12 miesiacaŭ. Bolš za toje, ułady vyrašyli ŭdvaja pamienšyć i pieryjad vypłaty dapamohi pa biespracoŭi — z 6 da 3 miesiacaŭ.

Ciapier pamier dapamohi, jakaja pryznačajecca orhanami pa pracy, zaniataści i sacyjalnaj abaronie, zaležyć ad taho, jak doŭha čałaviek nie pracuje i ci źviartajecca jon pa dapamohu ŭpieršyniu.

Hety pamier vahajecca ad 28 da 80 rubloŭ u miesiac.

Akramia hetaha, dakumient praduhledžvaje ŭviadzieńnie kvot na pracoŭnyja miescy dla invalidaŭ: ich buduć vyznačać u paradku i pamierach, vyznačanych uradam, dla najmalnikaŭ usich formaŭ ułasnaści (akramia hramadskich abjadnańniaŭ invalidaŭ, niekamiercyjnych i biudžetnych arhanizacyj).

Jašče adno novaŭviadzieńnie — pašyreńnie pieraliku katehoryj biespracoŭnych, jakim dajucca dadatkovyja harantyi zaniataści. Da ich adnosiacca hramadzianie pieradpiensijnaha ŭzrostu (za 5 hadoŭ da dasiahnieńnia piensijnaha ŭzrostu), a taksama tyja, chto spyniŭ znachodzicca ŭ ŁPP. Akramia taho, u katehoryju trapili biełarusy, jakija pakutujuć ad ałkahalizmu i narkamanii, ale pry hetym prajšli miedycynskuju reabilitacyju.

Taksama ŭ pres-słužbie Łukašenki adznačyli, što z hetaha času dla biespracoŭnych praduhledžanaja mahčymaść elektronnaj rehistracyi, a taksama rehistracyi nie tolki pa miescy žycharstva, ale i pa miescy znachodžańnia.

Zakon ustupić u siłu paśla aficyjnaha apublikavańnia.

• 0
• 0
• 1
• 4
• 0
• 0
• 1
• 0