Rasijskija vajskoŭcy raspačali sprobu zajści na terytoryju šmatpaviarchovaj zabudovy Vuhladara Danieckaj vobłaści, vynikaje z paviedamleńniaŭ rasijskich i ŭkrainskich telehram-kanałaŭ, piša «Ahienstvo». Pad pahrozaj akružeńnia ŭ horadzie apynułasia ŭkrainskaja bryhada kolkaściu kala 2 tysiač čałaviek.
Pra toje, što rasijskija vajskoŭcy prystupili da šturmu Vuhladara, prarasijskija vajennyja błohiery paviedamili ŭviečary ŭ aŭtorak.
Vajenny błohier Barys Rožyn (Colonelcassad) napisaŭ, što farmalna rasijskija vajskoŭcy znachodziacca ŭ miežach Vuhladara ŭžo dva dni, z taho času, jak jany zaniali pryharad, jaki farmalna źjaŭlajecca častkaj horada.
Rasijski vajenkar Juryj Kacianok napisaŭ, što ŭžo da pačatku aŭtorka rasijskim vajskoŭcam udałosia zamacavacca va ŭschodniaj častcy Vuhladara. Pry hetym telehram-kanał «Dva majory» piša tolki ab «pieradavych padraździaleńniach» u miežach horada.
WarGonzo napisaŭ, što rasijskija vajskoŭcy «praciahvajuć palapšać svaje pazicyi vakoł horada, zahaniajučy ŭkrainski harnizon u akružeńnie».
Pra toje, što rasijskija vajskoŭcy sprabujuć akružyć USU ŭ Vuhladary, napisaŭ i blizki da Minabarony telehram-kanał «Rybar».
Dźvie tysiačy vajskoŭcaŭ 72-j miechanizavanaj bryhady USU ryzykujuć apynucca ŭ atačeńni, paćvierdziŭ Forbes.
Bajec ukrainskaha bataljona «Ajdar» Stas Buniataŭ u svaim telehram-kanale paćvierdziŭ, što rasijskija vajskoŭcy «pratačylisia na ŭskrainy Vuhladara».
Ukrainski błohier Siarhiej Sternienka paviedamiŭ, što situacyja ŭ horadzie krytyčnaja. Jon vykazaŭ zdahadku, što ŭ najbližejšyja dni Rasija zachopić horad.
Ukrainski OSINT-prajekt DeepState unočy na paniadziełak paviedamiŭ, što rasijskaja armija padyšła ŭščylnuju da horada, a nievialikaja častka Vuhladara, jakaja znachodzicca na ŭschodzie, apynułasia ŭ šeraj zonie. Tady ž prajekt adznačyŭ na karcie, što rasijskija vajskoŭcy ŭziali pad kantrol «vuhladarskija leciščy».
Hienštab USU ranicaj u aŭtorak paviedamiŭ pra vosiem sprob rasijskich vajskoŭcaŭ zachapić pazicyi Ukrainy «niedaloka ad Paŭłaŭki i Vuhladara».
Napiaredadni Financial Times paviedamiła, što Rasija źmianiła taktyku ŭ Danieckaj vobłaści. Rasijskaje vojska zamarudziła svajo prasoŭvańnie da Pakroŭska i sprabuje abyści ŭkrainskija pazicyi z poŭdnia — u rajonie Vuhladara i Kurachava, piša hazieta.
Bai za hety horad iduć ź lutaha 2022 hoda, u im razburanyja amal usie budynki. Da vajny ŭ horadzie žyli kala 15 tysiač čałaviek.
Čakajecca, što rasijskaje vojska moža ŭziać Vuhladar užo ŭ bližejšyja tydni, kazaŭ FT namieśnik kamandzira 72-j ukrainskaj miechanizavanaj bryhady.
Sudziać hiendyrektara BiełAZa. Pahražaje da 15 hadoŭ9
Kamientary
Šolc suprać. Niachaj by źjeździŭ, pahladzieŭ svaimi vačyma, što rasiejkija akupanty vytvarajuć.