Polšča źbirajecca pastrožyć umovy vydačy dazvołaŭ na pracu inšaziemcaŭ

U šerahu vypadkaŭ inšaziemcy majuć volny dostup da rynku pracy. Jon dajecca ŭładalnikam Karty palaka, karty stałaha pobytu (pastajannaha DNŽ) abo karty doŭhaterminovaha rezidenta ES, humanitarnaj vizy (D21) abo humanitarnaha DNŽ, a taksama ŭ šerahu inšych vypadkaŭ. Akramia taho, dazvoł nie treba atrymlivać hramadzianam Ukrainy.

Tym, chto nie maje volnaha dostupu da polskaha rynku pracy, dla pracaŭładkavańnia treba atrymlivać dazvoł na pracu.

Novy zakonaprajekt uvodzić pałažeńnie, pry jakim takija dazvoły buduć vydavacca tolki ŭ tym vypadku, kali najmalnik pracaŭładkoŭvaje inšaziemca pa pracoŭnaj damovie (umowa o pracę). Hramadzianska-pravavyja damovy — damova daručeńnia (umowa zlecenie) i damova padradu (umowa o dzieło) — u hetym vypadku nie padyduć.

Ministerstva pracy tłumačyć takuju mieru šyrokimi złoŭžyvańniami hramadzianska-pravavymi damovami. Jak piša partał Ulshr.pl sa spasyłkaj na danyja miascovaha Minpracy, u 2023 hodzie 70% dazvołaŭ na pracaŭładkavańnie inšaziemcaŭ tyčylisia najmu pa damovie daručeńnia abo padobnych damovach. A ŭ cełym u Polščy pa takich damovach pracaŭładkavana 15% rabotnikaŭ (hramadzian krainy i inšaziemcaŭ).

Pry hetym u bolšaści vypadkaŭ inšaziemcy zadziejničanyja jak rabočyja, ofisnyja słužačyja, sielhasrabotniki. Jany zaniatyja ŭ kankretnaha pracadaŭcy, vykonvajuć pracu na praciahu peŭnaha času i ŭ kankretnym miescy, paznačanym najmalnikam, a tamu ich pracoŭnyja adnosiny adpaviadajuć formie pracoŭnaj damovy.

A, naprykład, u IT-śfiery, dzie rod zaniatkaŭ dazvalaje ŭžyvać alternatyŭnyja formy pracaŭładkavańnia, pa damovie daručeńnia (umowa zlecenie) pracuje tolki 3% supracoŭnikaŭ.

Na dumku Minpracy, najaŭny stan rečaŭ źnižaje jakaść polskaha rynku pracy, a taksama nie zabiaśpiečvaje naležnaj sacyjalnaj abarony rabotnikaŭ-inšaziemcaŭ. Akramia taho, jon paharšaje stanovišča polskich hramadzian: kab kankuravać za pracoŭnaje miesca ź inšaziemcami, im davodzicca zhadžacca na takija ž umovy najmu. Taksama ŭ ministerstvie miarkujuć, što kali pracadaŭcam daviadziecca brać inšaziemcaŭ na pracu pavodle pracoŭnaj damovy, jany buduć bolš uvažliva stavicca da padboru kadraŭ.

Pradprymalniki z takim padychodam nie zhodnyja. Krytyki hetaj miery prapanujuć vydalić jaje z tekstu zakonaprajekta, pakolki jana pryviadzie nie da palapšeńnia stanovišča rabotnikaŭ-inšaziemcaŭ, a da taho, što ich buduć brać na pracu naohuł biez afarmleńnia — heta značyć pašyrycca čorny rynak. A voś dla biznesu, jaki pracuje lehalna, pavialičacca vydatki na piersanał.

Prajekt zakona praduhledžvaje i inšyja novaŭviadzieńni:

• Nie buduć vydavać dazvoły na pracaŭładkavańnie inšaziemcaŭ arhanizacyjam, jakija byli stvoranyja abo pracujuć hałoŭnym čynam dla palahčeńnia ŭjezdu ŭ Polšču hramadzian inšych krain.
  
  
• Dla znoŭ stvoranych arhanizacyj abo tych, što vykarystoŭvajuć virtualnyja ofisy, buduć uviedzienyja dadatkovyja ŭmovy vydačy dazvołaŭ.
  
  
• Abmiažujuć tak zvany «aŭtsorsinh supracoŭnikaŭ». Mabyć, majucca na ŭvazie schiemy, kali naminalna inšaziemca pracaŭładkoŭvaje adno pradpryjemstva, a realna jon pracuje na inšym.
  
  
• Zamiest tak zvanaha «testu rynku pracy» (pracedury pravierki, ci možna na pradpryjemstva, jakoje choča naniać inšaziemca, pracaŭładkavać biespracoŭnaha, jaki staić na biržy pracy) płanujuć uvieści bolš chutkuju i efiektyŭnuju praceduru.
  
  
• Zrobiać bolš strohimi pakarańni za niezakonnaje pracaŭładkavańnie inšaziemcaŭ abo padaču niepraŭdzivych źviestak pra ich zaniataść.
  
  
• Pamier štrafu budzie vyznačacca praparcyjna kolkaści niezakonna pracaŭładkavanych inšaziemcaŭ.
  
  
• Administracyjnyja pracedury, źviazanyja z pracaŭładkavańniem inšaziemca i atrymańniem adpaviednych dazvołaŭ, płanujecca rabić u elektronnym vyhladzie.
  
  
• Pamiežnaja słužba i Nacyjanalnaja inśpiekcyja pracy zmohuć apieratyŭna kantralavać zakonnaść pracy inšaziemcaŭ.

• 2
• 1
• 1
• 5
• 1
• 2
• 0
• 0