Dobraja źnižka ci machlary? Jak nie dać siabie padmanuć pry nabyćci tavaraŭ u Instagram
Usio čaściej źjaŭlajucca naviny pra toje, jak biełarusy stanoviacca achviarami machlaroŭ, jakija pradajuć svaje tavary i pasłuhi praz Instagram. Raźbiralisia, jak nie patrapić na chitryki takich «pradaŭcoŭ» i jakuju rolu tut ihrajuć papularnyja błohiery.
Što abjadnoŭvaje machlarskija akaŭnty ŭ Instagram?
Asnoŭnaje — vielmi pryvabnyja ceny na tavary abo pasłuhi.
Tak było ŭ vypadku z kvietkami, pra jakija my pisali raniej, dzie działki «pradavali» bukiety sa 101 ružy za 250 rubloŭ i 51 ružu za 140. U realnaści padobnyja bukiety kaštujuć u dva razy daražej.
Tak adbyvajecca i z aŭtamabilnymi šynami, pra jakija piša AutoGrodno.
U adroźnieńnie ad «pradaŭcoŭ» kvietak, jakija biaruć 100% pieradapłaty za tavar, machlary, što «pradajuć» šyny pa nadzvyčaj pryvabnych cenach, biaruć tolki 50% pieradapłaty. Reštu pakupnik nibyta musić pieradać kurjeru pry atrymańni tavaru.
Ceny na šyny ŭ ich pryblizna na pałovu mienšyja za rynkavyja. Zychodziačy z apisańnia, usie šyny ŭ prodažy pryviezienyja z Hiermanii. U asnoŭnym u profili pradajuć b/u pakryški, jakija znachodziacca ŭ stanie amal novych, ale časam prapanujuć i nasamreč novyja.
Naprykład, nibyta novyja šyny Pirelli ŭ machlaroŭ pradajucca pa canie 480 rubloŭ za čatyry štuki, choć na samaj spravie kaštujuć pa 200 rubloŭ za štuku. Taki kamplekt pry kupli ŭ sapraŭdnych pradaŭcoŭ abydziecca na sumu kala 800 rubloŭ.
Toje samaje i ź inšymi varyjantami. Kali ŭ machlaroŭ zimovyja šyny Continental 225/55 R19 pradajucca pa canie 980 rubloŭ za čatyry štuki, to inšyja pradaŭcy anałahičnyja šyny prapanujuć pa cenach ad 550 rubloŭ za štuku. To-bok realny košt takoha kamplekta pieravalić za dźvie tysiačy rubloŭ.
Akaŭnt, praź jaki pradajuć šyny pa niezvyčajnych cenach, byŭ stvorany ŭ sakaviku hetaha hoda. Pieršyja dopisy pačali źjaŭlacca ŭ mai.
U chajłajts infarmacyja ź nibyta vodhukami ad ščaślivych klijentaŭ, umovy pakupki, dastaŭki i navat łakacyja, dzie znachodzicca hetaja kantora. Paznačany adras — Hrodna, vulica Miaśnickaja, 3.
Praŭda, ni čytač AutoGrodno, ni inšyja achviary machlaroŭ nijakaj kramy ci składa z šynami pa tym adrasie nie adšukali. A supracoŭniki šynamantažu, jakija znachodzicca niepadalok ad paznačanaj łakacyi, paviedamili, što ludziej u pošukach tannych šyn pa zhadanym adrasie pryjezdžaje šmat. Pryčym z roznych kutkoŭ Biełarusi.
Vyhladaje, što spravy ŭ machlaroŭ iduć vielmi dobra.
Pazityŭnyja kamientary i vialikaja kolkaść padpisčykaŭ
Siarod inšych prykmiet taho, što vy trapili na machlaroŭ — niemahčymaść pakidać kamientary pad dopisami. Bo ŭ advarotnym vypadku tam buduć źjaŭlacca niehatyŭnyja paviedamleńni ad tych, chto ŭžo zapłaciŭ hrošy, a tavar tak i nie atrymaŭ.
Machlary vielmi lubiać kazyrać vodhukami ad zadavolenych pakupnikoŭ. Tamu jany robiać skryny pierapisak ź nibyta klijentami, jakija vykazvajuć padziaku za atrymanyja tavary.
Ale profili na kartach «Huhł» i «Jandeks», dzie niemahčyma zabaranić pakidać kamientary adnosna takoha «biznesu», adsutničajuć, bo tam mohuć źjavicca historyi achviar, a sam profil paśla skarhaŭ mohuć chutka zabłakavać.
Curjoznym zvanočkam musić stać sam fakt taho, što adziny srodak suviazi z padobnymi pradaŭcami — heta dyrekt u instahramie. U ich niama sajtaŭ i numaroŭ telefonaŭ, pa jakich možna źviazacca.
Raźlik šlacham pieravodu hrošaj na kartku fizičnaj asoby — jašče adzin z momantaŭ, na jakija varta źviartać uvahu, bo padobnyja działki zvyčajna prymajuć hrošy mienavita takim čynam.
Razynka na torcie, abo pry čym tut błohiery
Raźbirajučy machlarskija akaŭnty ŭ instahramie, składana nie zaŭvažyć, što ŭsie jany majuć tysiačy i navat dziasiatki tysiač padpisčykaŭ. Nabrać aŭdytoryju im dapamahajuć hivy (rozyhryšy), jakija pravodziać błohiery ź vialikaj aŭdytoryjaj. Hałoŭnaja ŭmova ŭdziełu ŭ rozyhryšach — padpiska na ŭsich sponsaraŭ. Pravodziać hivy ŭ tym liku i biełaruskija miedyjnyja asoby, jakija zdabyli papularnaść jašče ŭ dainstahramaŭskija časy.
Naŭrad ci błohiery śviadoma padstaŭlajuć svaju aŭdytoryju, prapanujučy padpisacca na ŭsich, chto hatovy stać sponsaram. Chutčej jany prosta nie asabliva praviarajuć, chto staić za peŭnym akaŭntam, na jaki jany paźniej buduć patrabavać padpisacca ŭsim, chto choča paŭdzielničać u rozyhryšy.
Tak z časam častka tych, chto ŭdzielničaŭ u hivie, stanovicca i padpisčykami machlaroŭ.
Schiema z hivami vyhladaje dziejsnaj. Tak, naprykład, tyja ž machlary, jakija zajmalisia prodažam kvietak pa niezvyčajnych cenach, u pieršyja dni kastryčnika pačali raźvivać reziervovy akaŭnt, jaki byŭ stvorany 3 sakavika 2023 hoda. Ale raskručvać jaho pačali tolki ŭ kastryčniku.
Treciaha kastryčnika ŭ jaho było 59 padpisčykaŭ, a praz 23 dni — užo 6451 padpisčyk.
Ab pracy machlaroŭ, jakija pradać nieisnujučyja tavary ŭ instahramie, u hetym miesiacy taksama papiaredžvaŭ adździeł kryminalnaha vyšuku Słuckaha RAUS.
Siarod troch akaŭntaŭ, zhadanych u publikacyi, byli tyja samyja pradaŭcy šyn, a taksama pradaŭcy mužčynskaha adzieńnia i smartfonaŭ.
Akaŭnt apošnich adšukać nie atrymałasia, a voś «pradaŭcy» adzieńnia, jak vidać, praciahvajuć svaju dziejnaść.
Vypadak z akaŭntam bomba.mens.sh0p dakazvaje, što jon byŭ raskručany dziakujučy ŭdziełu ŭ hivach.
Mierkavany śpis inšych sponsaraŭ rozyhryšu možna znajści pry pierachodzie ŭ raździeł «Ab hetym akaŭncie». Jon maje 86 akaŭntaŭ z ahulnymi padpisčykami. Pierasiačeńnie aŭdytoryi składaje ad 50 da 60% ad ahulnaj kolkaści padpisčykaŭ.
Čytajcie taksama:
Raźlik na kartku i 100% pieradapłata. Jak machlary pradajuć kvietki praź instahram
Jak machlary padmanvajuć biełarusaŭ. Sabrali najbolš papularnyja mietady
Bajpoł nazvaŭ imiony mahčymych zabojcaŭ Andreja Zielcara. I zajaviŭ, što siłavika «Nirvanu» zastreliŭ svoj ža6
Kamientary